Ndandanda Wa Xikola Ya Utumiki Wa Mulungu Wa 2008

PITSOGOLERO

Nkati mwa caka ca 2008, Xikola Ya Utumiki Wa Mulungu inadzacitwa ninga munapangizwa ipyo pantsiapa.

MUDABULUSWA NKHANI: BIBLYA CHISENA, Beneficie-se da Escola do Ministério Teocrático [be], “Malembo Onsene”—Mbandimomwene Na Akuphindulisa (Yakubuluswa mu 2008) [bsi08], na Raciocínios à Base das Escrituras (Yakubuluswa mu 1989) [rs].

Xikola isafunika kutoma pa NDZIDZI WAYO na nyimbo, phembero, na kucita bweraniko, buluka penepo mbipitiriza ninga pidandandalikwa pantsiapa. Kunkhomo kwa nkhani ibodzi na ibodzi, muyang’aniri wa xikola analonga nsolo wakutowerera na kucemera anafuna kuukamba.

LUSO YAKULONGA: Mphindi 5. Muyang’aniri wa xikola, phungu wakuphedza, peno nkulu unango wa mpingo wakuthema anadzacita nkhani ineyi ya luso yakulonga yakubuluswa m’bukhu ya Escola do Ministério. (M’mipingo yakuti iri na akulu a mpingo akucepa, atumiki akutumikira aluso angakwanise kuphatisirwa.)

NKHANI N.° 1: Mphindi 10. Nkhani ineyi isafunika kucitwa na nkulu wa mpingo peno ntumiki wakutumikira wakuthema, na inadzabuluswa m’bukhu Beneficie-se da Escola do Ministério Teocrático peno “Malembo Onsene”—Mbandimomwene Na Akuphindulisa. Isafunika kucitwa ninga nkhani ya cipfunziso ya mphindi khumi. Cifuniro ca nkhani ineyi si kulonga kwene basi mphangwa tayu mbwenye ndi kugomezera maphindu a mphangwa zenezi, kugomezera pinthu pyakuti pinaphedza kakamwe mpingo. Phatisirani nsolo uli pa ndandanda. Abale anapaswa nkhani ineyi asafunika kucita mphole-mphole towera akhonde kupitirira ndzidzi udapaswa iwo. Pingakhala pyakufunika uphungu wapakhundu ungakwanise kuperekwa.

KULERI BIBLYA KWA SUMANA NA SUMANA: Mphindi 10. M’mphindi zixanu zakutoma, nkulu wa mpingo peno ntumiki wakutumikira wakuthema anadzafokotoza mphangwa mu njira yakuphindulisa mpingo. Iye angakwanise kufokotoza khundu yonsene inafuna iye ya kuleri Biblya kwa sumana ineyi. Iye nkhabe funika kufokotoza kwene mwacigwagwa khundu ineyi ya kuleri Biblya tayu. Cifuno cikulu ca nkhani ineyi ndi kuphedza anyakubvesera kudziwa kuti thangwi yanji na ndi mu njira ipi mphangwa zenezi ndi zakuphindulisa. Nyakukamba nkhani asafunika kucita mphole-mphole towera akhonde kupiringana mphindi zixanu zakutoma nazo. Iye asafunika kusiya mphindi zixanu towera anyakubvesera acitembo khundu. Anyakubvesera asafunika kuphembwa kuti apereke matawiro acigwagwa (akukhonda piringana masegundu 30) a ntsonga na maphindu adakhala na iwo pa kuleri Biblya. Buluka penepo muyang’aniri wa xikola anadzaphemba kuti abale na alongo ali na nkhani m’masala anango abuluke.

NKHANI N.° 2: Mphindi zakukhonda piringana 4. Iyo ndi nkhani ya kuleri yakuti isafunika kucitwa na m’bale. Nyakupfunza asafunika kuleri ndima idapaswa iye mbakhonda khala na matomero peno mamalisiro. Muyang’aniri wa xikola asafunika kukhala na cifuno ca kuphedza anyakupfunza towera aleri mwadidi, mwakulinganira, kugomezera mwadidi nyerezero, kucinja-cinja fala, kupuma mwadidi na mwacibaliro.

NKHANI N.° 3: Mphindi 5. Iyo ndi nkhani yakuti isafunika kucitwa na mulongo. Alongo anafuna kucita nkhani ineyi anapaswa peno anasankhula okhene citsanzo cibodzi pa ndandanda uli pa tsamba 82 ya bukhu Escola do Ministério. Nyakupfunza asafunika kuphatisira nsolo udapaswa iye na kuufokotoza mu njira yakuti inakhala yakuphedza na yakuphindulisa m’basa ya m’munda mu cisa cawo. Nkhani ingakhonda thonyezwa bukhu idabuluswa iyo, nyakupfunza asafunika kusaka-saka m’mabukhu athu towera agumane mphangwa za nkhani ineyi. Anyakupfunza apswa asafunika kupaswa nkhani zakuti ziri na bukhu idabuluswa izo. Muyang’aniri wa xikola asafunika kukhala wakufunisisa kuona njira inafokotoza nyakupfunza nsolo wace na inaphedza iye mwanaciro nyumba kunyerezera Malemba na kubvesesa ntsonga zikulu za nkhani yace. Muyang’aniri wa xikola anadzasankhula mphedzi.

