Icyo umubatizo usobanura n’akamaro kawo

1. Ni iki kigaragaza ko umubatizo ari inyigisho y’ingenzi cyane yo muri Bibiliya?

IYO hagize abantu bashya babatizwa, turishima cyane. Abantu ba mbere babaye Abakristo na bo barishimye cyane igihe babonaga abantu benshi babatizwa kuri Pentekote yo mu mwaka wa 33. Icyo gihe intumwa Petero yatanze disikuru yasobanuraga impamvu kubatizwa ari iby’ingenzi cyane (Ibyak. 2:​38, 40, 41). Nyuma yaho intumwa Pawulo yanditse ko mu ‘nyigisho z’ibanze ku byerekeye Kristo,’ harimo n’“inyigisho zerekeye imibatizo” (Heb. 6:​1, 2). Ubwo rero, umubatizo ni imwe mu nyigisho z’ingenzi zo muri Bibiliya kandi dukwiriye kuwusobanukirwa neza. Kubera iki?

2. Kuki ari iby’ingenzi ko dusobanukirwa inyigisho y’umubatizo?

² Iyo umuntu yifuza kubaka inzu ikomeye, aba agomba kubanza kubaka fondasiyo ikomeye. Mu buryo nk’ubwo, umuntu ushaka kugira ukwizera gukomeye, agomba kubanza gusobanukirwa neza inyigisho zo muri Bibiliya ukwizera kwe gushingiyeho. Ibyo bikubiyemo no gusobanukirwa neza umubatizo. Ubwo rero, twaba tutarabatizwa cyangwa tumaze imyaka myinshi tubatijwe, ni ngombwa ko dusobanukirwa impamvu umubatizo ari uw’ingenzi cyane. Ni yo mpamvu muri iki gice tugiye gusuzuma ibisubizo by’ibibazo bikurikira: Umubatizo usobanura iki? Wagombye gukorwa ute? Kuki tubatizwa mu izina rya Papa, iry’Umwana n’iry’umwuka wera?

ICYO UMUBATIZO USOBANURA

3. Iyo ubatijwe, ni iki uba weretse abandi?

³ Iyo ubatijwe uba ugaragarije mu bantu benshi ko wemeye inyigisho z’ukuri ku byerekeye Yehova na Yesu Kristo, ko wihannye ibyaha byawe kandi ko wahindutse kugira ngo ubeho ukorera Yehova. Nanone uba ugaragaje ko wemera ko Yesu ari we Imana ikoresha kugira ngo ikize abantu icyaha n’urupfu. Ikindi kandi, uba ugaragaje ko wasenze Imana ukayisezeranya ko uzakora ibyo ishaka ufatanyije n’umuryango wayo. Iyo uhaye Imana iryo sezerano cyangwa ukayiyegurira, hanyuma ukabatizwa, uba utangiye kugendera mu nzira igana ku buzima bw’iteka.

4. Kwibizwa mu mazi no kuyavanwamo bisobanura iki? (Reba n’ifoto.)

⁴ Iyo ubatijwe, umubiri wawe wose wibizwa mu mazi, barangiza bakagukuramo.a Hari igihe ibyo bigereranywa no gupfa ugashyingurwa hanyuma ukazuka. (Gereranya no mu Bakolosayi 2:12.) Kuki iryo gereranya rikwiriye? Iyo wibijwe mu mazi, uba ugaragaje ko waretse imibereho yawe ya kera. Iyo uvuye mu mazi, uba ugaragaje ko utangiye ubuzima bushya kandi ko kuva icyo gihe gukora ibyo Imana ishaka ari byo uzajya ushyira mu mwanya wa mbere.

