Kubwerezera Kwa Xikola Ya Utumiki Wa Mulungu
Mabvunzo a kubwerezera pidapfunzwa akutowerera awa anadzadingwa pa Xikola Ya Utumiki Wa Mulungu nkati mwa sumana inatoma pa 30 ya nthanda ya Bwinja ya 2007. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa m’nkhani za sumana 5 ya nthanda ya Murope mpaka sumana 30 ya nthanda ya Bwinja ya 2007. [Cidzindikiro: Pangasoweka pipangizo peno mabukhu adabuluswa nkhani kunkhomo kwa mbvunzo, imwe musafunika kudinga towera mugumane matawiro.—Onani Escola do Ministério, tsa. 36-7.]
LUSO YA KULONGA
1. Kodi tinakwanisa tani kucitisa tsamba ya nkhani yathu kukhala yokhonda nensa? [be tsa. 168 ndima 3] Ntsonga zikulu zingasi zisafunika kubvekeswa mwadidi. Pantsi pa ntsonga ikulu ibodzi na ibodzi, tisafunika kundandalisa manyerezero na malemba anafuna ife kuphatisira munakamba ife nkhani. Cifuno cathu ndi kukumbuka manyerezero onsene, tayu mafala basi.
2. Longani njira zinai zakuti tinakwanisa kukamba nkhani mwakutowezeka. [be tsa. 170 ndima 3–tsa. 172 ndima 4] Masasanyiro a misolo ming’ono ya nkhani; thangwi na pyakubwereswa; nyatwa na mamalisiro ace; na undandaliki wa ucitiki wapyo.
3. Kodi ndi pinthu pipi pinafunika ife kukumbukira pa kutonga kusankhula pyakuthimizira m’nkhani? [be tsa. 173 ndima 1-2] Nsolo wa nkhani, ntundu wa anyakubvesera athu, na cifuno cathu ca kufokotoza mphangwa cisafunika kutonga pinasankhula ife. Maseze mafala akuthimizira angaphatanizwe, pinakhala pyadidi kukumbuka kuti ntsonga zikulu zakucepa zakufokotozwa mwadidi zinakumbukirwa mwadidi kakamwe kupiringana ntsonga zakuinjipa zakufokotozwa mwakucimbiza.
4. Kodi ndi maphindu api mangasi a kukamba nkhani kubulukira m’ntima? [be tsa. 175 ndima 2-4] Nakuti ntundu unoyu wa kukamba nkhani ndi wakukomeresa na wakuphata ntima, iwo unadzakhala wakukomeresa kakamwe kwa anyakubvesera athu. Njira ineyi isatiphedzambo kuyang’ana mwadidi ale analonga na ife. Anyakubvesera athu anadzaona kuti tisadziwa pinalonga ife na tisapikhulupiradi. Kukamba nkhani bulukira m’ntima kusapasambo nkhasa nyakukamba nkhani na ufulu wa kufokotoza manyerezero akufunika.
5. Thangwi yanji kulonga m’njira yakuceza ndi kwakufunika, na tinakwanisa tani kusakulira ntundu unoyu? [be tsa. 179 ndima 4, bokosi; tsa. 180, bokosi] Ntundu wa kulonga m’njira yakuceza usacitisa anthu kukhala aufulu na kuaphedza kutawira pinalonga ife. Tinakwanisa kusakulira nkhaliro unoyu m’kucalira kulonga mafraze akunensa na m’kukhonda kuphatisira mafala ninga mudalembwa iwo. Munalonga ife kubulukira m’ntima na kunyerezera kufunika kwa mphangwa zathu, tayu kwa ife ene, malongero athu akuceza anadzaenda kutsogolo.
