Tumikirani Mulungu Mwakukhulupirika Mwakukhonda Tsalakana “Nyatwa Zizinji”
‘Pisafunika kupirira nyatwa zizinji toera kupita mu Umambo wa Mulungu.’—MACH. 14:22.
MUNATAWIRA TANI?
Mbani anatsogolera nyatwa zinathimbana na ife?
Tinakhunganyika tani toera kuthimbana na mitcingo na kufewa manungo?
Ndi nkhombo zipi zinafuna kudzatambira ale anapirira nyatwa?
1. Thangwi yanji atumiki a Mulungu nee asadzudzumiswa na nyatwa?
MUSADZUDZUMIKA kudziwa kuti munadzathimbana na “nyatwa zizinji” mbamudzati kuwina muoni wa umaso wakukhonda mala? Panango nkhabe. Mwakukhonda tsalakana khala ndimwe mupswa mu undimomwene peno musatumikira Yahova mu pyaka pizinji, imwe musadziwa kuti nyatwa zisacita khundu ya dziko ya Sathani.—Apok. 12:12.
2. (a) Kusiyapo nyatwa zinathimbana na anthu onsene akusowa ungwiro, ndi ntundu wanji wa nyatwa unathimbana na Akristu? (Onani cithundzithundzi cakutoma.) (b) Mbani anatsogolera nyatwa zinathimbana na ife, tisadziwa tani pyenepi?
2 Kusiyapo nyatwa ‘zinathimbana na anthu onsene’—Akristu asathimbana na ntundu unango wa nyatwa. (1 Akor. 10:13) Ndi upi? Kutcingwa kwakuwanga thangwi yakutonga kwawo kubvera mitemo ya Mulungu. Yezu apanga atowereri ace: ‘Ndzakazi si nkulu tayu kupita mbuyace. Ngakhala anthu anditcinga, mphapo anadzakutcinganimbo.’ (Jwau 15:20) Mbani anatsogolera mitcingo ineyi? Mwakukhonda penula ndi Sathani, wakuti m’Bhibhlya asalongwa ninga ‘nkhalamu yakulira inandzendza-ndzendza mbisaka kudya’ atumiki a Mulungu. (1 Ped. 5:8) Sathani anadzaphatisira njira zonsene toera kuyesera kufudza umumphu wa anyakupfundza a Yezu. Onani pidacitika kuna mpostolo Paulu.
MITCINGO KU LISTRA
3-5. (a) Ndi mitcingo ipi idathimbana na Paulu ku Listra? (b) Ndi munjira ipi mafalace analonga pya nyatwa za ntsogolo akhali akuwangisa?
3 Paulu atcingwa kazinji kene thangwi ya cikhulupiro cace. (2 Akor. 11:23-27) Ubodzi mwa mitcingo ineyi, athimbana nawo ku Listra. Pidamala iye kuwangisa mamuna wakuti nee akhafamba kubulukira pakubalwa kwace, Paulu na Barnabe aoniwa ninga alungu. Uwiri wawo adembetera mwinji toera ukhonde kualambira! Mbwenye mwakukhonda dembuka, apingizi Aciyuda afika mbaphatisira mafala apezi toera kucinja manyerezero a anthu. Mwinji wa anthu wakhulupira uthambi unoyu! Anthu amenya Paulu na miyala mpaka mudanyerezera iwo kuti afa.—Mach. 14:8-19.
4 Pidamala iwo kuona nzinda wa Derbe, Paulu na Barnabe ‘abwerera ku Listra, ku Ikonyo na ku Antyokiya. Kweneko iwo awangisa mitima ya anyakupfundza, na kuapasa cipapo kuti apitirize kukhulupira, mbaapanga kuti pisafunika kupirira nyatwa zizinji, toera kupita mu Umambo wa Mulungu.’ (Mach. 14:21, 22) Pakutoma, mafala anewa panango nee akhabveka mwadidi. Kusiyapo pyenepi, maonero akudikhira kuthimbana na “nyatwa zizinji” mbadakhala akufewesa manungo, tayu akuwangisa. Mphapo, Paulu na Barnabe “awangisa tani mitima ya anyakupfundza” na mafala akhapangiza kuti mbadathimbana na nyatwa zizinji?
