Gulu Yakucita Cifuno Ca Yahova,
tsamba 59-77
NSOLO 7
MISONKHANO ‘INAPANGIZA KUFUNA NA MABASA ADIDI’
MBAKUTHEMA tani masasanyiro adacitwa towera Akristu agumanyikane m’nzidzi onsene towera kulambira na kudya mwauzimu! Ndi pyakufunika kwa ife tonsene kugumanyikana pabodzi towera kubvesera Mafala a Mulungu, kupfunza pipfunziso pyace na njira inafunika ife kuntumikira. Pyenepi pisaphataniza ana na akulu, ninga pidacita anthu akale adapita ncibverano na Mulungu, mbumba ya Israele. Mwakubverana na Phwando ya Misasa ya caka cacinomwe consene, Yahova apanga mbumba kubulukira kwa Mose: “[Gumanyisa] onsene, amuna na akazi, na pyana, na afambi anakhala m’midzinda yanu, towera kuti abve mbafundza, mbagopa Mulungu Mbuya wanu, mbachita mafala onsene a mwambo uyu.”—Deut. 31:12.
Mwapakweca, cifuniro ca kugumanyikana pabodzi cincino, ninga kale, ndi towera kubvesera, kupfunza na ‘kupfunziswa’ na Yahova. (Iza. 54:13) Kugumanyikana towera kulambira m’Israele wakale kukhali kwakutsanzayisa m’nzidzi onsene, ninga pyapangizwa m’mafala a Davide, adalemba: “Ndasekera maningi na kubva kuti tinenda ku nyumba ya Mbuya!” (Sal. 122:1) Mpostolo Paulu alonga thangwi yakuthimizirika ya kukomerwa munagumanyikana ife na alambiri anzathu. Iye alemba: “Tioneranembo mbatiphedzana, towera munthu munthu apangize kufuna kwache mbachita mabasa adidi” (Aheb. 10:24, Mphangwa Zadidi) Misonkhano yampingo yapasa Akristu a m’nzidzi wakutoma mwai wa kudziwana unango na nzace, towera kuwangisana na kugumana mphambvu kubulukira m’kugumanyikana. Pyenepi pisacitikambo kwa Mboni za Yahova lero angagumanyikana towera kulambira Yahova.
MISONKHANO YAMPINGO
Biblya isagomezera kufunika kwa kugumanyikana pabodzi towera kulambira na kukuza Yahova. (Sal. 26:8, 12; Mat. 18:20) Onsene adatambira undimomwene pa Pentekoste wa 33 E.C. hadatsalakana cinthu ceneci mwadzenda tayu. Iwo apitiriza kubva okhene pipfunziso pya apostolo, na “Ntsiku zonsene akhakhala pabodzi pene mu templu, mbabverana pyadidi.” (Mach. 2:42, 46) M’kupita kwa nzidzi, mukhagumanyikana Akristu towera kulambira, iwo akhaleri pyakulembwa pyakupepeserwa, kuphataniza matsamba akulembwa na apostolo na anyakupfunza anango Acikristu. (1 Akor. 1:1, 2; Akol. 4:16; 1 Ates. 1:1; Tgo. 1:1) Pakhalimbo maphembero a mpingo. (Mach. 4:24-29; 20:36) M’midzidzi inango, pyakugumana napyo m’utumiki wa umisionario pikhalongwa. (Mach. 11:5-18; 14:27, 28) Pakhadingwa pipfunziso pya Biblya na kukwaniriswa kwa maprofesiya akupepeserwa. Anthu akhapfunziswa makhaliro akutawirika kwa Akristu na kuperekeka kwa Mulungu. Onsene akhawangiswa towera kumwaza mphangwa zadidi mwaphinga.—Arom. 10:9, 10; 1 Akor. 11:23-26; 15:58; Aef. 5:1-33.
M’ntsiku zathu zino misonkhano Yacikristu m’njira zizinji isatowezera citsanzo cidasiiwa m’ntsiku za apostolo. Tisatawira cenjezo ya kupepeserwa inagumanika pa Ahebere 10:25 yakuti ‘anthu anango adzolowera kujomba misonkhano ya akristu. Ipi si pyadidi tayu. Tisafunika kuti tiwangisane, makamaka munaona ife kuti ntsiku inabwera Mbuya, iri duzi.’ M’ntsiku zino zakunensa zakumalisa za makhaliro akuipa a pinthu, tisafuna ciwangiso cakuthimizira cinabwera m’kugumanyikana pabodzi m’nzidzi onsene na cifuno ca kupitiriza kukhala na mphambvu yauzimu na umumphu Wacikristu. (Arom. 1:11, 12) Ninga m’ntsiku za Paulu, Akristu lero asakhala pakati pa ubalwi wakuipa na wakudinganyika. Tisafunika kukhonda uipi na nzimu wa dziko wa makhaliro ano a pinthu. (Afil. 2:15, 16; Tito 2:12-14) Mwandimomwene, kodi ndi kupi kunafuna ife kukhala kusiapo kugumanyikana na anthu a Yahova? (Sal. 84:10) Na kodi ndi ninji cinakhala cakuphindulisa kakamwe kusiyapo kubvesera Mafala a Mulungu?
