‘Nditowereni’ Kwenda na Kwenda
1 Anthu azinji asasaka kutsanzaya na umaso wawo ene, mbwenye kazinji kene nkhabe kugumana kutsanzaya. Mwakusiyana na pyenepi, Yezu alonga kuti pinabweresa kutsanzaya kwandimomwene ndi kupasa na ntima onsene. (Mach. 20:35) Iye alonga: “Ngakhala munthu anafuna kunditowera nduli mwanga, akhondeke ekhene, . . . anditowere” kwenda na kwenda. (Mko. 8:34) Pyenepi pisaphataniza pizinji kupiringana munthu kukhondeka ekhene m’pinthu pingasi pyakutsanzayisa m’midzidzi inango. Pyenepi nee pisabveka kukhala maso ntsiku na ntsiku towera kukomereseka tekha tayu, mbwenye towera kukomeresa Yahova.—Arom. 14:8; 15:3, Chiverano Chachinchino.
2 Onani citsanzo ca mpostolo Paulu. Na thangwi ya “mfuma ikulu ya kudziwa Yezu Kristu,” Paulu asiya kusaka pyakufuna pyace mbaperekeka towera kuendesa kutsogolo pyakufuna pya Umambo. (Afil. 3:7, 8) Iye alonga: “Ine ndinadzapereka pinthu pyanga pyonsene na ntima wakufuna, mbandiperekeka ndekhene” m’kutumikira anango. (2 Akor. 12:15) Mphyadidi mbodzi na mbodzi wa ife kubvunzika kuti: ‘Kodi ndisaphatisira tani nzidzi wanga, mphambvu zanga, luso yanga na mpfuma yanga? Kodi ndisaikha manyerezero anga towera kuthimizira pyakufuna pyanga, peno ndiri kusaka kukomeresa Yahova?’
3 Miyai Ya Kupasa: Mbumba ya Mulungu isabvunga midzidzi yakupiringana biliyau ibodzi caka na caka m’basa ya kupulumusa umaso ya kumwaza mphangwa za Umambo. Nkati mwa mpingo, aphale na atsikana pabodzi na akugwesera asacita mabasa akusiyana-siyana akuti asaphindulisa anango. Alipombo mabasa anango mazinji anacitwa akuphatana na misonkhano yakupambulika na ya cisa, misonkhano ya gawo, kumanga na kusasanyira nyumba zinaphatisirwa towera kuendesa kutsogolo ulambiri wandimomwene. Na nyerezerani ciphedzo cakufuna cinaperekwa na abale anaphata basa m’Comissões de Ligação com Hospitais (peno Komiti Yakuphatana Na Nyumba Za Ungumi) na Misoka Ya Kuenda Kaona Anyakuduwala. Kuwangisira kweneku konsene kwakupimana ndi kwakufunika ku ubale wathu Wacikristu!—Sal. 110:3.
4 Miyai ya kuperekeka towera kuphedza anango ingakwanise kuoneka pangacitika cidengwa peno cinthu cakudzidzimusa. Mbwenye kazinji kene, tingakwanise kunyerezera kuti Akristu anzathu asafuna ciphedzo peno ciwangiso. (Mis. 17:17) Munakhala ife dzololo towera kuperekeka kuti titumikire anango na kuendesa Umambo patsogolo, tikutowera citsanzo ca Yezu. (Afil. 2:5-8, Mphangwa Zadidi) Mbatiwangisireni kucita pyenepi kwenda na kwenda.