Gulu Yakucita Cifuno Ca Yahova, tsamba 4-10
TSAMBA YAKUBULUKA KWA MATHUBO AKUTONGA
Atumiki Anzathu Akufunika:
Bukhu ino yakuti Gulu Yakucita Cifuno Ca Yahova yacitirwa Mboni za Yahova. Bukhu ino isapangiza mwapakweca pinafunika ife kucita towera tikomerese Mulungu na kugumana kutsanzaya m’kucita cifuno cace. Iyo isapasambo cithunzithunzi cakukwana ca makhunganyikiro a mpingo Wacikristu towera kucita basa ya Mulungu. Bukhu ineyi isapereka uphungu na citsogolero towera kutiphedza kupitiriza kukhala akuphatana na abale anthu a dziko yonsene yapantsi. (1 Ped. 2:17; 5:9) Iyo isagomezera kuti tinacita tani khundu m’kumwaza mphangwa zadidi za Umambo m’kudzindikira cifuno ca Mulungu cakuti ‘anthu onsene adziwe mapfundisiro adidi.’—1 Tim. 2:4; Mat. 24:14.
Kusiyapo kumwaza mphangwa zadidi za Umambo, tisafunika kupereka ciphedzo cauzimu cakufunika kwa onsene ale adatunduka kwa Yahova m’kutawira ncemerero wa kunkuza mwakuphatana na mbumba yace. (Sal. 145:21; Apok. 22:17) Anthu apswa asafunika adziwe mafambiro a gulu ya Yahova na kudziwa kuti iwo anakwanisa tani kucita khundu m’basa ya kumwaza mphangwa m’nzidzi wathu uno. Iwo akuwangiswa kupitiriza m’kuwangisira kwawo kukwanirisa pinaphembwa m’Malemba towera akhale Mboni zakuperekeka na zakubatizwa za Yahova.
Bukhu ino isafokotoza mphangwa zonsene za kupitawirira kwa akulu a mpingo na atumiki akutumikira, matongero a miseru na pinthu pinango pyakusiyana-siyana pinaphatana na makhunganyiro a mpingo. Unyomonyomo wakubverana na mphangwa zenezi usabuluswa m’midzidzi inango m’A Sentinela, m’Utumiki Wathu Wa Umambo na m’mabukhu anango a Mboni za Yahova.
Phembero yathu ndi yakuti kuphatisira kwanu pinthu pinagumanika m’bukhu ino kukuphedzeni kuenda kutsogolo mwauzimu. Pitirizani kukhala akutsanzaya m’kucita cifuno ca Yahova mwakubverana na mbumba yace yakukhunganyika!
Mathubo Akutonga A Mboni Za Yahova
NSOLO 1
GULU YAKUCITA CIFUNO CA YAHOVA
PA DZIKO yonsene yapantsi, pana pikwi pya magulu a dziko na a madziko akunja. Pakati pa iwo pana magulu mazinji auphemberi, andale, amalonda na akuphedza anthu akuti ali na makhaliro na macitiro akusiyana-siyana. Ngakhale piwalo pyawo pikhale pyakuinjipa peno pyakucepa, ipyo pyakhunganyika mwakubverana na manyerezero na mafilozofiya a anthu. Mbwenye iripo gulu ibodzi yakuti ndi yakusiyana kakamwe na magulu anango onsene. Mafala a Mulungu na umboni uzinji wakunyindirika pisapangiza mwapakweca kuti gulu ineyi si inango tayu mbwenye ndi ya Mboni za Yahova.
Cakukomeresa ndi cakuti imwe ninga Mboni ya Yahova yakuperekeka na yakubatizwa, cincino mukucita khundu ya gulu ya Yahova. Nakuti mwadziwa mwekha kuti ndi cipi cifuno ca Mulungu, imwe cincino muli kucicita. (Sal. 143:10; Arom. 12:2) Imwe ndimwe ntumiki waphinga wa Mulungu na mukutumikira pabodzi na gulu ya dziko yonsene yapantsi ya abale akufunana. (2 Akor. 6:4; 1 Ped. 2:17; 5:9) Ninga Yezu apikira, pyenepi pisakubwereserani nkhombo zizinji m’nzidzi uno. (Mis. 10:22; Mko. 10:30) M’kucita cifuno ca Yahova mwakukhulupirika na mwakuphatana, imwe mukukhunganywa towera kugumana tsogolo yambiri na yokhonda mala.—1 Tim. 6:18, 19; 1 Jwau 2:17.