Yahova ndi Ncera wa cakudya cauzimu cakuinjipa cakukomeresa. (Sal. 145:14, 15) Kubulukira kwa Mwana wace na kwa “Mbandazi wakukhulupirika na wanzeru,” cisaperekwa cakudya m’nzidzi waco. (Mat. 24:45, MZ) Kodi asaperekwa tani masasanyiro anewa kwa ciwalo cibodzi na cibodzi m’gulu? Njira ibodzi ndi misonkhano yakusiyana-siyana inacitwa pa sumana ibodzi na ibodzi pa mpingo. Kudinga misonkhano ineyi na maphindu anagumana ife m’nzidzi onsene pisatikulumiza ‘kupangiza kufuna unango na nzace na mabasa adidi.’
PFUNZIRO YA A SENTINELA
A Sentinela inadziwisa Umambo wa Yahova ndi njira ikulu ya kudyesa mwadidi anthu a Yahova cakudya cauzimu m’nzidzi wakuthema. Misolo inango inagumanika m’A Sentinela isakhunganywa makamaka towera kupfunzwa pa mpingo sumana na sumana, na isakhala na cipfunziso cakupambulika cakubuluswa m’Mafala akulembwa a Mulungu. Mphangwa zakudingwa mwacidikhodikho m’Pfunziro ya A Sentinela zisakulumiza mitima na manyerezero a piwalo pya mpingo na kuwangisa mphambvu yawo yauzimu.
Mphangwa za misolo ya pfunziro ndi zakusiyana-siyana. Kazinji kene mphangwa zenezi zisafokotoza mwakubverana na maphatisiro a midida ya Biblya m’umaso wa ntsiku na ntsiku na kuwangisa Akristu towera kuthimbana na “nzimu wa anthu a pantsi pano” na makhaliro akuipa. (1 Akor. 2:12) Kubulukira ku misolo ya A Sentinela cisapereka kakamwe ceza ca pipfunziso pya Biblya na kukwaniriswa kwa profesiya inacitisa Yahova kudziwika, pyenepi pisaphedza onsene kukhala pabodzi m’undimomwene na kukhala m’njira ya anyakulungama. (Sal. 97:11; Mis. 4:18) Kugumanika pa Pfunziro ya A Sentinela na kutawira kunatiphedza kukomerwa na cidikhiro ca makhaliro mapswa a pinthu akulungama a Yahova. (Arom. 12:12; 2 Ped. 3:13) Kusatiphedza kupangiza misapo yauzimu m’umaso wathu na kuwangisa cifuno cathu ca kutumikira Yahova mwaphinga. (Agal. 5:22, 23, MZ) Kusatiphedzambo kuwangisa cikhulupiro cathu towera kupirira nyatwa na kukhala na ‘upfumi wakuwanga wa kutsogolo towera tifikire moyo wakukhonda kumala.’—1 Tim. 6:19; 1 Ped. 1:6, 7.
Mphyakuoneka pakweca kuti mphangwa zinadingwa sumana na sumana m’Pfunziro ya A Sentinela ndi zakufunika kakamwe. Zisatiphedza towera kukula mwauzimu,na kucitisa undimomwene wa Mafala a Yahova kukhala wathu ene, kubveranisa umaso wathu na mapfunzisiro a Biblya, na kukhala akubverana mwauzimu na abale athu pa dziko yonsene ya pantsi. Kodi m’bodzi na m’bodzi anakwanisa kucitanji towera kuphindula mwakukwana na masasanyiro anewa a cakudya cauzimu? Kukhunganya pfunziro mwanyapantsi, kuleri malemba onsene akusowa mafala m’ndima, na kutawira pa nsonkhano. Kucita khundu kweneku kunadzaphedza kubvesa mwadidi ntsonga zinapfunza ife, na kunadzakhomera undimomwene m’ntima wathu. M’nzidzi ubodziene, anango asaphindula munabva iwo mafala athu a cikhulupiro na cidikhiro. Kubvesera mwacidikhodikho matawiro awo kunadzatiphedza kuphindula kakamwe na pfunziro ya sumana na sumana.
