Kubwerezera Kwa Xikola Ya Utumiki Wa Mulungu
Mibvunzo ya kubwerezera pidapfunzwa inatowerera iyi inadzadingwa pa Xikola Ya Utumiki Wa Mulungu nkati mwa sumana 30 ya nthanda ya Khoni ya 2008. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa mu nkhani za sumana 5 ya nthanda ya Gonkho mpaka sumana 30 ya nthanda ya Khoni ya 2008. [Cidzindikiro: Pangasoweka pipangizo peno mabukhu adabuluswa nkhani kunkhomo kwa mbvunzo, imwe musafunika kusaka-saka m’mabukhu towera mugumane matawiro.—Onani Escola do Ministério, tsa. 36-7.]
LUSO YAKULONGA
1. Kodi tisafunika kucitanji towera tikhale na cinyindiro cakuti misangani inaphatisira ife ndi yakubveka? [be tsa. 242 ndima 3–tsa. 243 ndima 1]Kazinji kene ndi pyadidi kupangiza kuti nsangani usabverana tani na ntsonga inadinga ife. Mwacitsanzo, mudalonga Yezu kuti anyakupfunzace ndi “cheza cha pantsi pano,” iye apangizambo kupitawirira kukhali na iwo. (Mat. 5:14-16) Pakumala kulonga nsangani wace wa bira yakutayika, iye alonga pya kukomerwa kukulu kunaoneka kudzulu thangwi ya nyakudawa m’bodzi wakutcinyuka. (Luka 15:7)
2. Thangwi yanji misangani yakukhonda nensa inagumanika m’makhaliro akudziwika ndi yakuphindulisa? [be tsa. 245 ndima 2-4]Misangani inagumanika m’makhaliro akudziwika isakhuya mitima ya anyakubvesera athu. Ninga Yezu, ife tingakwanise kuphatisira pinthu ping’ono towera kufokotoza pinthu pikulu na pinthu pyakukhonda nensa towera kufokotoza pinthu pyakunensa. Mu njira ineyi tinadzaphedza anthu kubvesesa na kukumbuka undimomwene wauzimu unapfunzisa ife.
3. Kodi ndi kwakufunika tani kuphatisira pinthu pyakuoneka na maso pyakuphindulisa, na Yahova apiphatisira tani towera kupfunzisa mapfunziro akufunika? (Gen. 15:5; Yer. 18:6; Yona 4:10, 11) [be tsa. 247 ndima 1-2]Pinthu pyakuoneka na maso pingakwanise kukhuya mitima ya anyakubvesera na mbipiacitisa kupinyerezera mu ndzidzi onsene. Ninga Yahova, adaphatisira nyenyezi za kudzulu, mbuto inaphatisira nyakuumba dongo na muti udameresa Mulungu towera kucitira Yona nthunzi towera kupfunzisa pinthu pyakufunika kakamwe, ife tingakwanise kuphatisira pinthu pyakuoneka na maso towera kucitisa kuti anthu akumbukire ntsonga zakufunika kakamwe.
4. Kodi tinakwanisa tani kuphatisira pinthu pyakuoneka na maso towera kuthimizira luso yathu yakupfunzisa? [be tsa. 248 ndima 1-3]Munacitisa ife pfunziro ya Biblya yapanyumba, tingakwanise kulonga pya cithunzithunzi cakubverana na pinapfunza ife na kuphemba nyakupfunza kuti atipange pinaona iye. Munadinga ife ndzidzi wa maprofesiya peno pyakucitika pinango m’mbiri, kazinji kene ndi pyakuphedza kucita makonta a midzidzi peno piaka pinapangiza kulinganira kwa pyakucitika pyenepi. Mu kuphatisira mwadidi pithunzithunzi na mapa anagumanika m’mabukhu athu, tingakwanise kuphedza anthu kubvesesa mwakukhonda nensa ntsonga inadingwa.
