Atongi

12 Natenepa amuna a ku Efraimu agumanyikana, buluka penepo aenda ku Zafoni* mbapanga Yefite: “Thangwi yanji nee waticemera mu ndzidzi udawambuka iwe nkulo toera tiende pabodzi na iwe kamenyana na Aamoni?+ Ife tinapisa iwe pabodzi na nyumba yako.” 2 Mbwenye Yefite aapanga: “Ine pabodzi na mbumba yanga tamenyana kakamwe na Aamoni. Ine ndakucemerani toera mundiphedze, mbwenye imwe nee mwandipulumusa mʼmanja mwawo. 3 Pidaona ine kuti nee mu­nandipulumusa, ndaikha umaso wanga pangozwi* mbandienda kamenyana na Aamoni,+ pontho Yahova aapereka mʼmanja mwanga. Mphapo thangwi yanji lero imwe mwabwera toera kumenyana na ine?”

4 Buluka penepo, Yefite agumanyiza amuna onsene a ku Jiliyadhi+ mbamenyana na Efraimu; amuna a ku Jiliyadhi akunda Efraimu, akuti akhadalonga: “Imwe anthu a ku Jiliyadhi munakhala mucisa ca Efraimu na Manase ndimwe anthu adathawa ku Efraimu.” 5 Amuna a ku Jiliyadhi afunga mbuto zinawambuka na anthu Yordani+ kutsogolo kwa Efraimu; anthu a ku Efraimu pikhafuna iwo kuthawa, mʼbodzi na mʼbodzi akhalonga: “Ndisiyeni ndiwambuke,” penepo amuna a ku Jiliyadhi akhambvundza: “Ndiwe wa ku Efraimu?” Angatawira kuti: “Nkhabe!” 6 Iwo akhampanga: “Longa kuti Xibholeti.” Mbwenye iye akhalonga: “Sibholeti,” thangwi akhacimwana kulonga mwadidi fala ineyi. Penepo iwo akhamʼphata, mbamʼpha pa mbuto ineyi inawambuka na anthu Yordani. Natenepa anthu a ku Efraimu akukwana 42.000 aphiwa pa ndzidzi unoyu.

7 Yefite akhala nyakutonga miseru wa Izraeli mu pyaka pitanthatu, buluka penepo, Yefite wa ku Jiliyadhi afa, mbaikhwa mu nzinda wace ku Jiliyadhi.

8 Buluka Yefite, Ibhizani wa ku Bhetelehemu akhala nyakutonga miseru wa Izraeli.+ 9 Iye akhali na ana amuna 30 na ana akazi 30. Ibhizani asembesa anace akazi na amuna a dzindza inango, pontho atuma anthu toera kubweresa atsikana 30 a dzindza inango toera asembwe na anace. Iye akhala nyakutonga miseru wa Izraeli mu pyaka pinomwe. 10 Buluka penepo, Ibhizani afa mbaikhwa ku Bhetelehemu.

11 Buluka Ibhizani, Eloni wa dzindza ya Zebhuloni akhala nyakutonga miseru wa Izraeli; iye akhala nyakutonga miseru wa Izraeli mu pyaka khumi. 12 Buluka penepo, Eloni wa dzindza ya Zebhuloni afa, mbaikhwa ku Aijaloni mu dziko ya Zebhuloni.

13 Buluka Eloni, Abhidhoni mwana wa Hileli wa ku Piratoni akhala nyakutonga miseru wa Izraeli. 14 Iye akhali na ana amuna 40 na adzukulu 30, onsene akhafamba na maburu 70. Abhidhoni akhala nyakutonga miseru wa Izraeli mu pyaka pisere. 15 Buluka penepo, Abhidhoni mwana wa Hileli wa ku Piratoni afa, mbaikhwa ku Piratoni mu dziko ya Efraimu kuphiri ya Aamaleki.+