5 Tinagumana ntawiro tingadinga mwacidikhodikho mafala a Paulu. Iye nee alonga kuti: “Tisafunika kupirira nyatwa zizinji.” Mbuto mwace, iye alonga: ‘Pisafunika kupirira nyatwa zizinji, toera kupita mu Umambo wa Mulungu.’ Natenepa, Paulu awangisa anyakupfundza mu kugomezera maphindu akukhala munthu wakukhulupirika. Nkhombo zenezi nee zikhali ninga ndota. Mwandimomwene, Yezu alonga kuti munthu ‘anapirira mpaka kunkhomo, uyu anadzapulumuswa.’—Mat. 10:22.
6. Ndi nkhombo zipi zinafuna kudzatambira ale anapirira nyatwa?
6 Tingapirira, tinadzatambira nkhombo. Kwa Akristu akudzodzwa, nkhombo ineyi ndi umaso wakukhonda kufa kudzulu ninga anyakutonga pabodzi na Yezu. Kwa “mabira anango,” nkhombo ineyi ndi umaso wakukhonda mala pa dziko yapantsi yakuti ‘munadzaoneka ulungami.’ (Jwau 10:16; 2 Ped. 3:13) Mbwenye ninga mudalonga Paulu, mu ndzidzi uno ife tinadzathimbana na nyatwa. Onani mitundu miwiri ya nyatwa zenezi.
MAYESERO APAKWECA
7. Ndi ntundu upi wa nyatwa wakuti unakwanisa kulongwa ninga mayesero apakweca?
7 Yezu alonga: ‘Munadzasumirwa pa atongi, munadzamenyiwa na mitcamu m’masinagoga, munadzaperekwa kuna anyapidzo a madziko na kuna amambo ene.’ (Mko. 13:9) Mwakubverana na mafala anewa, Akristu anango anadzathimbana na kutcingwa. Midzidzi inango mitcingo ineyi isatsogolerwa na akulu a mauphemberi peno atsogoleri a anyandale. (Mach. 5:27, 28) Onani pontho citsandzo ca Paulu. Kodi iye akundwa na kugopa mu kunyerezera kuti mbadathimbana na mitcingo ineyi? Nee pang’ono pene.—Lerini Machitiro 20:22, 23.
8, 9. Kodi Paulu apangiza tani kuti akhali wakutonga kupirira, kodi anango lero asapangiza tani kutonga kubodzi kwene?
8 Mwacipapo, Paulu athimbana na mayesero a Sathani mbalonga: ‘Ndinanyerezera kuti moyo wanga si cinthu tayu, nee pang’ono. Pinafunika ndi ipi: Ndimalisire njira yanga mbandiphata mabasa anga, adapaswa ine na Mbuya Yezu: Ndicitire umboni mphangwa zadidi za nkhombo za Mulungu.’ (Mach. 20:24) Mwandimomwene, Paulu nee agopa maonero akudikhira kuthimbana na nyatwa. Mbuto mwace, iye akhali wakutonga kupirira, mwakukhonda tsalakana ntundu wa nyatwa zikhafuna iye kuona. Cifuno cace cikulu cikhali ‘kupereka umboni mwakukhonda tsalakana nyatwa.
9 Lero, abale na alongo athu azinji asapangiza kutonga kubodzi kwene. Mwacitsandzo, mu dziko inango, Mboni za Yahova zikupirira nyatwa nkaidi cifupi na pyaka 20 thangwi yakukoya unakatinakati wawo. Nseru wawo cipo watongwa, thangwi mu dziko ineyi nkhabe ntemo unaphedzera anthu a cikumbuntima. Mu ndzidzi ukhakhala iwo nkaidi, anango akhamenyiwa na kutsalakanwa mwakuipa munjira zakusiyana-siyana, pontho acibale awo akhakhondeswa kuenda kaaona.