5. Kuki ibyo ugomba gukora kugira ngo wuzuze ibisabwa ubatizwe, twabigereranya n’ibyo Nowa yagombaga gukora kugira ngo yubake ubwato? (1 Petero 3:​18-21)

⁵ Soma muri 1 Petero 3:​18-21. Dushobora kugereranya ibyo ugomba gukora kugira ngo ube witeguye kubatizwa n’ibyo Nowa yakoze kugira ngo yubake ubwato bunini. Niba ugitangira kwiga ibyerekeye Yehova, ushobora kumva ko ibintu byose usabwa gukora kugira ngo wuzuze ibisabwa ubatizwe, bigoye cyane. Ushobora no kumva bitakoroheye na gato, nk’uko kubaka ubwato bunini cyane bitari byoroheye Nowa. Ese koko ni ngombwa ko ibyo byose ubikora? Ni ngombwa. Kubera iki? Tekereza ibyabaye kuri Nowa. Imana ubwayo ni yo yabwiye Nowa uko yagombaga kubaka ubwo bwato, kandi yagombaga gukurikiza ayo mabwiriza abyitondeye, kugira ngo abantu bazarokoke Umwuzure. Nowa yashoboye kubaka ubwo bwato bwari bunini cyane bitewe n’uko yizeye Yehova, akamwumvira kandi Yehova na we akamufasha. Kimwe na Nowa, nawe ushobora ‘gukora ibihuje n’ibyo Imana igutegeka byose.’—Intang. 6:22.

6. Petero yashakaga kuvuga iki, igihe yandikaga ko umubatizo ‘ari wo udukiza’?

⁶ Ku murongo wa 21, intumwa Petero yanditse ko ‘umubatizo ari wo udukiza.’ Ariko ibyo ntibishatse kuvuga ko kubatizwa byonyine ari byo ugomba gukora kugira ngo ubabarirwe ibyaha byawe. Amaraso ya Yesu ni yo yonyine atuma ubabarirwa ibyaha (1 Yoh. 1:7). Icyakora kubatizwa ni iby’ingenzi cyane kubera ko Yehova abidusaba. Nanone iyo tubatijwe, tuba ‘tumusabye kuduha umutima nama utaducira urubanza.’ Yehova yishimira kutubabarira ibyaha byacu ashingiye ku gitambo cy’incungu. Iyo ni yo mpamvu umubatizo ‘ari wo udukiza,’ mu yandi magambo ugatuma dushobora kubona ubuzima bw’iteka.

UMUBATIZO WA GIKRISTO WAGOMBYE GUKORWA UTE?

7. Kubatiza bikorwa bite?

⁷ Bibiliya ivuga ko iyo umuntu abatizwa, umubiri we wose wibizwa mu mazi, ariko nta bintu byinshi ivuga ku birebana n’uko umubatizo ugomba gukorwa. Icyakora, idufasha kumenya ibintu bikwiriye byakorwa mu gihe cy’umubatizo. Urugero, amahame yo muri Bibiliya afasha abari bubatizwe kumenya uko bakwiriye kwambara, kandi agafasha abari kureba umubatizo kumenya uko bakwiriye kwitwara (1 Kor. 14:40; 1 Tim. 2:9). Muri iki gihe, akenshi kubatiza bikorwa n’umusaza w’itorero, ariko ntitumuha icyubahiro kidasanzwe bitewe n’iyo nshingano (1 Kor. 1:​14, 15). Umubatizo uba ufite agaciro, waba wabaye hari abantu benshi cyangwa bake.—Ibyak. 8:36

8. Abagiye kubatizwa babazwa ibihe bibazo, kandi se kuki babibazwa? (Ibyakozwe 2:​38-42) (Reba n’ifoto.)

⁸ Bibiliya ivuga ko tugomba ‘gutangariza mu ruhame ibyo twizera bikaduhesha agakiza’ (Rom. 10:​9, 10). ‘Dutangariza mu ruhame ibyo twizera’ iyo turi mu murimo wo kubwiriza, ariko by’umwihariko tubikora ku munsi wo kubatizwa. Iyo ni yo mpamvu abagiye kubatizwa babazwa ibibazo bibiri. Icya mbere kigira kiti: “Ese wihannye ibyaha byawe, wiyegurira Yehova kandi wemera ko Yesu Kristo ari we yakoresheje kugira ngo uzabone agakiza?” Icyo kibazo cyibanda ku bintu umuntu aba yarakoze kugira ngo yuzuze ibisabwa ngo abatizwe. Petero na we yavuze ibintu nk’ibyo ku munsi wa Pentekote, igihe yabwiraga abantu ngo bihane kandi babatizwe. Ikibazo cya kabiri kigira kiti: “Ese usobanukiwe neza ko kubatizwa bigaragaza ko ubaye Umuhamya wa Yehova wifatanya n’umuryango we?” Iki kibazo cyo cyibanda ku byo umuntu azakora. Yiyemeza ko azakurikiza ubuyobozi butangwa n’umuryango wa Yehova kandi akamukorera afatanyije n’abavandimwe na bashiki bacu. Ibyo bihuje n’ibyo abantu babatijwe kuri Pentekote bakoze nyuma yo kubatizwa. (Soma mu Byakozwe 2:​38-42.) Iyo abantu bashubije ibyo bibazo byombi bemeza, baba bujuje ibisabwa ngo babatizwe.