Pfunziro ya A Sentinela isatiphedza kupitiriza kukhala na mphambvu yauzimu na akuwanga m’cikhulupiro. Pyenepi nee pisafunika kuoniwa ninga pyadzenda tayu. Nee m’bodzi asafunika kuluza masasanyiro anewa akufunika adacita Yahova towera kuwangisa onsene anagumanyikana na banja yacikhulupiro.
NSONKHANO WAPAKWECA
Nsonkhano Wapakweca kazinji kene usacitwa pabodzi na Pfunziro ya A Sentinela pa sumana, mbwenye usasiyana m’njira ya kupereka mphangwa. Pfunziro ya A Sentinela isacitwa na mabvunzo na matawiro akuperekwa na anyakubvesera, Nsonkhano Wapakweca ndi nkhani inafokotoza ntsonga ya Biblya. Misonkhano ineyi isakwanirisa khundu yakufunika kakamwe m’kupasa pifuno pyauzimu kwa anthu apswa na piwalo pya mpingo.—Mach. 18:4; 19:9, 10.
M’kucemerera anthu akufuna na anango onsene, tinaphedza anthu azinji kudziwa pipfunziso pyakutoma pya Biblya. Nsonkhano Wapakweca usaphedza anthu onsene kukhala akulindira m’pipfunziso Pyacikristu na kuawangisa kukhala a mphambvu m’basa ya Umambo.
Mphangwa zinadingwa m’Nsonkhano Wapakweca ndi zakusiyana-siyana. Nkhani zenezi zisafokotoza pipfunziso na maprofesiya a Biblya pabodzi na midida ya Biblya na uphungu wa umaso wa banja, pinthu pya ukwati, pinthu pinathimbana na aphale na atsikana, na makhaliro adidi a Nkristu. Nkhani zinango zisafokotoza makamaka mabasa akudzumisa a pyakucitwa pya Yahova. Nkhani zinangombo zisafokotoza pitsanzo pya cikhulupiro, cipapo, na umumphu wa anthu akusiyana-siyana analongwa m’Biblya, mbizithonya pipfunziso pya m’ntsiku zathu. Nsonkhano Wapakweca mwandimomwene ndi nzidzi wa kutambira mphangwa na cakudya cakukomeresa cauzimu.
Khala tisafuna kuphindula mwakukwana na masasanyiro a Nsonkhano Wapakweca, mphyakufunika kugumanika mokhonda phonya, kubvesera mwadidi, kuleri malemba analongwa na nyakukamba nkhani na kuntowezera munaleri iye na kuafokotoza. (Luka 8:18) Pyenepi pinadzatiphedza kukhala akudziwa kugumana mabukhu a m’Biblya na kuthimizira cidziwiso cathu ca Malemba. Munakhulupira ife pinafokotozwa, tisafunika kukhala akutonga kucita pinthu pinapfunza ife na kupiphatisira m’umaso wathu.—1 Ates. 5:21.
Khala pa mpingo pana anyakukamba nkhani akukwana, mwakukhonda penula panaoneka nkhani yapakweca masumana onsene. Kazinji kene, pyenepi pisakwanisika m’kucemera anyakukamba nkhani acilendo a mipingo yapaduzi. Khala pa cisa pana anyakukamba nkhani akucepa, pasacitwa masasanyiro towera nkhani zenezi zicitwe paduzi-duzi pingakwanisika.
Kristu Yezu, anyakupfunza ace na anzawo anango acita misonkhano yapakweca yakulandana na inacitwa lero na mipingo ya Mboni za Yahova. Mwakukhonda penula, Yezu akhali nyakukamba nkhani yapakweca wankulu adakhalapo pa dziko yapantsi. Kwa iye pyalongwa kuti: “Chipo na chipo munthu alonga ninga munalonga munthu uyu.” (Jwau 7:46) Yezu akhalonga ninga munthu wa mphambvu, mbadzumisa anyakubvesera ace. (Mat. 7:28) Ale adabvesera mphangwa zace akhala na maphindu mazinji. (Mat. 13:16, 17) Apostolo atowerera citsanzo cace. Pa Machitiro 2:22-36, tisaleri nkhani yamphambvu ya Pedro pa ntsiku ya Pentekoste wa 33 E.C. Azinji akulumizwa kucita mwakubverana na pidabva iwo. M’kupita kwa nzidzi, anthu aphindula na nkhani ya Paulu ku Atena. (Mach. 17:22-34) M’njira ibodzibodzi, pikwi na pikwi pya anthu m’nzidzi wathu pyaphindula kubulukira ku Misonkhano Yapakweca inacitwa m’mipingo ninga nkhani zapakweca zinacitwa pa misonkhano yapacisa na misonkhano ya gawo, ya m’dziko na misonkhano ya gawo ya madziko akunja. Tisafunika kuphedza kakamwe masasanyiro a Misonkhano Yapakweca.