5. Kodi tinakwanisa tani kuphatisira mapa ninga cinthu cadidi cakuoneka na maso munapfunzisa ife anyakupfunza Biblya? [be tsa. 248 ndima 4]Mapa asaticitisa “kuona” mbuto zinaleri ife m’Biblya na iwo asatiphedza kuthimizira kubvesesa kwathu Malemba. Mwacitsanzo, kudinga ulendo wa Abrahamu kubuluka ku Uri mpaka ku Harani na buluka penepo kuenda ku Beteli peno njira idapita na mbumba ya Israele mukhabuluka iyo ku Ejito kuenda ku Dziko Yakupikirwa kusathimizira cidziwiso cathu ca mbuto za m’Biblya na kusatipangiza nsinzo ukhakhala mbuto zenezi inango na inzace. Kudziwa madziko na mizinda idaenda Yezu na Paulu kamwaza mphangwa kungakwanise kuticitisa kuona kuwangisira kudacita iwo towera kumwaza mphangwa zadidi.
NKHANI N.° 1
6. Na ciphedzo ca nzimu wakucena wa Mulungu, kodi pfunziro ya Biblya inatiphedza kudzindikiranji? [be tsa. 32 ndima 2-3]Na ciphedzo ca nzimu wa Mulungu, tingakwanise kubvesesa kukwanirisika kwa profesiya ya Biblya na mabvekero andimomwene a pyakucita pya dziko. (Mko. 13:4-29; Apok. 12:12) Tingakwanise kudzindikira makhaliro a Nciti kubulukira m’pinthu pyakudzulu na pantsi pidacita iye. (Arom. 1:20) Pfunziro ya Mafala a Mulungu ingakwanisembo kutiphedza towera tikhale akucepeseka, kupirira mphambvu ‘yakunyengeta ya madawo,’ na kukhala maso ninga munapifunira Yahova.
7. Kodi tinakwanisa tani kuphatisira Biblya ene towera kusaka mabvekero a malemba? [be tsa. 34 ndima 4–tsa. 35 ndima 2]Ife tingakwanise kucita pyenepi mu kudinga pakutoma malemba a n’khundu na kucitika mabvunzo ninga awa: ‘Kodi lemba iyi yalemberwa ani? Kodi mavesi a n’khundu asapangizanji pya makhaliro adacitisa kuti mafala anewa alembwe peno pya anthu analongwa mwenemu?’
8. Kodi basa ya Yezu ninga njira inacitisa kuti nkhombo za Yahova ziperekwe kwa anthu isagomezerwa tani mu Evanjelyu ya Jwau? [bsi08-1 tsa. 13 ndima 32]Basa ya Yezu ninga njira ibodzi basi inaphatisira Mulungu towera kupereka nkhombo kwa anthu isagomezerwa m’malemba ninga Jwau 14:13, 14 na 16:23. Yezu asalongwa ninga ‘Mwanabira wa Mulungu,’ “nkate wa moyo,” “cheza cha anthu a pantsi pano,” “nkumbizi wadidi,” “kulamuka na moyo,” “njira na udidi [peno undimomwene] na moyo,” na “muti wadidi wa vinyu.” (Jwau 1:29; 6:35; 8:12; 10:11; 11:25; 14:6; 15:1)
9. Kodi ndi ipi phata ya Malemba inacitisa kukhulupira kuti dotoro Luka ndi adalemba bukhu ya Machitiro? [bsi08-1 tsa. 14-15 ndima 3, 5-7]Maevanjelyu mawiri ene, ya Luka na bukhu ya Machitiro alemberwa Teofilo. (Luka 1:3; Mach. 1:1) Mavesi akutoma a bukhu ya Machitiro asalonga pya pyakucitika pyakumalisa pya bukhu ya Luka. Mafokotozero a Luka a stima ya m’madzi na ulendo wakubuluka ku Sezareya kuenda ku Roma ndi akulinganira mu unyomonyomo wawo onsene. (Mach. 27:40)