10. Thangwi yanji nee tisafunika kugopa nyatwa zakuti zinaoneka mwakukhonda dikhira?
10 M’madziko anango, abale athu asathimbana na nyatwa zakuti zisaoneka mwakukhonda dikhira. Kodi pyenepi pinakwanisa kucitikambo kwa imwe? Lekani kugopa! Nyerezerani pya Zuze. Iye aguliswa na acibale ace ku ubitcu, mbwenye Yahova ambvunulira ‘mu nyatwa zace zonsene.’ (Mach. 7:9, 10) Yahova anakwanisa kucita pibodzi pyene kwa imwe. Cipo, lekani kuduwala kuti Yahova asadziwa kuti ‘anapulumusa tani mwa kupendiwa anthu anamulemedza.’ (2 Ped. 2:9) Pitirizani kunyindira Yahova, mu kudziwa kuti iye anakwanisa kukupulumusani n’dziko ino yakuipa na kukupasani mwai wakukhala na umaso wakukhonda mala pantsi pa utongi wa Umambo wace. Imwe muli na mathangwi onsene toera kucita pyenepi, na kuthimbana na mitcingo mwacipapo.—1 Ped. 5:8, 9.
MAYESERO AKUBISALIKA
11. Kodi mayesero apakweca a Sathani asiyana tani na mayesero ace akubisalika?
11 Ntundu unango wa nyatwa zakuti tinakwanisa kuthimbana nazo ndi mayesero akubisalika. Mayesero akubisalika asiyana tani na apakweca peno kutcingwa? Mayesero apakweca ndi ninga condzi cikulu cinacitika mu nzinda mbicifudza nyumba yanu mwakucimbiza. Mayesero akubisalika ndi ninga ucenje wakuti mwapang’ono pang’ono usanyenyena miti ya nyumba yanu mpaka kufudzika. Mu ndzidzi unadzindikira munthu pidacita ucenje, ndi ndembulembu kakamwe, thangwi nyumba yace nkhabebve citsidzikizo.
12. (a) Ndi ipi njira ibodzi ya mayesero akubisalika a Sathani, thangwi yanji asapembera nayo kakamwe? (b) Kodi Paulu akhuyiwa tani na kufewa manungo?
12 Sathani asafuna kufudza uxamwali wanu na Yahova mu kuphatisira mayesero apakweca a mitcingo, peno kubulukira mu kunyenyena mwapang’ono pang’ono cikhulupiro canu mu kuphatisira mayesero akubisalika. Njira ibodzi ya mayesero akubisalika yakuti Sathani asaphindula nayo kakamwe ndi kufewa manungo. Mpostolo Paulu alonga kuti m’midzidzi inango akhali na mabvero akufewa manungo. (Lerini Aroma 7:21-24.) Paulu alonga kuti akhali ‘munthu wakusowa basa.’ Paulu akhali munthu wakuwanga mwauzimu wakuti panango akhali m’bodzi wa mathubo akutonga a pyaka dzana yakutoma. Mphapo, thangwi yanji afewa manungo? Paulu alonga kuti akhali na mabvero anewa thangwi ya kusowa kwace ungwiro. Iye akhafuna kakamwe kucita pinthu pyadidi, mbwenye akhabva mphambvu inango yakuti ikhathimbana na cifuno cace. Khala midzidzi inango musathimbana na mabvero ninga anewa, nee musaona kuti mphyakuwangisa kudziwa kuti mpostolo Paulu athimbanambo na mabvero mabodzi ene?
13, 14. (a) Ninji pinacitisa atumiki anango a Mulungu kufewa manungo? (b) Mbani asafuna kakamwe kuona kufudzika kwa cikhulupiro cathu, thangwi yanji?
13 Midzidzi inango, abale na alongo azinji asakhala akufewa manungo, kupswipa ntima, peno kubva ninga ndi akusowa basa. Mwacitsandzo, mpainiya unango waphinga wakuti tinancemera na dzina ya Dhebora alonga: “Ndisanyerezera mwakubwereza-bwereza pya madodo adacita ine, mbanditsukwala napyo ndzidzi onsene unapinyerezera ine. Ndinganyerezera pinthu pyonsene pyakuipa pidacita ine, ndisaona ninga nkhabe munthu wakuti anakwanisa kundifuna, ngakhale Yahova.”