NKHANI N.° 1
6. Kodi m’bale anapaswa nkhani ya ntsonga za kuleri Biblya kwa sumana na sumana asafunika kukhunganya tani? [be tsa. 47 ndima 3-4] Pingakwanisika, iye asafunika kuleri mwanyapantsi phindi ya Biblya yakusankhulwa pakusala sumana ibodzi peno mazinji. Buluka penepo iye asafunika kuphembera na kunyerezera mpingo na pyakufunika pyawo. M’kudinga pidabuluswa pinafokotoza mavesi adasankhula iye kugomezera, munthu adapaswa nkhani ya ntsonga za Biblya anakwanisa kugumana ntsonga zinafokotoza mwadidi nkhani, mafokotozero a kukwanirisika kwa maprofesiya, kuona pinapangiza malemba anango pya Yahova, peno mafokotozero a midida.
7. Kodi ndi ninji cakufunika kakamwe pa ntsembe ya Kristu kupiringana nkhombo zinatambira ife kubulukira mwa iyo? [w05 1/11 tsa. 14 ndima 1] Cinthu cikulu kakamwe ca ntsembe si maphindu anatambira anthu kubulukira mwa iyo tayu. Cinthu cikulu kakamwe ndi pidacita ntsembe ya Kristu ku dzina ya Yahova. Iyo yapangiza kuti Yahova ndi Mulungu wa ulungami wadidi wakukwanisa kutsalakana anthu akudawa na wakupitiriza kukhala wakucena na waungwiro.
8. Kodi mithonyeso ya Malemba isafunika kuphatisirwa tani m’nkhani yapakweca? [be tsa. 53 ndima 1-2] Si malemba onsene akusowa mafala m’tsamba ya nkhani anafunika kulerwi peno kufokotozwa nkati mwa nkhani yapakweca tayu. Pa kukhunganya, nyakukamba nkhani asafunika kudinga lemba ibodzi na ibodzi yakusowa mafala na kusankhula adidi kwa anyakubvesera ace. Pa kulonga mafala akutoma mbasati kuleri malemba, iye asafunika kupangiza thangwi yanji iwo aphatisirwa. Pakumala kuleri lemba, nyakukamba nkhani asafunika kusiya Biblya yace yakufungula munafokotoza iye, kulonga citsanzo na kuonesa maphatisiro a lemba.
9. Kodi cifuno ca Yezu cikhali cipi ninga mpfunzisi, na tinakwanisa tani kunsangizira? [be tsa. 57 ndima 1] Cifuno ca Yezu cikhali kulemedza Yahova, tayu kupangizika. (Jwau 7:16-18) Iye akulumiza atowereri ace: “Cheza chanu chioneke pa maso pa anthu towera iwo na kuona machitiro anu adidi, asimbe Baba wanu ali kudzulu.” (Mat. 5:16) Natenepa pa kusankhula pinafuna ife kulonga peno kupilonga kwace, tisafunika kubvunzika: ‘Kodi pyenepi pinapereka takhuta kwa Yahova, peno pinacitisa anthu kunyerezera kakamwe ine?’
10. Thangwi yanji ndi kwakufunika kusiyanisa mwadidi pinthu pakupfunzisa? [be tsa. 57 ndima 3-4] Towera munthu akhale nyakupfunza wandimomwene wa Kristu, asafunika kubvesesa mwadidi pinapfunziswa iye. Iye asafunika kubva na kuona kuti undimomwene wasiyana tani na pikhulupiro pinango. Kulandanisa pinthu kusaphedza kufikira pyenepi. Mwakubwereza-bwereza, Yahova akulumiza anthu ace “kudzindikira [peno kusiyanisa]” pakati pa cakucena na cakuipa. (Lev. 10:9-11) Iye alonga kuti ale anafuna kudzaphata basa m’templo yace Ikulu yauzimu anadzapfunzisa anthu “kusiyanisa pyakuchena na pyakukhonda kuchena, pya mukho [peno pyakuipa] na pyakukhonda kukhala pya mukho.” (Ezek. 44:23) Natenepa kuphatisira kusiyanisa pinthu kusapangiza cipfunziso cakusiyana.
