“Ine Nkhabe Funa”
1 Unoyu ndi ntawiro wa athu azinji ku mphangwa zathu m’pisa pinango. Kodi ndi ninji pinafuna kudzatiphedza kucalira kukhala wakufewa munagumana ife anthu akukhonda kutawira m’cisa? Kodi tinacitanji towera kukwanisa kusisimula kufuna ku mphangwa zadidi?
2 Pitirizani Kukhala Wakukomerwa: Kukumbukira thangwi yanji anthu azinji asakhonda kunadzatiphedza kupitiriza kukhala wakukomerwa. Anthu adapfunziswa cipfunziso ca kusanduka peno adakuzwa m’mbumba yakukhonda kukhalapo kwa Mulungu panango angaone Biblya kukhala yakusowa basa. Panango anango aipirwa na ufakafaka udaona iwo m’uphemberi. Kwa anango, kukhonda kwawo kungapangize kuipirwa kwawo na kusowa cidikhiro. (Aef. 2:12) Anango nee ‘asanyerezera cinthu’ thangwi iwo ali akutsukwala na pidzudzumiso pya umaso.—Mat. 24:37-39.
3 Mwakukhonda tsalakana kukhonda funa kwa anango, tinakwanisa kukomerwa m’utumiki, na kudziwa kuti kuwangisira kwathu kusalemedza Yahova. (1 Ped. 4:11) Mwakuthimizira, kulonga pya undimomwene ngakhale kwa ale akuti nkhabe kuutawira, kusawangisa cikhulupiro cathu. Tendeni tiwangisire kuona anthu a m’cisa m’maonero a Yahova. Iye abvera ntsisi anthu a Ninive “akukhonda [kudziwa] kusiyanisa pyadidi na pyakuipa.” (Yona 4:11) Anthu anakhala m’cisa cathu asafunika kutambira mphangwa zadidi! Natenepa, nee tisafunika kusiya mbwenye tisafunika kusaka njira towera kusisimula kufuna kwawo ku mphangwa za Biblya.
4 Longani Pyakucitika Pyapacisa: Panango munakwanisa kulonga pinthu pidacitika pacisa m’mafala anu akutoma na kuphemba mwanaciro nyumba kulonga maonero ace. Bveserani munalonga iye, buluka penepo mpangizeni mphangwa zakuthondolesa za Biblya m’kuntawira maonero ace. Pakumala citika cidengwa pacisa, Mboni ibodzi yalonga kutsukwala kwace kwandimomwene pa nsuwo ubodzi na ubodzi. Iye alonga: “Mwakudzidzimusa, anthu atoma kulonga. Ndakhala na makani adidi mazinji m’ntsiku ineyi thangwi ndapangiza kufuna ku mabanja awo.”
5 Nyatwa ibodzi na ibodzi inathimbana na anthu inadzamaliswa na Umambo wa Mulungu. Yeserani kudzindikira nyatwa zinadzudzumisa kakamwe mwanaciro nyumba. Iye angakwanise kukutawirisani kufokotoza mphangwa za cidikhiro ca Biblya. Khala nkhabe, iye panango angafune ‘kukubvani pontho kulonga.’—Mach. 17:32.