NKHANI N.°  4: Mphindi 5. Nyakupfunza asafunika kufokotoza nsolo wa nkhani udapaswa iye. Nkhani ingakhonda thonyezwa bukhu idabuluswa iyo, nyakupfunza asafunika kusaka-saka m’mabukhu athu towera agumane mphangwa za nkhani ineyi. Ingapaswa m’bale, isafunika kucitwa ninga nkhani yakucitirwa anyakubvesera mu Nyumba ya Umambo. Ingapaswa mulongo, ndzidzi onsene isafunika kucitwa ninga munacitwa Nkhani N.° 3. Muyang’aniri wa xikola angakwanise kupasa m’bale Nkhani N.° 4 ndzidzi onsene unaona iye kukhala pyakuthema kucita pyenepi. Taphata miyendo, misolo ya nkhani yakuti iri na cidzindikiro ca nyenyezi ndzidzi onsene isafunika kucitwa na abale. Khala m’mpingo mwanu muna akulu a mpingo na atumiki akutumikira azinji ene towera kucita makhundu akusiyana-siyana mu Xikola Ya Utumiki Wa Mulungu na mu Nsonkhano Wa Basa, mphyadidi kuti misolo iri na cidzindikiro ca nyenyezi ipaswe nkulu peno ntumiki wakutumikira pingakwanisika.

UPHUNGU: Mphindi 1. Muyang’aniri wa xikola nkhabe funika kudziwisa mwanyapantsi luso yakulonga idapangwa nyakupfunza kuti akhunganyike. Nkhani N.° 2, N.° 3, na N.° 4 ingamala, muyang’aniri wa xikola asafunika kulonga ntsonga za nkhani zidacitwa mwadidi towera kuwangisa nyakukamba nkhani. Cifuno cace si kulonga basi kuti “mwacita pyadidi” tayu mbuto mwace, ndi kupangiza kuti thangwi yanji ntsonga ineyi ya nkhani ndi yakuphindulisa. Mwakubverana na luso ya nyakupfunza m’bodzi na m’bodzi, uphungu unango wakuthimizirika wakuphedza ungakwanise kuperekwa pakhundu nsonkhano ungamala peno pa ndzidzi unango.

KUKOYA NDZIDZI: Nee nyakukamba nkhani nee nyakupasa uphungu nkhabe funika kupiringana ndzidzi. Anacita Nkhani N.° 2 mpaka N.° 4 asafunika kulimiriswa mwaluso ndzidzi ungamala. Khala abale anacita nkhani yakutoma ya luso yakulonga, Nkhani N.° 1, peno ntsonga za kuleri Biblya apiringana ndzidzi, iwo asafunika kupaswa uphungu pakhundu. Onsene asafunika kucita mphole-mphole towera akhonde kupitirira ndzidzi. Programu yonsene isafunika kumaliswa m’mphindi 45, kusiyapo nyimbo na phembero.

FORMULARYU YA UPHUNGU: Iri m’bukhu.

PHUNGU WAKUPHEDZA: Nsoka wa akulu a mpingo usafunika kusankhula nkulu wakuthema, khala alipo unango m’bodzi kusiyapo muyang’aniri wa xikola, towera akhale phungu wakuphedza. Khala alipo akulu a mpingo azinji ene pa mpingo, iwo angakwanise kucinjana basa ineyi piaka pyonsene. Basa ya phungu wakuphedza ndi yakupasa uphungu wapakhundu, pingakhala pyakufunika, kwa abale anacita Nkhani N.° 1 na ntsonga za kuleri Biblya. Si pyakufunika tayu kupasa uphungu akulu a mpingo anzace peno atumiki akutumikira ndzidzi onsene unacita iwo nkhani.

KUBWEREZERA KWA XIKOLA YA UTUMIKI WA MULUNGU: Mphindi 30. Pakupita nthanda ziwiri, muyang’aniri wa xikola anadzacitisa kubwerezera kwa xikola. Pa ntsiku ineyi, inafuna kutoma ndi nkhani ya luso yakulonga na ntsonga za kuleri Biblya ninga pidapangizwa padzulu apa. Kubwerezera kweneku kunadzalonga pya mphangwa zidapfunzwa pa xikola nkati mwa nthanda ziwiri zidapita, kuphataniza za sumana ineyi. Khala sumana ya Kubwerezera Kwa Xikola Ya Utumiki Wa Mulungu mpingo wanu uli na nsonkhano wa cisa, kubwerezera kweneku (na makhundu anango a sumana ineyi) kusafunika kucitwa sumana inzace, na programu ya sumana ineyo isafunika kucitwa sumana ya nsonkhano. Khala muyang’aniri wa cisa anadzacedzesa mpingo wanu nkati mwa sumana ya kubwerezera kwa xikola, nyimbo, nkhani ya luso yakulonga na ntsonga za kuleri Biblya pisafunika kucitwa ninga muna ipyo pa ndandanda. Nkhani ya cipfunziso (inacitwa pakumala nkhani ya luso yakulonga) isafunika kukhala ire ikhafuna kucitwa sumana inzace. Xikola Ya Utumiki Wa Mulungu ya sumana inafuna kudza inadzakhala na nkhani ya luso yakulonga pabodzi na ntsonga za kuleri Biblya za sumana ineyi buluka penepo kubwerezera kwa xikola.