Mamuna na nkazi akutekenya ndeka pabodzi pyene
KUNA ANYAKUMANGA BANJA
2 Kucita Pinthu Mwakubverana
PYENEPI PISABVEKANJI
Mamuna na nkazi angacita pinthu mwakubverana, iwo asakhala ninga anyakutekenya ndeka awiri akuti ali mu ndeka ibodzi ene, pontho ali kuenda ku mbuto ibodzi ene. Iwo angathimbana na nyatwa, mamuna peno nkazi nee asanyerezera pinafuna iye basi, mbwenye asanyerezerambo pinafuna ndzace.
PINALONGA BHIBHLYA: “Iwo si awiribve tayu, mbwenye ndi manungo mabodzi basi.”—Mateu 19:6.
“Cala cibodzi nkhabe kuswa ntsawawa. Natenepa toera banja ikhale yakutsandzaya, mamuna na nkazi asafunika kucita pinthu mwakubverana.”—Christopher.
THANGWI YANJI MPHYAKUFUNIKA KUCITA PINTHU MWAKUBVERANA
M’banja mungaoneka nyatwa, mamuna na nkazi akuti nkhabe kucita pinthu mwakubverana asatoma kuketesana okhene m’mbuto mwakusaka njira toera kumalisa nyatwa. Nyatwa zing’ono zisacinja kudza nyatwa zikulu.
“Kucita pinthu mwakubverana m’banja ndi pyakufunika kakamwe. Ine na mamunanga tingakhonda kucita pinthu mwakubverana, tisakhala basi ene ninga anthu anakhala n’nyumba ibodzi ene tayu ninga banja, pyenepi pisaticitisa toera tikhonde kucedza pinthu pyakufunika.”—Alexandra.
PINAFUNIKA IMWE KUCITA
BVUNDZIKANI
Ndingagumana kobiri, kodi ndisaiona ninga ndi yanga basi?
Kodi ine ndisatsandzaya basi ene ndingakhala kutali na ndzanga wa m’banja?
Kodi ine ndisacalira kucedza na acibale a mamunanga peno a nkazanga maseze iye asabverana nawo kakamwe?
CEDZANI NA NDZANU WA M’BANJA THANGWI YA MIBVUNDZO INATOWERA
Ndi pinthu pipi pinakwanisa ife kucita pabodzi ninga banja?
Ndi pinthu pipi pinafunika ife kusasanyira?
Tinacitanji toera tikhale na nsambo wakucita pinthu mwakubverana ninga banja?
PINTHU PINAFUNA KUKUPHEDZANI
Nyerezerani kuti muli kugwa bhola m’misoka miwiri. M’mbuto mwakugwa mu nsoka wace-wace, pana pinthu pinafunika imwe kucita toera mugwe mu nsoka ubodzi ene?
M’mbuto mwakunyerezera: ‘Ndinacitanji toera ndiwine,’ bvundzikani: ‘Tinacitanji toera tiwine?’
“Lekani kusaka kuti mbani adadawa na adakhonda kudawa. Pyenepi nkhabe basa. Pyakufunika kakamwe ndi kukhala muntendere na mamunanu peno nkazanu.”—Ethan.
PINALONGA BHIBHLYA: “Lekani kunyerezera pinafuna imwe basi, mbwenye nyerezeranimbo pinafuna anango.”—Afilipi 2:3, 4.