Kubwerezera Kwa Xikola Ya Utumiki Wa Mulungu
Mabvunzo akutowerera anadzadingwa pa kubwerezera kwapamulomo pa Xikola Ya Utumiki Wa Mulungu nkati mwa sumana inatoma pa 26 ya nthanda ya Khoni ya 2006. Muyang’aniri wa xikola anadzatsogolera kubwerezera kweneku kwa mphindi 30 kudabuluswa m’mphangwa zidadingwa m’nkhani za sumana ya 1 ya nthanda ya Gonkho mpaka sumana ya 26 ya nthanda ya Khoni ya 2006. [Cidzindikiro: Pangasoweka mithonyeso peno mabukhu adabuluswa nkhani kunkhomo kwa mbvunzo, imwe musafunika kudinga towera mugumane matawiro.—Onani Escola do Ministério, tsa. 36-7.]
LUSO YA KULONGA
1. Kodi kucinja-cinja fala ndi ninji, na thangwi yanji ndi kwakufunika? [1 ya nthanda ya Gonkho, be tsa. 111, mabokosi] Kucinja-cinja fala ndi kucinja ugaluzi, luwiro na mabvekero a fala m’kulonga kwathu. Unoyu ndi nkhaliro wakufunika kwa nyakukamba nkhani, thangwi usakhuya mabvero na usawangisa abveseri kucita pinthu. Kuphatisira mwadidi kucinja-cinja fala kusacitisa kuti abveseri athu akhuiwe na pinthu pinalongwa.
2. Kodi tinakwanisa tani kucinja luwiro yathu pa kukamba nkhani? [8 ya nthanda ya Gonkho, be tsa. 112 ndima 3-6, bokosi] Luwiro yathu isanyindira pinalonga ife. Mbwenye luwiro yakuthema nee isapangizwa na kulonga mwakucimbiza peno kulonga mwakudembuka m’midzidzi inango basi tayu. Mwacitsanzo, kazinji kene mphyadidi kulonga mwakucimbiza munadinga ife ntsonga zokhonda funika maka peno munalonga ife pinthu pyakusekesa. Ku khundu inango, tisafunika kulonga mwakudembuka munalonga ife mathangwi na ntsonga zakufunika za nkhani yathu.
3. Kodi tinakwanisa tani kukulisa ugalamuki wa pinalonga ife m’nkhani yathu, na thangwi yanji pyenepi ndi pyakufunika? [22 ya nthanda ya Gonkho, be tsa. 115 ndima 1–tsa. 116 ndima 2, mabokosi] Ugalamuki usapangizwa m’kukhunganya mphangwa zinafuna ife kulonga mbitikhunganyambo mitima yathu, pyenepi pisabveka kuti mabvero athu asafunikambo kuphatanizwa m’pyenepi. (Esdra 7:10) Tingakhala na cinyindiro cakuti mphangwa zathu ndi zakuthema na kuti abveseri athu anadzaphindula na mphangwa zenezi, tinadzakomerwa na pinafuna ife kulonga. Pyenepi mphyakufunika thangwi ugalamuki unadzatiphedza kucitisa abveseri athu kufuna kubva na kungakwanisembo kuakulumiza kucita pinthu.
4. Thangwi yanji nkhaliro wa uxamwali ndi wakufunika munapfunzisa ife anango, na ndi ninji cinafuna kutiphedza kupangiza nkhaliro unoyu? [5 ya nthanda ya Khoni, be tsa. 118 ndima 2–tsa. 119 ndima 5] Nkhaliro wa uxamwali usapasa mphambvu na usabalikisa nkhani yathu, na ndi wakufunika khala tisafuna kukhuya umaso na mitima ya abveseri athu. Kubvera ntsisi anthu anango, pabodzi na cifuno candimomwene ca kuaphedza, ninga mudacita Yezu, kusatiphedza kupangiza nkhaliro unoyu wakufunika. (Mko. 1:40, 41; Luka 8:48)
5. Fokotozani kufunika kwa majesto na maonekero a nkhope m’kulonga na anango. (Mat. 12:48, 49) [19 ya nthanda ya Khoni, be tsa. 121, mabokosi] Mphyakufunika kudziwa kuti manyerezero, mabvero na makhaliro nkhabe pangizwa na fala basi tayu mbwenye asapangizwambo na majesto pabodzi na maonekero a nkhope. Kazinji kene tisaphatisira maso athu, mulomo wathu na nsolo wathu towera kugomezera pinalonga ife na kupangiza mabvero. Kukhonda phatisira mwadidi majesto na maonekero a nkhope panango kungapangize kuti nyakukamba nkhani nkhabe tsalakana pinalonga iye.