Ndi kwakuwangisa tani cikhulupiro na kwakuphindulisa kudziwa kuti Nciti wathu Wankulu ali na gulu ya dziko yonsene yapantsi yakusiyana kakamwe! Pyenepi pisabveka kuti iyo isatsogolerwa na Yahova ninga Nsolo wa onsene. Tina cinyindiro cakukwana mwa iye. Iye ndi Mambo wathu, Ntongi wathu na Nbvunuliri peno Nyakutipasa mitemo. (Iza. 33:23, [Iza 33:22, Tradução do Novo Mundo]) Nakuti ndi Mulungu wakundondomera, iye asabveranisa masasanyiro towera tiphate basa mwakubverana na iye m’kucita cifuniro cace.—2 Akor. 6:1, 2.
Na kufendedzera kakamwe kwa kumala kwa makhaliro ano apinthu, tiri kuenda kutsogolo mwakukhulupirika na mwakubvera pantsi pa ntsogoleri wathu adasankhulwa kukhala Ntongi na Mambo Waumesiya, Kristu Yezu. (Iza. 55:4; Apok. 6:2; 11:15) Yezu alongeratu kuti anyakutowerace mbadadzacita pinthu pikulu kupiringana pidacita iye nkati mwa kumwaza kwace mphangwa za Umambo na kucita anyakupfunza pa dziko yapantsi. (Jwau 14:12) Pinthu mbipidakhala tenepa thangwi m’kupita kwa nzidzi uzinji anyakutowera a Yezu mbadapitiriza kuthimizirika mbafika kutali m’dziko yapantsi. Iwo mbadamwaza mphangwa zadidi za Umambo mpaka kunkhomo kwa dziko yonsene yapantsi na kucita anyakupfunza a anthu a madziko onsene.—Mat. 24:14; 28:19, 20, Mphangwa Zadidi; Mach. 1:8.
Pyenepi pyapangiza kale kukhala pyandimomwene, ninga pyalembwa m’Anuário das Testemunhas de Jeová. Natenepa, ninga Yezu alonga mwapakweca, basa ya kumwaza mphangwa zadidi za kutonga miseru kwa Mulungu inadzamala m’nzidzi wakuthonywa na Yahova. Pipangizo pyonsene pya Mafala aciprofesiya a Mulungu asathonya kufendedzera kwa ntsiku ikulu na yakugopswa ya Yahova.—Sof. 1:14-18; 2:2, 3, NM; 1 Ped. 4:7.
M’kudzindikira pinafuna Yahova m’ntsiku zino zakumalisa, gulu yace isacita pinthu mwankhasa. Pana kufunika kwa kuthimizira kuwangisira kwathu m’kucita pinafuna Mulungu. Natenepa, kuti ticite pyenepi tisafunika kudziwa mwadidi mafambiro a gulu ya Mulungu na kucita pinthu mwakuphatana nayo mwakukwana. Mafambiro a gulu ineyi asabuluswa m’midida ya Malemba, kuphataniza matongero, miyambo, mitemo, pitsogolero na pipfunziso pinafokotozwa m’Mafala akupumirwa a Mulungu.—Sal. 19:7-9.
M’kubvera na kutoweza citsogolero ceneci cinagumanika m’Biblya, anthu onsene a Yahova asakhala na asaphata basa pabodzi m’ntendere na mwakuphatana. (Sal. 133:1; Iza. 60:17; Arom. 14:19) Kodi ndi ninji cinawangisa kuphatana kwathu na abale a konsene kwene? Ndi thangwi yakuti tisacita pinthu mwakukulumizwa na kufuna na tisabvala kufuna. (Jwau 13:34, 35; Akol. 3:14) M’njira ineyi yakutawirika pamaso pa Mulungu, tisafamba pabodzi na khundu yakudzulu ya gulu ya Yahova.
