Tisangizireni Mulungu Wathu Wakutsanzaya, Yahova
1 Yahova asafunadi kuti anthu akhale akutsanzaya. Mafala ace asatipanga mwanyapantsi nkhombo zakudzumatirisa zidakhunganyira iye anthu. (Iza. 65:21-25) Kutsanzaya kweneku kusafunika kuoneke kuli anthu onsene munagawana ife nawo “mphangwa zadidi za mbiri ya Mulungu wakulemedziwa [‘wakutsanzaya,’ Tradução do Novo Mundo].” (1 Tim. 1:11) Njira inalonga ife mphangwa za Umambo isafunika kupangiza kufuna kwathu undimomwene na kutsalakana kwathu kwandimomwene anthu analonga na ife.—Arom. 1:14-16.
2 Mwandimomwene, m’midzidzi inango kupitiriza na nzimu wakutsanzaya kungakhale kwakunensa. M’pisa pinango, tisagumana anthu akucepa anatawira mwakukomerwa mphangwa za Umambo. Panango ziripo ntsiku zakuti tisathimbana na makhaliro akunensa m’umaso wathu ene. Towera kupitiriza na nzimu wakutsanzaya, tisafunika kudziwa kuti anthu a m’cisa cathu asafunika kakamwe kubva na kudziwa mphangwa zadidi za Umambo zinamwaza ife. (Arom. 10:13, 14, 17) Kunyerezera pyenepi kunadzatiphedza kupitiriza kukhala akutsanzaya mbatibvekesa masasanyiro antsisi a kupulumusa a Yahova.
3 Gomezerani Pinthu Pyadidi: Ife tisafunikambo kucita mphole-mphole na pinalonga ife. Maseze tingatome makani m’kulonga pya nyatwa peno mphangwa zakudziwika na anthu, tisafunika kucalira kulonga pinthu pyakuipa. Basa yathu ndi kumwaza “mphangwa zadidi” za pinthu pyadidi. (Iza. 52:7; Arom. 10:15) Mphangwa zadidi zenezi ndi mphangwa zinabuluka m’mapikiro a Mulungu a ntsogolo yakutsanzaya. (2 Ped. 3:13) Na pyenepi m’manyerezero, phatisirani Malemba towera ‘kubalangaza anyakutsukwala.’ (Iza. 61:1, 2) Pyenepi pinadzaphedza mbodzi na mbodzi wa ife kupitiriza kukhala na nzimu wakutsanzaya na makhaliro adidi.
4 Mwakukhonda penula anthu anadzaonadi nkhaliro wathu wakukomerwa munacita ife basa ya kumwaza mphangwa. Natenepa, tipangizeni nzidzi onsene nkhaliro wa ‘Mulungu wathu wakutsanzaya,’ Yahova, munagawana ife mphangwa zadidi za Umambo na anthu a m’cisa cathu.