NKHANI N.° 1
6. Kodi bukhu ya Yobe isalemedza tani Yahova na isakuza tani midida yace yakulungama m’umaso? [1 ya nthanda ya Gonkho, si tsa. 100 ndima 39, 41] Bukhu ya Yobe isalonga maulendo 31 kuti Yahova ndi Wakukwanisa pyonsene peno Wamphambvu zonsene, na mwenemo musagumanika maulendo mazinji kupiringana Malemba anango onsene. Kazinji kene Yahova asasimbwa thangwi ya ciimiriro cace capadzulu, thangwi ndi wa kwenda na kwenda, thangwi ya udziwisi wace, mphambvu zace, ulungami wace, kufuna kwace kwakukhulupirika na ntsisi zace. (Yobe 10:12; 36:26; 37:23) Kulemedzeka kwa Yahova kusagomezerwa kupiringana kupulumuka kwa anthu. (Yobe 33:12) Bukhu ineyi isakhondesa kufuna mpfuma, kulambira adzimunthu, upombo, kudzikuza, kusowa ulungami, kuyang’ana nkhope, kukhonda ona ntima na kulonga uthambi, pinthu pyonsene pinacitisa kuti munthu akhonde kutawirika pamaso pa Mulungu. (Yobe 31:5, 9, 13, 17, 24-28)
7. Kodi ndi ninji cinapangiza undimomwene wa Masalmo? [15 ya nthanda ya Gonkho, si tsa. 102 ndima 10-11] Mudamala Yezu kulamuswa muli akufa, iye apanga anyakupfunzace kuti pinthu pyonsene pidalembwa m’Masalmo thangwi yace pisafunika pikwaniriswe. (Luka 24:44) Natenepa, iye apangiza kuti Masalmo akhali aciprofesiya. Mwakuthimizira, Masalmo asabverana mwakukwana na Malemba anango na kazinji kene asatcululwa na alembi a Malemba a Cigerego Acikristu. (Mach. 13:33; Arom. 3:13)
8. M’kulonga pya munthu wanzeru, kodi Misangani 13:16 asafuna kulonga pya munthu wakunyengeta? Fokotozani. [22 ya nthanda ya Gonkho, w04 15/7 tsa. 28 ndima 3-4] M’lemba ino, fala yakuti “nzeru” nee isaphatisirwa towera kulonga “kunyengeta” tayu. Pano, kukhala wanzeru kusabverana na kukhala na cidziwiso, cakuti cisagumanwa m’kudingisa Malemba na pyakucitika pinango pyakuphatana na iwo, tayu na kulotera peno kutowerera maonero a anthu basi. Mwakusiyana na pswiru anaphatisira mulomo wace towera kumwaza upswiru, munthu wanzeru asalonga na kucita pinthu mwanzeru. Natenepa, munthu wanzeru asacita mpholemphole na mulomo wace na asacalira nyatwa zinabwereswa na makani akuipa peno okhonda nyerezerwa.
9. Kodi nzimu wakucena usaphata tani basa ninga nkhoswe peno mphedzi, na kudziwa pyenepi kusafunika kutiwangisa kucitanji? (Jwau 14:25, 26) [12 ya nthanda ya Khoni, be tsa. 19 ndima 2-3] Nzimu wakucena ungakwanise kutiphedza kukumbuka pinthu pyakufunika pidapfunzefe kale. Iwo nkhabe ikha m’manyerezero mwathu pinthu pyakuti cipo tapipfunza. Iwo waphedza alembi a Evanjeliyu kukumbuka unyomonyomo wa pinthu pidalonga na pidacita Yezu mukhakhala iwo na iye, m’maulendo anango pakumala makhumi a piaka. Pyenepi pisafunika kutiwangisa kusuta cidziwiso cizinji ca Yahova na cifuniro cace mpaka panakwanisa ife na kuphedza anango kucita cibodzibodzi.
