Gulu Yakucita Cifuno Ca Yahova,

tsamba 21-27

NSOLO 4

MAKHUNGANYIRO NA MAFAMBISIRO A MPINGO

M’TSAMBA yace yakutoma kuli Akorinto, mpostolo Paulu alonga undimomwene wakufunika kakamwe wa pya Mulungu m’kulonga tenepa: “Mulungu nkhabe funa kuti tikhale mwakuvunganyikana tayu, mbwenye mwantendere.” Buluka penepo, m’kulonga pya misonkhano ya mpingo, iye ati: “Pinthu pyonsene pichitwe mwakuthema pontho mwakundendemera.”​​—⁠1 Akor. 14:​33, 40, Chiverano Chachinchino.

Pakutoma pene pa tsamba ineyi, mpostolo Paulu acenjeza pya kugawana kudabva iye kwakuti kukhaoneka ku mpingo wa ku Korinto. Paulu adembeterera abale a kweneku kuti ‘abverane m’pyonsene pinalonga iwo’ na “[akhale] na ntima ubodzi ene na manyerezerombo mabodzi ene!” (1 Akor. 1:​10, 11, Mphangwa Zadidi) Buluka penepo iye apereka uphungu ku pinthu pyakusiyana-siyana pyakuti pikhakhuya mwakuipa kuphatana kwa mpingo. M’kuphatisira nsanje wa manungo a munthu, iye apangiza mwapakweca kufunika kwa kuphatana na kubverana. Na thangwi ineyi, iye adembetera Akristu onsene a m’mpingo, mokhonda tsalakana mabasa awo, kuti atsalakanane m’njira yakufuna. (1 Akor. 12:​12-​26) Kubverana mwadidi kweneku kunaoneka pakati pa piwalo pya mpingo kusapangiza kufunika kwa masasanyiro akundendemera​​—⁠gulu.

Kodi wakhunganywa tani mphapo mpingo Wacikristu? Kodi mbudakhunganywa na ani? Kodi mbudakhala na makhaliro api, na mbani akhafuna kutumikira m’mbuto zakuikhwa? Tingatawirisa kutsogolerwa na Biblya tinagumana matawiro akubveka mwadidi.​​—⁠1 Akor. 4:⁠6.

KUKHUNGANYWA MWAKUBVERANA NA MATONGERO A MULUNGU

Mpingo Wacikristu wakhazikiswa pa ntsiku ya phwando Yaciyuda ya Pentekoste pa 33 E.C. Kodi tinakwanisa kupfunzanji pya mpingo wa nzidzi unoyu? Mpingo ukhakhunganywa na kufambiswa mwakubverana na matongero a Mulungu. Cakulembwa cakupumirwa cidacitika m’Yerusalemu cifupi na piaka 2.000 ndulimu, cisapangiza mwapakweca kuti mpingo unoyu wa Akristu akudzodzwa wakhazikiswa na Mulungu. (Mach. 2:​1-​47) Unoyu ukhali nyumba yace, banja yace. (1 Akor. 3:⁠9; Aef. 2:​19) Mpingo Wacikristu wa Mulungu lero, wakuti wathimizirika na “[mwinji] ukulu” usatowerera midida ibodzibodzi ya kukhunganya na kufambisa idakhazikiswa m’piaka dzana yakutoma.​​—⁠Apok. 7:​9, 10.

Mpingo wa piaka dzana yakutoma watoma na anthu akukwana 120. Nzimu wakucena wakhutulwa pakutoma kwa anthu anewa m’kukwanirisa Yoele 2:​28, 29. (Mach. 2:​16-​18) Mbwenye m’ntsiku ibodzi ene, anthu anango akukwana 3.000 abatizwa m’madzi na acita nkhundu ya mpingo udabalwa na nzimu. Iwo atawira mafala akulonga pya Kristu na “hakhaleka kubva mafala a apos­tolo tayu.” Buluka penepo, “Mulungu [anjipisa] ntsiku zonsene anthu akhatoweza njira ya chipulumuso.”​​—⁠Mach. 2:​41, 42, 47.

Mpingo wa akudzodzwa ku Yerusalemu wadzakula kakamwe kwakuti nyantsembe wankulu Waciyuda adungunya kuti anyakupfunza adzadza Yerusalemu na cipfunziso cawo. Anyakupfunza apswa a m’Yerusalemu kuphataniza anyantsembe azinji Aciyuda, adzacita khundu ya mpingo.​​—⁠Mach. 5:​28; 6:⁠7.

