Kufuna—Njira Ya Utumiki Wakubala Misapo

¹ “Bwerani kuna ine, . . . inembo ndinadzakupumisani.” (Mat. 11:28) Mafala anewa akutsanzayisa asapangiza kufuna kukulu kukhali na Yezu kwa anthu. Ninga atumiki Acikristu, tisafuna kutowerera Yezu m’kupangiza kufuna kwathu anthu akuti ndi akuneta na dziko yakusowa kufuna. Kodi tinakwanisa tani kupangiza kufuna anthu m’basa yathu ya kumwaza mphangwa zadidi?

² M’mafala: Kufuna anthu kwakulumiza Yezu kubanza mwai onsene towera kugawana na anango mphangwa zadidi. (Jwau 4:7-14) Kufuna kunadzatiphedza kukhonda kunyinyirika kupereka umboni wantsusukano. Ntsikana unango wa piaka pitanthatu pyakubalwa apereka umboni wadidi kwa nkazi akhakhala ku khundu yace pa mbuto inadikhira atenda kuti akonzwe. Kodi thangwi yanji iye akulumizika kucita pyenepi? Iye alonga: “Nkazi akhaoneka ninga akhafuna kudziwa pya Yahova.”

³ Ife tinakwanisa kupangiza kufuna kwathu anthu na cifuno candimomwene, m’kuamwetulira mwadidi na malongero auxamwali. Kubvesera mwadidi matawiro a anango, kudzindikira pidzudzumiso pyawo, na kupangiza citsalakano candimomwene ca munthu m’njira ibodzibodzi mbitipangiza kufuna. (Mis. 15:23) M’kutowerera Yezu, ife tisafunika kugomezera mphangwa za Umambo zakuwangisa na kufuna kwa ntsisi kwa Yahova kwa anthu.—Mat. 24:14; Luka 4:18.

⁴ M’kucita Pinthu: Yezu akhali wantsisi m’pyakufuna pya anango m’njira zakuphata basa. (Mat. 15:32) Tingakwanisembo kukhala na miyai towera kucita mabasa akufuna mwakukoma ntima m’nzidzi unakhala ife mmunda. Mulongo m’bodzi aona nkazi unango mbanenseka kubvesesa mafala akufunika m’ntokodzi. Mulongo wathu aperekeka towera kumphedza m’kuthumburuza mafala a munthu akhammenyera ntokodzi. Ncitiro unoyu wakufuna wafungula njira towera kuceza pya Biblya kudacitisa nkazi unoyu kutawira pfunziro ya Biblya. M’cakucitika cinango, m’bale unango akhacita ulendo wakubwerezera agumana mwanaciro nyumba wakuipirwa, thangwi acimwana kupitisa pa nsuwo mpando wa sofaa wakulemera. Pakumala kumphedza, mwakukhonda dembuka m’bale akhala pa mpando udaphedza iye kupitisa mbatomesa pfunziro ya Biblya na mamuna unoyu wakupereka takhuta.

⁵ Munacita ife khundu m’utumiki, tisapangiza kufuna kwathu Mulungu na nyakuendekana wathu. (Mat. 22:36-40) Pipangizo pyenepi m’mafala na pyakucita pisaphedza anthu akuona ntima kudzindikira kuti tiri na undimomwene.