10. Kodi Yezu asabwera m’njira ipi, na ndi ‘kubwera’ kwa ntundu wanji kudalembwa pa Mateo 16:28? [19 ya nthanda ya Khoni, w04 1/3 tsa. 16 bokosi] Kubwera kwa Yezu kusabveka kuti iye asaikha manyerezero ace kwa anthu peno kwa atowereri ace, kazinji kene towera kutonga miseru. (Mat. 24:46, 50; 25:19, 31) Pa Mateo 16:28, Yezu asalonga pya kutoma kwa kukhalapo kwace ninga Mambo Waumesiya wakuikhwa pa mpando wa umambo m’1914.
KULERI BIBLYA KWA SUMANA NA SUMANA
11. Kodi tinakwanisa kupfunzanji kubulukira ku ntawiro wa Yobe kwa Yahova unagumanika pa Yobe 42:1-6? Kubva mafala a Yahova na kukumbuswa pya mapangiziro a mphambvu yace kwaphedza Yobe ‘kuona Mulungu’ peno kuona undimomwene thangwi ya iye. (Yobe 19:26) Pyenepi pyacinja manyerezero ace. Tingasandikwa na mafala a m’Malemba, tisafunika kudzindikira kudawa kwathu mbiticita macinjo. [1 ya nthanda ya Gonkho, w06 15/3 “A Palavra de Jeová É Viva — Destaques do livro de Jó”]
12. Kodi ndi pinthu pipi “pyapezi” pinatsungira madziko? (Sal. 2:1, 2) Pinthu “pyapezi” ndi kudzudzumika kwa kukhonda mala kwa mautongi a anthu towera kucitisa kuti mautongi awo akhale a kwenda na kwenda. Pyenepi ndi pyapezi thangwi cifuniro ceneci cinadzacimwanika. Nakuti madziko asagumanyikana ‘mbasandukira Mbuya na [mambo] wache wakudzodzwa’, kodi iwo angakwanisedi kudikhira kupembera? [8 ya nthanda ya Gonkho, w06 15/5 “A Palavra de Jeová É Viva — Destaques do livro primeiro de Salmos”]
13. Kodi ndi pinthu pipi pinafuna gomolwa? (Sal. 11:3) Pinthu pyenepi ndi pire pinanyindira mbumba ya anthu—mwambo, undendemeri na ulungami. Pinthu pyenepi pingabvungazika, pasaoneka uviyaviya wa anthu na pasasoweka ulungami. Pantsi pa makhaliro anewa, “nyakulungama” asafunika kunyindira Mulungu mwakukwana. (Sal. 11:4-7) [15 ya nthanda ya Gonkho, w06 15/5 “A Palavra de Jeová É Viva — Destaques do livro primeiro de Salmos”]
14. Kodi munthu wakuzikuza asapaswa tani ‘sagwati wankulu kakamwe’? (Sal. 31:23, Tradução do Novo Mundo) Sagwati analongwa pa Masalmo pano ndi kuoneswa nyatwa. Munthu wakulungama asatambira sagwati wace thangwi ya kudawa kwace kwakukhonda funa m’njira ya kusandikwa na Yahova. Nakuti munthu wakudzikuza nkhabe siya njira yace yakudawa, asapaswa sagwati wankulu kakamwe mwakupiringana m’kuoneswa nyatwa ikulu. (Mis. 11:31; 1 Ped. 4:18) [29 ya nthanda ya Gonkho, w06 15/5 “A Palavra de Jeová É Viva — Destaques do livro primeiro de Salmos”]
15. Kodi ndi cithonthoso canji cinagumana ife m’Masalmo 40 cakuti cingakwanise kutiphedza kuthimbana na kusowa ungwiro kwa manungo akudawa pabodzi na miliri yakusiyana-siyana ya makhaliro ano a pinthu? (Sal. 40:1, 2, 5, 12) Kudikhira Yahova kungakwanise kutiphedza kuthimbana na kutsukwala, na kungakwanisembo kutiphedza ‘kubuluka m’dzenje yakugopswa na nthando ya matope.’ Tingakhonda duwala kuti nkhombo zathu ndi ‘zakukhonda lengeseka,’ nee tinadzalemerwa tayu na miliri peno kudzudzumika thangwi ya madodo athu. [12 ya nthanda ya Khoni, w06 15/5 “A Palavra de Jeová É Viva — Destaques do livro primeiro de Salmos”]