14 Ninji pinacitisa atumiki anango aphinga a Yahova, ninga Dhebora, kukhala na mabvero anewa akufewa manungo? Pana mathangwi mazinji. Anango asakhala na cipendamiro ca kunyerezera mwakuphonyeka thangwi ya iwo ene na makhaliro a umaso wawo. (Mis. 15:15) Kwa anango, mabvero akuphonyeka asaoneka thangwi yakuthimbana na utenda wakuti usakhuya mabvero awo. Mwakukhonda tsalakana mathangwi anacitisa anthu kukhala na mabvero anewa, kumbukani kuti mbani asafuna kakamwe kuphatisira mabvero anewa. Mwandimomwene, mbani asafuna kuti tifewe manungo mbatisiya kutumikira Yahova? Mbani asafuna kakamwe kuti mupasike mulando ubodzi ene wakutongwa kwace? (Apok. 20:10) Ndi Sathani. Undimomwene ndi wakuti mwakukhonda tsalakana njira inaphatisira iye, mayesero apakweca peno akubisalika, cifuno ca Sathani ndi cibodzi cene—kutidzudzumisa, kufewesa phinga yathu, na kuticitisa kusiya kutumikira Yahova. Lekani kuduwala, atumiki a Mulungu akumenya nkhondo yauzimu!
15. Tinapangiza tani kuti tiri akutonga kukhonda kukundwa na kufewa manungo?
15 Khalani wakutonga kumenya nkhondo nee kubwerera nduli. Ikhani manyerezero anu ku muoni unadikhira imwe. Paulu alembera Akristu a ku Korinto: ‘Ife nkhabe kubwerera nduli, maseze umunthu wathu wakunja ukufudzika, umunthu wathu wankati unagumana mphambvu zipswa kwenda na kwenda. Nyatwa zathu za ndzidzi uno ntsing’ono tingazilandanisa na mbiri ikulu maningi yakukhonda mala.’—2 Akor. 4:16, 17.
KHUNGANYIKANI CINCINO TOERA KUTHIMBANA NA NYATWA
16. Thangwi yanji tisafunika kukhunganyika cincino toera kuthimbana na mayesero?
16 Ninga mudaona ife, Sathani ali na “manyengerero” mazinji. (Aef. 6:11) M’bodzi na m’bodzi wa ife asafunika kubvera uphungu unagumanika pa 1 Pedro 5:9: ‘Muncokese na phinga, pa kuwangisira na kukhulupira.’ Toera kucita pyenepi, tisafunika kukhunganya manyerezero athu na ntima wathu, kupfundzisika tekhene cincino mu kucita pinthu pyadidi. Mwacitsandzo, mbadzati kuenda kunkhondo, anyankhondo asakhunganyika mwakukwana. Pyenepi ndi sawasawa na anyankhondo auzimu a Yahova. Ife nkhabe dziwa kuti nkhondo yathu yauzimu inadzaphatanizanji ntsogolo. Natenepa, tisafunika kukhunganyika mwadidi mu ndzidzi uno unaoneka ninga tiri mu ntendere. Paulu alembera Akristu: “Pitirizani kubvundzika mwekha khala muciri akuwanga mu cikhulupiro peno nkhabe; pitirizani kudingika mwekha toera mudziwe kuti ndimwe munthu wa ntundu wanji.”—2 Akor. 13:5, Tradução do Novo Mundo.
17-19. (a) Tinakwanisa tani kudingika tekhene? (b) Kodi aphale na atsikana anakwanisa tani kutsidzikiza cikhulupiro cawo mu ndzidzi unaenda iwo kuxikola?
17 Njira ibodzi yakubvera uphungu wakupumirwa wa Paulu ndi kudingika tekhene mwakukwana. Bvundzikani: ‘Ndisacita phembero mwakukhonda phonya? Ndingathimbana na mikakamizo ya axamwali, ndisabvera Mulungu kupiringana anthu? Ndisagumanika pa misonkhano mwakukhonda phonya? Ndisalonga pya cikhulupiro canga mwacipapo? Ndisakwanisa kulekerera madodo a anyakukhulupira andzanga—ninga pinacita iwo kwa ine? Kodi ndisabvera akulu a m’mpingo wanga pabodzi na ale anatsogolera mpingo wa dziko yonsene?’
