‘Iye Asapasa Mphambvu Ale Adaneta’
1 Mu midzidzi inango ife tonsene tisakhala akuneta. Pyenepi nee pisacitika basi thangwi ya basa peno pyakucita pinango pyakuti pisaphemba mphambvu tayu, mbwenyembo ndi thangwi ya pinenso pinathimbana na ife mu “midzidzi [ino] yakugopswa.” (2 Tim. 3:1) Ninga anzakazi a Yahova, kodi tisakwanisa tani kugumana mphambvu yauzimu yakufunika towera kupitiriza mu utumiki wathu? Tisacita pyenepi mukunyindira ule wakuti “mphambvu zache ntsikulu kakamwe,” Yahova. (Iza. 40:26) Iye asadziwa pyakufuna pyathu na asafunadi kutiphedza.—1 Ped. 5:7.
2 Masasanyiro A Yahova: Yahova asatiwangisa mukuphatisira nzimu wace wakucena, mphambvu yakuwanga ibodzibodzi idaphatisira iye pa kucita kudzulu na pantsi. Nzimu wa Mulungu usatiphedza kukhala na ‘mphambvu zipswa’ tinganeta. (Iza. 40:31) Bvunzikani, ‘Kodi ndi upi ulendo wakumalisa udacita ine phembero towera kuphemba nzimu wakucena kuti undiwangise towera ndikwanirise mabasa anga Acikristu?’—Luka 11:11-13.
3 Mukuleri ntsiku na ntsiku na kunyerezera Mafala akupumirwa a Mulungu na kudyeswa mwauzimu kubulukira mukupfunza nzidzi onsene mabukhu athu Acikristu, tinadzakhala ninga “muti udatchekwa duzi na madzi, mbubala misapo pa ndzidzi wache, masambambo ache mbakhonda kuwuma.”—Sal. 1:2, 3.
4 Yahova asaphatisirambo anyakukhulupira anzathu, akuti angakwanise ‘kutibalangaza’ peno kutiwangisa. (Akol. 4:10, 11) Iwo asatiwangisa pa misonkhano yampingo kubulukira mu makani awo akupasa mphambvu, matawiro na nkhani zawo. (Mach. 15:32) Makamaka akulu a mpingo Acikristu, asapereka ciphedzo cauzimu na ciwangiso cakuthontholesa.—Iza. 32:1, 2.
5 Utumiki: Mukapibva kukhala wakuneta, lekani kulimira kumwaza mphangwa! Mwakusiyana na mabasa anango mazinji, kucita khundu mu utumiki nzidzi onsene mwandimomwene kusatiwangisa. (Mat. 11:28-30) Kumwaza mphangwa zadidi kusatiphedza kuikha manyerezero ku Umambo wa Mulungu na kudikhira tsogolo yokhonda mala pabodzi na nkhombo zace zakudzumisa.
6 Pana pizinji towera kucita makhaliro ano akuipa mbasati kufudzwa. Tiri na mathangwi onsene akukhala akukhulupirika mu basa yathu, mbitinyindira ‘mphambvu zinapaswa ife na Mulungu.’ (1 Ped. 4:11) Na ciphedzo ca Yahova tinadzamalisa basa yathu, thangwi ‘iye asapasa mphambvu ale adaneta.’—Iza. 40:29.