Mafala Akutoma

Nyakuleri wathu wakufunika:

Yezu asacita ncemerero uyu kuna ife: “Bwera ukhale nyakupfundza wanga.” (Marko 10:​21) Kodi imwe mwatawira ncemerero unoyu? Kukhala nyakupfundzace ndi cisankhulo cadidi kakamwe. Thangwi yanji?

Yahova atuma Mwanace wautombo toera abwere pa dziko kuti apereke umaso wace ninga ciomboli. (Juwau 3:⁠16) Kusiyapo kutifera basi, Yezu apangizambo citsandzo toera kutowezera. Mu pyonsene pidacita iye, Yezu akhali wakukhulupirika mbatsandzayisa Babace. Yezu atipangizambo kuti tinakhala tani ninga Babace. Yezu atowezera mwadidi manyerezero na mabvero a Babace kubulukira m’mafala na m’macitiro ace.​​—⁠Juwau 14:⁠9.

Bhibhlya isalonga kuti Yezu ‘apangiza kuna ife kuti tinatowezera tani manyalo ace mwakukhulupirika.’ (1 Pedhru 2:21) Tingafuna kukhala axamwali a Yahova, kukhala na kutsandzaya kwandimomwene, pontho khala tisafuna kukhala na umaso wakukhonda mala tisafunika kutowerera manyalo a Kristu mwakukhulupirika.

Toera kucita pyenepi, tisafunika kudziwa pizinji thangwi ya pidacita Yezu pa dziko yapantsi. Tingapfundza mwadidi pinalonga Bhibhlya thangwi ya Yezu, tinadziwa mwadidi kuti iye mbani. Kunyerezera mwadidi pidalonga Yezu na pidacita iye, mbationa kuti tinatowezera tani pidacita iye na pidalonga iye kunadzatiphedza kuona mwadidi kuti tinantowerera tani

Bukhu ino inakuphedzani kukulisa ufuni wanu kuna Yezu na Yahova. Ufuni unoyu unakuphedzani toera kutowezera mwakukhulupirika manyalo a Yezu, kucita pyenepi kunakuphedzani toera kutsandzayisa Yahova lero na kwenda na kwenda.