18 Onani kuti miwiri mwa mibvundzo ineyi isalonga pya kutsidzikiza pikhulupiro pyathu mwacipapo na kuthimbana na mikakamizo ya axamwali. Azinji mwa aphale na atsikana asafunika kucita pyenepi mu ndzidzi unaenda iwo kuxikola. Iwo asapfudza kuti nee asafunika kukhala na manyadzo peno kugopa kulonga pinakhulupira iwo. Mbuto mwace, iwo asalonga na cipapo. Maonero akuphindulisa thangwi ya nkhani zenezi asabuluswa m’marevista athu. Mwacitsandzo, Despertai! ya Julho de 2009 yalonga kuti ndzanu wa mu kalasi angabvundza kuti: “Thangwi yanji iwe nkhabe khulupira pya kusanduka kwa pinthu?” munakwanisa kutawira: “Thangwi yanji ndisafunika kukhulupira pya kusanduka kwa pinthu? Asiyentista nee ali na maonero mabodzi ene pa nkhani ineyi, pontho iwo asaoniwa ninga anyakudziwisa kakamwe!” Anyakubala, citani masasanyiro toera kukhala na makhundu akukhunganyika na ananu toera akwanise kuthimbana na mikakamizo ya axamwali awo kuxikola.
19 Mwandimomwene, midzidzi inango pisanentsa kulonga peno kucita pinatiphemba Yahova. Tingafika kunyumba pakumala kuneta na basa, tisafunika kukakamizika toera kuenda ku misonkhano. Kulamuka namacibese toera kuenda mu utumiki, pisaphemba kuwangisira toera kulamuka pa talimba. Mbwenye kumbukani: Khala musacita pyenepi cincino, mungadzathimbana na mayesero makulu ntsogolo, imwe munakwanisa kuthimbana nawo.
20, 21. (a) Kodi kunyerezera mwacidikhodikho pya ciomboli kunatiphedza tani toera kuthimbana na mabvero akuphonyeka? (b) Tisafunika kukhala akutonga toera kucitanji?
20 Ndiye tani pya mayesero akubisalika? Mwacitsandzo, tinakwanisa tani kukunda mabvero akufewa manungo? Njira yakufunika kakamwe ndi kunyerezera mwacidikhodikho pya ciomboli. Ndi pyenepi pidacita mpostolo Paulu. Iye akhadziwa kuti midzidzi inango akhabva ninga ndi wakusowa basa. Mbwenye iye akhadziwambo kuti Kristu afera anthu akudawa, tayu aungwiro. Paulu akhali m’bodzi wa anthu anewa akudawa. Iye alemba: ‘Moyo unakhala cincino na ine m’manungo mwanga, ndinawo thangwi ndiri kubvera Mwana wa Mulungu, uyu adandifuna mbaperekeka thangwi ya ine.’ (Agal. 2:20) Inde, Paulu atawira ciomboli. Iye adzindikira kuti ciomboli caperekwa kwa iye.
21 Imwe munakwanisa kuphindula na maonero mabodzi ene akuona ciomboli ninga muoni udapereka Yahova kwa imwe. Pyenepi nee pisabveka kuti kufewa manungo kunamala mwakucimbiza. Kwa anango a ife, anapitiriza kuthimbana na mayesero akubisalika mpaka mu dziko ipswa. Mbwenye kumbukani: Anafuna kutambira muoni ndi ale anakhonda kubwerera nduli. Ife tiri cifupi kakamwe na ntsiku ya mbiri yakuti Umambo wa Mulungu unadzakhazikisa ntendere na kucitisa anthu onsene akukhulupirika kukhala aungwiro. Natenepa, khalani wakutonga toera kupita mu Umambo unoyu—ngakhale kuti pisafunika kupirira nyatwa zizinji.