Yezu alonga: “[Munadzakhala] amboni anga ku Yeruzalemu, ku Yudeya kwonsene, ku Samariya na ku nkhomo ya madziko onsene.” (Mach. 1:⁠8) Pyenepi pyacitikadi. Mudamala Estevau kuphiwa, watoma ntcingo ukulu m’Yerusalemu na anyakupfunza akhakhala mwenemo amwazikira ku Yudeya na Samariya. Mbwenye konsene kukhathawira iwo, iwo akhapitiriza na kumwaza mphangwa zadidi na kucita anyakupfunza, kuphataniza anango a Asamariya. (Mach. 8:​1-​13) M’kupita kwa nzidzi, mphangwa zadidi zatoma kumwazwa na maphindu adidi kwa anthu okhonda kusidzwa, a madzinza okhonda khala Aciyuda. (Mach. 10:​1-​48) Basa ineyi yonsene ya kumwaza mphangwa na kucita anyakupfunza azinji yacitisa mipingo ipswa Yacikristu kumangwa kunja kwa Yerusalemu.​​—⁠Mach. 11:​19-​21; 14:​21-​23.

Kodi ndi masasanyiro api adacitwa towera mpingo onsene upswa wakukhazikiswa ukhunganywe na ufambiswe mwakubverana na matongero a Mulungu? Kubulukira ku mphambvu ya nzimu wa Mulungu, masasanyiro acitwa towera akumbizi ang’ono atsalakane nkumbi. M’mipingo idacezera Paulu na Bernabe pa ulendo wawo wakutoma wa umisionario, iwo aikha amuna towera atumikire ninga akulu a mpingo. (Mach. 14:​23) Machitiro kapitulu 20 asafokotoza mphangwa za nsonkhano udacita mpostolo Paulu na akulu a mpingo ku Aefesi. Paulu alonga kwa iwo: “Muchenjere, mbamuonera nkumbi wonsene, thangwi Nzimu Wakuchena wakukhalisani akulu, towera mutonge igreja yonsene ya Mulungu, idagula iye na chiropa chache [“cha Mwanache,” MZ].” (Mach. 20:​28) Pyenepi pisabveka akulu m’njira yauzimu. Iwo aikhwa towera kucita basa ineyi thangwi akwanirisa pinaphemba Biblya. (1 Tim. 3:​1-⁠7) Tito nzace wa basa wa Paulu atawiriswa kuikha atsogoleri a mpingo ku mpingo wa ku Kareta.​​—⁠Tito 1:​5, MZ.

Mukhakhazikiswa mipingo mizinji, apos­tolo na akulu a mpingo m’Yerusalemu akhapitiriza kutumikira ninga ayang’aniri akutoma a mpingo wakuthimizirika wa dziko yonsene m’piaka dzana yakutoma. Iwo akhatumikira ninga mathubo akutonga a mpingo onsene Wacikristu.

M’kulembera mpingo wa ku Aefesi, mpostolo Paulu afokotoza kuti m’kuphata basa mwakubverana na nzimu wa Mulungu, mpingo Wacikristu mbudapitiriza kukhala wakuphatana na wakukhulupirika pantsi pa usolo wa Yezu Kristu. Mpostolo Paulu akulumiza Akristu a ku Aefesi kuti asakulire nzimu wakupicepesa na kukoya ubodzi wa nzimu m’kukhala antendere na piwalo pyonsene pya m’mpingo. (Aef. 4:​1-⁠6) Buluka penepo iye atculula Masalmo 68:​18 na apangiza kuti lemba ineyi isalonga pya masasanyiro a Yahova a kuikha amuna akuthema towera kukwanirisa pyakusowa pya mpingo ninga apostolo, aprofeta, amwazi mphangwa, akumbizi na apfunzisi. Amuna anewa ninga miyoni yakubuluka kwa Yahova, mbadawangisa mpingo onsene kuti ukhale wakukwana mwauzimu towera kukomeresa Mulungu.​​—⁠Aef. 4:​7-​16.

MPINGO WA LERO USATOWERERA MIDIDA YA APOSTOLO

Mipingo yonsene ya Mboni za Yahova isatowerera midida ibodzibodzi ya kukhunganya. Mipingo yonsene pabodzi isacita mpingo ubodzi basi wakuphatana wa pa dziko yonsene yapantsi wakuti phata yace ndi akristu akudzodzwa na nzimu. (Zak. 8:​23) Pyenepi pisakwanisika thangwi Yezu Kristu, m’kukwanirisa pikiro yace, mwakukhulupirika asakhala na anyakupfunza ace akudzodzwa “ntsiku zonsene mpaka kumala kwa pantsi [‘makhaliro a pinthu,’ NM].” Ale anacita khundu ya mpingo wakuthimizirika lero asatawira mphangwa zadidi za Mulungu, asapereka umaso wawo wamumphu kwa Yahova Mulungu towera kucita cifuno cace, na asabatizwa ninga anyakupfunza a Yezu Kristu. (Mat. 28:​19, 20; Mko. 1:​14; Mach. 2:​41) Iwo asadzindikira “nkumbizi wadidi,” Yezu Kristu ninga Nsolo, tayu wa piwalo pya mpingo wakudzodzwa basi mbwenyembo wa nkumbi onsene, unaphataniza “mabira anango.” (Jwau 10:​14, 16; Aef. 1:​22, 23) “Nkumbi ubodzi” unoyu usakoya kuphatana kwawo m’kudzindikira mwakukhulupirika usolo wa Kristu pabodzi na kungonjera “mbandazi wakukhulupirika na wanzeru,” wakusankhulwa na Kristu, wakuti ndi njira inaphatisirwa m’gulu. Tendeni tipitirize kunyindira na kukhulupira mwakukwana nsoka unoyu wa mbandazi wakukhulupirika lero.​​—⁠Mat. 24:​45, MZ.