KHUNDU YAKUDZULU YA GULU YA YAHOVA
Aprofeta Izaiya, Danyeli na Ezekyele aona masomphenya a khundu yakudzulu ya gulu ya Yahova. (Iza., kap. 6; Ezek., kap. 1; Dan. 7:9, 10) M’njira ibodzibodzi, mpostolo Jwau aonambo masomphenya a makhunganyiro a pinthu pya kudzulu na asatipasa cithunzithunzi ca pyenepi m’bukhu ya Apokalipse. Iye aona Yahova pa mpando wambiri wa umambo pabodzi na aanju akhalonga kuti: “Wakuchena, wakuchena, wakuchena ndi Mbuya, Mulungu wakukwanisa [peno Wamphambvu] pyonsene. Iye akhalipo kale, alipo chinchino, mbadzabwerambo kutsogolo.” (Apok. 4:8) Jwau aonambo “pakati nakati, [pa] mpando, . . mwanabira mbodzi wakulimira.” Unoyu akhali Mwanabira wa Mulungu, Yezu Kristu.—Apok. 5:6, 13, 14; Jwau 1:29.
Masomphenya a Jwau asabveka kuti nsolo wa khundu yakudzulu ya gulu ya Yahova ndi Yahova Mulungu wakuti ali pa mpando wace wa umambo. M’kulonga pya iye na ciimiriro cace cikulu, lemba ya 1 Pya dziko ya Israele [Mbiri] 29:11, 12 isalonga tenepa: “Kuli imwe Mbuya ukulu na ufuni na mbiri na utongi thangwi pyonsene pire kudzulu na pantsi mphyanu. Ndimwe nyakutonga kakamwe, imwe musatonga pinthu pyonsene. Ufumi na mbiri pisabuluka kuna imwe; m’manja mwanu muna mphambvu zakuwangisa na zakukulisa pinthu pyonsene.”
Ninga nyabasa nzace wa Yahova, Yezu Kristu ali pa mbuto yapadzulu kakamwe kudzulu, na apaswa mphambvu ikulu kakamwe. Inde, Mulungu “ayikha pyonsene pantsi pa myendo ya Kristu, mbankhalisa padzulu pa pyonsene, towera akhale nsolo wa igreja [peno mpingo] yonsene.” (Aef. 1:22) Mpostolo Paulu alonga kwa Yezu: “Mulungu ankuza kakamwe, mbanthula dzina [yakupiringana] madzina anango onsene, towera pa kubva dzina ya Yezu, agodame ale a kudzulu, ale a pantsi pano na ale a mu inferno [“pantsi pa mataka,” Chiverano Chachinchino], onsenembo mbabvekese na malirimi awo kuti: Mbuya Yezu Kristu ali mu mbiri ya Mulungu Baba.” (Afil. 2:9-11) Natenepa, tingakwanise kukhala na cinyindiro cikulu ku utsogoleri wakulungama wa Yezu Kristu.
Mprofeta Danyeli aona m’masomphenya Nkulu Wakukhaliratu pa mpando Wace wa umambo na aanju “pikwi na pikwi [akhantumikira], anthumbo anango akukhonda kulengeseka akhaimira patsogolo pache.” (Dan. 7:9, 10) Biblya isalonga pya nkumbi unoyu wakudzulu wa aanju ninga “mizimu yokha inatumikira Mulungu. Mulungu [aatuma] kaphedza ale anapulumubswa.” (Aheb. 1:14, MZ) Pyakucitwa pyenepi pyonsene pyauzimu pyakhunganyika mu “mipando, mautongi, maumambo na mphambvu zonsene.”—Akol. 1:16.
Tingagula nzidzi wa kudinga pinthu pyenepi pya khundu yakudzulu ya gulu ya Yahova, tingakwanise kubvesesa pidacita Izaiya mudaona iye m’masomphenya “Mbuya akhakhala pa mpando,” na “n’khundu mwache [‘padzulu pace,’ NM] mukhaimira anyakudzulu akupisa [peno maserafi].” Izaiya alonga: “Mama ine! Ndafa pyanga, thangwi ndine munthu wakulonga mafala akuipa. Chinchino, na maso anga ene, ndaona Mambo, Mbuya wakukwanisa pyonsene!” Inde, Izaiya agopa na acepeseka pidadziwa iye kukula kwa gulu ya Yahova. Cakucitika ceneci cankhuya kakamwe kwakuti mudabva iye ncemero wakubuluka kudzulu kuti acite basa yakupambulika ya kumwaza mphangwa za kutonga miseru kwa Yahova, Izaiya atawira: “Ine pano ndinenda! Nditumeni!”—Iza. 6:1-5, 8.
