Kodi Imwe Musatsidzikiza Mafala A Mulungu?
1 Mu dziko yakuti kazinji kene anthu nkhabe khulupira Biblya, Akristu andimomwene mwaphinga asatsidzikiza Mafala a Mulungu. Kukhulupira kuti “Malembo onsene ndiye Mulungu adaalembesa,” ife tiri ku khundu ya Yezu Kristu, ule adalonga tenepa mu phembero kwa Yahova: “Mphangwa zanu ndi udidi [‘undimomwene,’ Tradução do Novo Mundo].” (2 Tim. 3:16; Jwau 17:17) Kodi tinakwanisa tani kutsidzikiza Mafala a Mulungu mu njira yadidi?
2 Kupfunza Malemba: Mokhonda penula Yezu akhapfunza Mafala a Mulungu mwacidikhodikho. Pyenepi pyancitisa kupfunzisa Malemba mu utumiki wace onsene. (Luka 4:16-21; 24:44-46) Kodi tinakwanisa tani kukoya malemba aciphedzo mu manyerezero athu? Tinakwanisa kucita pyenepi mukuleri Biblya ntsiku zonsene na kunyerezera vesi inaona ife kukhala yakuwangisa peno yaciphedzo mu utumiki. Munakhunganya ife misonkhano, tisafunika kuona na kuleri mu Biblya ene malemba na panango kukhunganya ntawiro mu malemba anewa. Munabvesera ife misonkhano, tisafunika kutowezera mu Biblya yathu munaleri nyakukamba nkhani malemba. Kupfunza malemba a Biblya kunadzatikhunganya towera “kulonga na kulungama mafala a udidi [‘undimomwene,’ NM].”—2 Tim. 2:15.
3 Siyani Kuti Biblya Ilonge: Munacita ife utumiki, tisafunika kusiya Biblya kuti ilonge. Mwacitsanzo, makhaliro angatawirisa, tisafunika kuwangisira towera kuleri lemba na mwanaciro nyumba. Khala iye acita mbvunzo peno kupokanya pinalonga ife, mphyadidi kuphatisira Biblya towera kutawira. Khala mwanaciro nyumba ali wakudzudzumika na basa, tingakwanise basi kugomezera nyerezero ya Biblya mukulonga: “Mbandisati kuenda, ndilekeni ndikuleririni lemba iyi ibodzi.” Nzidzi onsene pingakwanisika, lerini mu Biblya mwene, mbumusiya kuti nyakubvesera akutowezereni munaleri imwe.
4 Mukhapangizwa mwanaciro nyumba unango malemba towera kupokanya Utatu, iye alonga: “Ine ndikhaenda ku gereja mu umaso wanga onsene, na mwandimomwene nee ndadziwa kuti Biblya isalonga pyenepi!” Mokhonda dembuka iye atawira pfunziro ya Biblya. Yezu alonga kuti mabirace mbadabva falace. (Jwau 10:16, 27) Njira yadidi kakamwe kwa anthu a ntima wadidi kudzindikira undimomwene ndi kuona undimomwene unoyu mu Biblya ene. Tikhaleni mphapo atsidzikizi a Mafala a Mulungu!