Kubwerezera Kwa Xikola Ya Utumiki Wa Mulungu
Mabvunzo a kubwerezera pidapfunzwa akutowerera awa anadzadingwa pa Xikola Ya Utumiki Wa Mulungu nkati mwa sumana 29 ya nthanda ya Malandalupya ya 2007. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa mu nkhani za sumana 3 ya nthanda ya Nyenzi mpaka sumana 29 ya nthanda ya Malandalupya ya 2007.
LUSO YAKULONGA
1. Thangwi yanji kubwerezera ndi njira yakufunika kakamwe ya kupfunzisa? [be tsa. 206 ndima 1-2, bokosi] Kubwerezera ndi njira yakuphedza manyerezero yakuti ingakwanise kuphatisirwa towera kugomezera ntsonga zikulu na kuphedza anyakubvesera athu kuzibvesesa mwakukhonda nensa. Cifuno cathu ndi cakupereka mphangwa zakuti abveseri athu anakwanisa kuziphatisira. Anyakubvesera athu angakhonda kukumbuka pinalonga ife, mafala athu nee anakwanisa kuakulumiza ku pinthu pire pinakhulupira iwo peno nkhaliro wawo wa umaso tayu.
2. Kodi tingakwanise kugomezera nsolo wa nkhani mu njira zipi? [be tsa. 210, bokosi] Pakutoma, sankhulani ntsonga zikulu zakuti zinakuphedzani kufokotoza nsolo. Buluka penepo, onani kuti munagomezera tani nsolo wa nkhani na mu nzidzi upi, mbumudziwa kuti iwo usafunika kulongwa mwakubwereza-bwereza nkati mwa nkhani yonsene. Munakamba imwe nkhani, bwerezerani mafala peno ntsonga zikulu za nsolo.
3. Kodi ntsonga zikulu za nkhani ndi zipi, na ndi ninji pinacitisa nyakukamba nkhani kuzisankhula? [be tsa. 212, ndima 1-3] Ntsonga zikulu ndi manyerezero akuti ndi akufunika kakamwe towera kubvekesa cifuno ca nkhani. Kusankhula na kuphatisira ntsonga zikulu kusacinja mwakubverana na anyakubvesera pabodzi na cifuno ca nkhani. Ife tisafunika kudziwa mwadidi cifuno cathu munalonga ife kwa anyakubvesera athu na kusankhula mphangwa zakuti zinakwanisadi kuaphedza.
4. Thangwi yanji nee tisafunika kukhala na ntsonga zikulu zizinji mu nkhani? [be tsa. 213, ndima 2-4] Ndi ntsonga pang’ono basi zikulu zinafunika towera kufokotoza nsolo wa nkhani. Kukhala na ntsonga zikulu zizinji kungakwanise kuticimwanisa kufokotoza ibodzi na ibodzi mu njira yadidi. Kubvekesa mwadidi ntsonga pang’ono basi kusacitisa anyakubvesera athu kukhala na nzidzi wa kudinga ntsonga ibodzi na ibodzi mpaka kukhala zakukoyeka m’manyerezero mwawo.
5. Thangwi yanji ndi pyakufunika kuti mafala athu akutoma akhale akuphata ntima, na tinakwanisa tani kucita pyenepi? [be tsa. 215 ndima 1; tsa. 216 ndima 1-3, bokosi] Khala anthu anadzatibvesera na kuti anabvesesa mwadidi mpaka papi, pyenepi pisanyindira mafala athu akutoma. Mabvunzo akucitisa kunyerezera na kucitisa anyakubvesera kuatawira m’manyerezero asakhala akuphata ntima. Kulonga pyakugumana napyo pya umaso kungacitise anthu kufuna kubvesera, mbwenye pyenepi pisafunikambo kuikha phata ya makhundu anango akufunika a nkhani. Mphangwa zipswa peno mafala akubuluswa mu tsamba ya mphangwa angakwanise kukhala akuphindulisa angakhala akubverana na nkhani.