10. Kazinji kene, kodi musafunika kucitanji towera kucita tsamba ya nkhani? [be tsa. 39-41]Cakutoma musafunika kulemba nsolo wa nkhani, peno ntsonga ikulu, inafuna imwe kulonga. Dingani mafala onsene anabverana na nsolo. Dingani cifuniro ca nkhani yanu. Buluka penepo, sakani ntsonga zikulu zinafuna imwe kulonga towera kubvekesa nsolo wa nkhani yanu na kukwanirisa cifuniro canu. Sakani m’mabukhu malemba na unyomonyomo wakuti usabverana na ntsonga zikulu za nkhani yanu. Khunganyani nkhani yanu “mundandanda wache.” (Luka 1:3, Chiverano Chachinchino)
KULERI BIBLYA KWA SUMANA
NA SUMANA
11. Kodi ndi templo ipi idamangwa mu “pyaka makumanai na pitanthatu”? (Jwau 2:20) [w08 15/4 “A Palavra de Jeová É Viva — Destaques do livro de João”]Ayuda akhalonga pya kumangwa papswa kwa templo ya Zorobabele na Mambo Herode wa ku Yudeya. Mwakubverana na nyakulonga pyakucitika Josefo, basa ineyi yatoma mu caka 18 ca utongi wa Herode, peno mu 18/17 M.N.W. Mbuto yakupambulika ya templo na mbuto zinango zikulu zamangwa m’piaka pisere. Mbwenye, basa ya mbuto zinango mu templo yapitiriza mpaka pakumala Paskwa ya 30 N.W. mudalonga Ayuda kuti basa ineyi yabvunga piaka 46 kuti imaliswe.
12. Kodi mbani ‘anabuluka kwa akufa mbaenda kuli anthu a moyo’? (Jwau 5:24, 25) [w08 15/4 “A Palavra de Jeová É Viva — Destaques do livro de João”]Yezu akulonga pya ale akuti akhali akufa mwauzimu mbwenye pakumala kubva mafalace ankhulupira na asiya kufamba m’makhaliro awo akudawa. Iwo ‘abuluka kwa akufa mbaenda kuli anthu a moyo’ mu njira yakuti kutongwa kwawo kufa kwamala, na iwo akupaswa cidikhiro ca umaso wakukhonda mala thangwi ya kukhulupira kwawo Mulungu. (1 Ped. 4:3-6)
13. Thangwi yanji Yezu apanga Mariya Madalena kuti aleke kumphata? (Jwau 20:17, Mphangwa Zadidi) [w08 15/4 “A Palavra de Jeová É Viva — Destaques do livro de João”]Mwandimomwene Mariya aphata Yezu thangwi yakuti iye akhanyerezera kuti Yezu akhafuna kuenda kudzulu na iye mbadamuona pontho tayu. Towera kumpasa cibaso cakuti iye akhaenda tayu, Yezu apanga Mariya kuti aleke kumphata, mbuto mwace akhafunika kuti aende kapereka kwa anyakupfunzace mphangwa zadidi za kulamuswa kwace muli akufa.
14. Kodi ndi api mabvekero a ‘kubwera kwa Yezu sawasawa ninga mudaendera’ iye kudzulu? (Mach. 1:9-11) [rs tsa. 435 ndima 3; it-1 tsa. 243 ndima 14]Tisafunika kudziwa kuti aanju akhalonga pya ‘kubwera’ (gr.: tró·pos), tayu kwenda (gr.: mor·fé) kwa Yezu kudzulu. Mukhaphimbirwa iye na thambo, adzakhala wakukhonda kuoneka m’maso mwa anthu aunyama. Pyakulembwa pya Machitiro pisapangiza kuti kukwira kwace kudzulu nee kukhali kwakuti bwerani mudzaone peno kwakupangizika kwa anthu onsene tayu na iye aoniwa na atowereri ace angasi basi akukhulupirika. Anthu azinji mu dziko nee akhadziwa pikhacitika. Pyenepi mbipidacitikambo pa kubwera kwa Kristu m’mphambvu ya Umambo mu caka 1914.