Kudzindikira na kupereka takhuta kuli gulu ya Yahova kusakulumiza anthu ace m’njira ibodzibodzi. Munaenda gulu kutsogolo, mwakufuna na mwaphinga tisawangisira kuenda nayo pabodzi. Tisawangisira towera kupangiza kuti tisanyindira gulu ya Yahova lero.
GULU YA YAHOVA IRI KUENDA KUTSOGOLO
M’kapitulu 1 ya profesiya ya Ezekyele, Yahova asapangizwa ninga wakukwira pa gareta ikulu yakudzulu. Gareta ineyi ya mbiri isaphipirisa nkhundu yokhonda oneka ya gulu ya Yahova. Iye asakwira gareta ineyi m’njira yakuti asaitonga mwakukoma ntima na asaiphatisira mwakubverana na cifuniro cace.—Sal. 103:20.
Roda ibodzi na ibodzi ya gareta ineyi iri na roda inango nkati mwayo—ineyi iri na ndida wakulandana yakuti isapitirana na inango. Basi ene m’njira ineyi tingakwanise kulonga kuti maroda ‘asafamba pabodzi pene m’makhundu manai.’ (Ezek. 1:17) Maroda anewa angakwanise kucinja kunaenda iwo pano na pano thangwi iwo ali na khundu yakuzungunuka ku khundu ibodzi na ibodzi. Mbwenye, gareta ineyi nee isafamba mwakusowa ntsogoleri peno muimiriri wanzeru. Yahova nee asasiya gulu yace kuenda konsene kwene kunafuna iyo kuenda tayu. Ezekyele 1:20 asalonga: “Akhatsogolerwa na nzimu ubodzi ene [‘konsene kukhapendamira nzimu kuenda, iwo akhaenda,’ NM].” Natenepa, ndi Yahova anacitisa kuti gulu yace iende konsene kunaicitisa nzimu wace kuenda. Mbvunzo unafunika ife kucitika ndi uyu: ‘Kodi ndisafamba pabodzi na gulu?’
Kufamba pabodzi na gulu ya Yahova kusaphataniza pizinji kupiringana kugumanika basi pa misonkhano na kuenda m’utumiki wa mmunda. Cakutoma, kufamba kwathu pabodzi na gulu kusaphataniza kuenda kutsogolo na kukula mwauzimu. Pyenepi pisaphataniza kupitiriza “kudzindikira [pire] pinakoma [peno pyakufunika] pikulu” na kudya m’nzidzi onsene cakudya cipswa cauzimu cinaperekwa. (Afil. 1:10; 4:8, 9; Jwau 17:3) Tisafunikambo kukumbuka kuti panagumanika gulu pasafunika kubverana mwadidi na kucita pinthu mwakuphatana. Natenepa tisafunika kudziwa kufunika kwa kuphatisira mwadidi pinthu pyauzimu na pyakumanungo pidatinyindira Yahova towera kukwanirisa basa yace. Munafamba ife pabodzi na gareta yakudzulu ya Yahova, umaso wathu usakhala wakubverana na mphangwa zinamwaza ife.
Na ciphedzo ca gulu ya Yahova, tonsene tiri kuenda kutsogolo m’kucita cifuno ca Mulungu. Kumbukani kuti Nyakukwira pa gareta ineyi yakudzulu ndi Yahova. Natenepa, kufamba pabodzi na gareta yakudzulu kusapangiza kuti tisalemedza Yahova na tisanyindira ‘mbvunuliri’ wathu. (Sal. 18:31) Biblya isapikira: “Mbuya anapasa mbumba yache mphambvu, Mbuya anaipasa chidzo [peno nkhombo] na ntendere!” (Sal. 29:11) Nakuti tisacita khundu ya gulu ya Yahova lero, tisatambira mphambvu zinapasa iye na tisakomerwa na ntendere unapasa iye mbumba yace yakukhunganyika ninga nkhombo. Mwandimomwene, nkhabepo cipenulo cakuti tinadzapitiriza kutambira nkhombo munacita ife cifuno ca Yahova cincino na kwenda na kwenda.