KUPHATISIRWA KWA PIGAWIKO PYAUPHEMBERI

M’ntsiku zino zakumalisa za makhaliro ano a pinthu akuipa, pinthu pya Mbuya pyathimizirika kakamwe pa dziko yonsene yapantsi. Pyenepi pyacitisa “mbandazi wakukhulupirika” kukhala na basa ikulu kakamwe. Towera kukwanirisa basa yawo ya kupereka cakudya cauzimu m’nzidzi wakuthema na kumwaza mphangwa zadidi za Umambo kumala mbukusati fika, nsoka wa mbandazi wakhazikisa pigawiko pinango pyakutawirika na mwambo. Kukhazikisa pigawiko pinango pyakutawirika na mwambo m’madziko akusiyana-siyana kwakhala kwanzeru. Pigawiko pyenepi pyauphemberi piri na mafabirika akucita na kugawira Mabiblya pabodzi na mabukhu akubuluswa m’Biblya pa dziko yonsene yapantsi anaphatisirwa m’utumiki wa Umambo.

Pigawiko pyenepi pyacitwa basi towera kuendesa kutsogolo pyakufuna pya ulambiri wandimomwene pa dziko yapantsi. Pigawiko pyenepi pyonsene pyakutawirika na mwambo pisaphata basa mwakubverana. Pigawiko pyenepi pyakutawirika na mwambo pisaphatisirwa towera kucitisa kumwaza mphangwa zadidi kwa dziko yonsene yapantsi kukhale kokhonda nensa na kutsalakana pyakufuna pyauzimu pya mpingo onsene wa Mulungu pa dziko yonsene yapantsi.

MAKHUNGANYIRO A FILIALI

Konsene kunakhazikiswa ofesi ya filiali, kusacitwa Komiti ya Filiali yakukhala na akulu atatu peno kupiringana anewa towera kutsalakana mabasa akusiyana-siyana anaphataniza kuonera basa ya dziko ya filiali peno madziko anango akuti ali pantsi pa kuyang’anirwa na filiali ineyi. Ciwalo cibodzi ca komiti cisatumikira ninga muyang’aniri wa Komiti ya Filiali.

Mipingo iri pantsi pa filiali ibodzi na ibodzi isagumanywa m’pisa, na pisa pingasi pisacita gawo. Kukula kwa pisa na magawo kungasiyane mwakubverana na mbuto na cilongero pabodzi na cilengeso ca mipingo yakuyang’anirwa na filiali ineyi. Muyang’aniri wa cisa asaikhwa towera kutumikira mipingo ya cisa cibodzi na cibodzi. Muyang’aniri wa gawo asacezera pisa pyakusiyana-siyana, asatumikira pa misonkhano ya cisa, na m’nzidzi unango asatumikira mipingo, kazinji kene na muyang’aniri wa cisa. Mabasa a ayang’aniri a cisa na a gawo asafokotozwa m’nzidzi na nzidzi m’Utumiki Wathu Wa Umambo pabodzi na m’matsamba anatumizirwa iwo na ofesi ya filiali.

Onsene m’gulu asadzindikira kuti unoyu ndi uyang’aniri wa Mulungu. Mipingo isadziwa na isatawira masasanyiro a gulu akuti aperekwa towera kuphindulisa onsene. Iyo isatawira akulu akuikhwa towera ayang’anire basa m’mafiliali, m’magawo, m’pisa na m’mipingo. Isanyindira “mbandazi wakukhulupirika na wanzeru,” kuti aipase cakudya cauzimu pa nzidzi wakuthema. Ntsiku zino “mbandazi wakukhulupirika,” asangonjera mwandimomwene usolo wa Kristu, asaphatisira midida ya Biblya, na asangonjera utsogoleri wa nzimu wakucena. Onsene angaphata basa pabodzi mwakubverana, iwo asakhala na maphindu mabodzi ene ninga akhali na mipingo ya nzidzi wa piaka dzana yakutoma. Machitiro 16:⁠5 asatipanga kuti: “Kutawira kwa maigreja [peno mpingo] kuawangibswa, anyakutawira athimizambo kuinjipa kwenda na kwenda.”