KULERI BIBLYA KWA SUMANA NA SUMANA
11. Kodi tinakwanisa tani kuwangisira kuphatisira uphungu unagumanika pa Yeremiya 6:16 towera kufamba ‘m’njira yadidi yakupasa ntendere’? Tinakwanisa kucita pyenepi m’kuphatisira mwakukhulupirika “mapfundisiro adidi [‘citsanzo ca mafala akuphindulisa,’ NM”] cidakhazikiswa na Yezu na cidatsidzikizwa na “mbandazi wakukhulupirika na wanzeru.” (2 Tim. 1:13; Mat. 24:45-47, Mphangwa Zadidi) Munaphatisira ife mwakucepeseka uphungu wakubuluka m’Biblya na mabukhu anafokotoza pya Biblya, tisafamba na Mulungu ‘m’njira yadidi yakupasa ntendere.’ [12 za nthanda ya Murope, w05 1/11 tsa. 23-4]
12. Thangwi yanji Yahova asankhula nyanswankhazi ninga pfunziro yadidi kwa Ayuda okhonda khulupira, na tinakwanisa kupfunzanji ku pyenepi? (Yer. 8:7) Dzina ya Ciheberu ya mbalame ineyi isabveka “munthu wakukhulupirika; munthu anapangiza udidi.” Mwakusiyana na mbalame zizinji, anyanswankhazi amuna na akazi asakhala na akazawo na amunawo m’umaso wawo onsene. Iwo onsene asakhalira mazai na asadyesa anajinya awo. Pfunziro ya Aisraele okhonda khulupira isafunika kukumbusa Akristu lero kufunika kwa kukhala akukhulupirika pa banja na m’uxamwali wathu na Mulungu. [19 za nthanda ya Murope, w02 1/8 tsa. 32]
13. Kodi tina phatisira tani Yeremiya 15:17 m’maonero athu a ubalangazi lero? Yeremiya akhadziwa kuti akhakhala maso m’nzidzi wakunensa na kufunika kakamwe kwa kukwanirisa basa yace. Ntsiku zace nee zikhali nzidzi wa kudzudzumika na ubalangazi tayu. Akristu lero asamwaza mphangwa za kutonga miseru kwakucimbiza kwa makhaliro ano a pinthu pabodzi na mphangwa za cidikhiro. (Mat. 24:14; 2 Ped. 3:13) Uno si nzidzi wa kuikha ubalangazi na masenzekero pa mbuto yakutoma m’umaso wathu tayu. [26 za nthanda ya Murope, w92 15/8 tsa. 17 ndima 8-9]
14. Kodi ndi m’njira ipi anthu akhala ninga dongo m’manja mwa Nyakuumba dongo Wankulu, Yahova? (Yer. 18:5-11) Tenepa ninga nyakuumba dongo ali na mphambvu yakucita pinafuna iye na dongo mwakubverana na cifuno cace, Yahova ali na mphambvu kwa anthu, adacitwa kubulukira ku pfumbi. (vesi 6) Yahova angakwanise kucinja matsalakaniro ace anthu munatawira iwo peno kukhonda mafala na citsogolero cace. (vesi 7-10) Natenepa, tisafunika kukhala akucepeseka na akufuna kungonjera citsogolero towera kuumbiwa na cifuniro cadidi mbuto mwa kukhonda cifuno ca Nyakuumba dongo Wankulu, mbatikhondwa basi ninga dongo yakuuma. (vesi 11) [2 za nthanda ya Bwinja, w99 1/4 tsa. 22; w80 1/2 tsa. 20-1]
15. Kodi undandaliki wa madzinza unagumanika pa Yeremiya 25:17-26 usabvekanji kwa ife lero? Yeremiya 25:17-26 isapangiza kulandana na Apokalipse kapitulu 18 mpaka 20 m’kufokotoza mwapakweca undandaliki wa pinthu m’nzidzi ukhatsitswa ndiko yaukali ya Yahova. Tenepa ninga Ayuda okhonda khulupira, Aejito na “mambo wa ku Babilone” amwa ndiko yaukali, natenepa Babilonya Wankulu (kuphataniza Cikristu caunthawatawa), mphambvu za ndale za dziko, na pakumalisira Sathani ene anadzayang’anisana na kutonga miseru kwakulungama kwa Yahova kunabwera ntsogolo mokhonda dembuka. [16 za nthanda ya Bwinja, w94 1/3 tsa. 20 ndima 13-14]