NKHANI N.° 1
6. Kodi Masalmo 119:89,90 asatiphedza tani kudziwa kuti ife tingakwanise kunyindira mafala a Mulungu? [w05 15/4 tsa. 15 ndima 3] Mu kuphatisira mafala a Mulungu—“mitemo [yace] ya pya kudzulu”—pinthu pyakudzulu pisafamba mu njira yakulinganira na dziko yapantsi yakhazikiswa mwadidi towera ikhale kuenda na kuenda. (Yobe 38:31-33; Sal. 104:5) Ife tingakwanise kunyindira mafala onsene anabuluka pa mulomo wa Yahova; pinalonga iye ‘pinadzacitikadi’ mu kukwanirisa cifuniro cace. (Iza. 55:8-11)
7. Kodi bukhu ya Ezekyele isagomezeranji, na ndi ninji pinafuna kudzacitikira ale akuti cincino asakhala maso na asalambira mu njira inakomeresa Yahova? [bsi07 tsa. 8 ndima 33] Profesiya ya Ezekyele isagomezera kuti kukuzwa kwa dzina ya Yahova ndi kwakufunika kakamwe kupiringana pinthu pinango pyonsene. (Ezek. 36:23) Yahova anadzakuza dzina yace mu kufudza onsene anakhonda lemedza dzina ineyi. Ale anakuza Yahova mu umaso wawo cincino mukucita pinafuna iye mu ulambiri wakutawirika anadzagumana kuwangiswa na umaso wa kwenda na kwenda mu nkulo unabuluka mu templo yace.
8. Kodi anakwanisa tani ‘mapikiro’ a Yahova kukoya ntima wathu? (Sal. 18:30) [w05 1/9 tsa. 30 ndima 2] Mudakhonda iye manyengerero a Sathani mu nthando, Yezu nee akhacedza na Dyabo towera kuona kuti mbani akhali na cidziwiso cikulu tayu. Mukuphatisira Malemba ninga phata ya matawiro ace, Yezu alonga kubulukira mu ntima mwace, na pyenepi ndipyo pidacitisa kuti misampha ya Dyabo, yakuti yaphata basa mwadidi mu Edeni, icimwane kuphata basa kwa Yezu. (Luka 4:1-13) Tingadzadza mitima yathu na mafala a Yahova, manyengerero a Sathani anacimwanambo kuphata basa kwa ife.
9. Kodi cidikhiro ca Umambo cisagomezerwa tani mu bukhu yonsene ya Danyele? [bsi07 tsa. 10 ndima 23] Yahova Mulungu asalongwa kukhala Ntongi Wankulu kakamwe adaikha Umambo wakuti nkhabe kudzafudzwa. (Dan. 2:19-23, 44; 4:25) Yahova asakuzwa na kupaswa mbiri ninga Nkulu ule wakukhaliratu, wakuti asatonga nseru wa Umambo na kupasa “mbodzi wakulandana na munthu” “mphambvu na mbiri na umambo” wakukhonda mala. “Anthu akuchena a Mulungu wa kudzulu” anacita khundu na Kristu Yezu, “Mwana munthu,” mu Umambo. (Dan. 7:13, 14, 18, 22; Mat. 24:30; Apok. 14:14) Iye ndi Mikele, mwana wa Ntongi Wankulu, wakuti ali na mphambvu ya Umambo towera kunyedza na kumalisa maumambo onsene a dziko ino yakale. (Dan. 2:44; 12:1; Rev. 12:7-10)
10. Kodi bukhu ya Ozeya isawangisa tani cikhulupiro cathu mu maprofesiya akupumirwa a Yahova? [bsi07 tsa. 12 ndima 14] Pyonsene pidaprofetizari Ozeya thangwi ya Israele na Yuda pyakwanirisika. Israele athawiwa na anthu akhanfuna pakati pa madzinza akuendekana akulambira adzimunthu na afudzirwatu mwakucimbiza na Asirya mu caka 740 A.E.C. (2 Am. 15:20; 17:3-6, 18; Oze. 8:7-10) Yahova abvera ntsisi Yuda na kumpulumusa, tayu na mphambvu ya anyankhondo, mbwenye na anju wace adapha Asirya akukwana 185.000. (2 Am. 19:34, 35; Oze. 1:7) Maprofesiya a Ozeya akulonga pya kubwezereswa akwanirisika mu nzidzi udagumanya Yahova Yuda na Israele kubuluka ku dziko ya ubitcu wawo mu caka 537 A.E.C. (Esd. 2:1; 3:1-3; Oze. 1:10, 11; 2:14-23; 3:5; 11:8-11; 13:14; 14:1-9)
KULERI BIBLYA KWA SUMANA NA SUMANA
11. Kodi kupimwa kwa templo m’masomphenya a Ezekyele kusabvekanji, na pyenepi pisatipasa cinyindiro canji lero? (Ezek. 40:2-5) [w99 1/3 tsa. 9 ndima 6; tsa. 14 ndima 7] Masomphenya apasa Ayuda akhali ku ubitcu cinyindiro cakuti ulambiri wakucena pa templo ya Mulungu unadzabwezereswa pontho. Kupimwa kwa templo kwapereka cinyindiro caumulungu cakuti mwakukhonda penula masomphenya anadzakwanirisika. Lero, tiri kupaswa cinyindiro cakuti nkhabe cinthu—ngakhale ntcingo wakuwanga wakubuluka kwa mautongi a mphambvu—cingakwanise kulimirisa kubwezereswa kwa ulambiri wakucena.
12. Kodi mbani “mambo” peno ‘nkadamu’ (Tradução do Novo Mundo) analongwa pa kukwanirisika kwa masomphenya akumalisa a Ezekyele? [w99 1/3 tsa. 16 ndima 13-15; tsa. 22-3 ndima 19-20] “Mambo” peno ‘nkadamu’ ndi nsoka wa amuna wakuti uli na cidikhiro ca kukhala maso pa dziko yapantsi wakuti unadzaphedza kutsogolera mabasa mu dziko ipswa. (Ezek. 45:8, 9) Mu makhumi a piaka ndulimu, akulu akukhulupirika akudzodzwa asapfunzisa nsoka unoyu wa nkadamu wakuti ukuthambaruka towera udzacite basa ineyi yakutsogolera. Munatonga a 144.000 na Kristu kudzulu, nsoka wa nkadamu unadzatsogolera anthu pantsi pa utsogoleri wa Umambo unoyu Waumesiya.
13. Kodi ndi api mabvekero a Danyele 2:21? [w98 15/9 tsa. 12 ndima 9] Maseze si Yahova tayu anacitisa kuti paoneke kukundana na kucinjana kwa mautongi a ndale za dziko, iye anamphambvu ya kuikha na kubulusa atongi. Iye asacita pyenepi mu nzidzi wace wakuthema pontho mwakubverana na cifuniro cace.
14. Kodi ndi ninji cidacitisa Danyele kukhala ‘munthu wakufunika’ kakamwe pamaso pa Yahova? (Dan. 9:23) [dp tsa. 185 ndima 12; w04 1/8 tsa. 12 ndima 17] Danyele akhali wakuzitonga kuphatisisa mwadidi ulambiri wandimomwene mwakukhonda tsalakana mayesero akathabusa umaso wace. (Dan. 1:8; 2:12, 13; 6:8-11) Nzidzi onsene iye akhaphembera kwa Yahova. Iye akhapfunza na kunyerezera Mafala a Mulungu na pifuniro pyace. (Dan. 9:1, 2) Iye agomezera ulungami wa Mulungu, na mwakucepeseka atawira madawo ace. (Dan. 9:7, 14, 16, 20)
15. Kodi ndi mu njira ipi nee mukhali cidziwiso ‘n’dziko ya Mbuya’ ya Israele, na ife tisafunika kuona tani mafala anewa? (Oze. 4:1, 2, 6) [w05 15/11 tsa. 21 ndima 21; jd tsa. 57-8 ndima 5; tsa. 61 ndima 10] Si kulonga kuti Aisraele akhapwaziratu Mafala a Mulungu tayu, mbwenye iwo adzakhala ‘akukomerwa na pinthu pya dziko yawo mbagaya.’ (Oze. 13:6) Mwakukomerwa na mpfuma zawo zakumanungo, iwo asiya kucita pinthu mwakubverana na cidziwiso ca ‘Mbuya.’ (Oze. 4:1, 2) Lero, ife tisafunika kuona mafala anewa ninga cenjezo tayu towera kuthowa mwauzimu kwakuti kungakwanise kutitsogolera ku kukhala anthu akukhonda bvera mitemo ya Mulungu.