9. Ni iki buri wese aba agomba gukora kugira ngo Imana imwemere?

⁹ Birashoboka ko na mbere y’uko utangira kwiga Bibiliya, muri rusange witwaraga neza kandi ko utigeze ukora ibyaha bikomeye. Ushobora no kuba wararezwe n’ababyeyi b’Abakristo bakagufasha gukunda Yehova. Ese icyo gihe nabwo ni ngombwa ko wihana kandi ukabatizwa kugira ngo Imana ikwemere? Yego rwose. Twese tuvuka turi abanyabyaha, kandi ibyo bituma tudashobora kuba incuti z’Imana (Zab. 51:5). Ariko uko tugenda turushaho kumenya Yehova, bituma dufata umwanzuro wo gukora ibyo ashaka aho gukora ibyo twe dushaka. Tubabazwa cyane n’ibyaha byose twakoze, kandi tukareka gukora ibintu bibabaza Imana, maze tugatangira kubaho dukora ibishimisha Papa wacu wo mu ijuru. Icyo gihe tuba dushobora kubatizwa.—Ibyak. 3:19.

10. Wagombye gukora iki niba wari warabatirijwe mu rindi dini?

¹⁰ Niba warabatijwe ukiri mu rindi dini, nabwo ugomba kongera kubatizwa kugira ngo ube Umuhamya wa Yehova. Kubera iki? Ni ukubera ko icyo gihe utari usobanukiwe neza ukuri ku byerekeye Yehova na Yesu. Kandi niba icyo gihe waranasenze Imana uyisezeranya ko uzayikorera, ntiwabikoze usobanukiwe ibyo ishaka. Igihe Pawulo yageraga muri Efeso akahasanga abantu bari barabatijwe ariko badasobanukiwe inyigisho za gikristo, yabasabye kongera kubatizwab (Ibyak. 19:​1-5). No muri iki gihe, umubatizo ugira agaciro ari uko gusa umuntu abatijwe asobanukiwe neza inyigisho z’ukuri zituruka ku Mana n’ibyo ishaka.

‘KUBATIZWA MU IZINA RYA PAPA WO MU IJURU, IRY’UMWANA N’IRY’UMWUKA WERA’

11. ‘Kubatizwa mu izina rya Papa wo mu ijuru n’iry’Umwana n’iry’umwuka wera,’ bisobanura iki? (Matayo 28:​18-20)

¹¹ Yesu yasabye abari kuzajya baba abigishwa be ko bajya ‘babatizwa mu izina rya Papa wo mu ijuru n’iry’Umwana n’iry’umwuka wera.’ (Soma muri Matayo 28:​18-20.) Ni iki yashakaga kuvuga? Muri Bibiliya, ijambo “izina” akenshi ryerekeza ku kuntu abandi babona umuntu. Nanone rishobora kwerekeza ku mwanya n’ububasha uwo muntu afite. Ubwo rero iyo tubatijwe mu izina rya Yehova n’irya Yesu, biba bisobanuye ko tuzi neza ko bafite uburenganzira n’ububasha byo kutubwira icyo tugomba gukora. Nanone iyo tubatijwe mu izina ry’umwuka wera, biba bisobanuye ko twemera ubuyobozi bwawo. Reka noneho dusuzume twitonze uko ibyo twabikora.

12. Ni mu buhe buryo tubatizwa mu izina rya Papa wo mu ijuru? (Ibyahishuwe 4:11) (Reba n’amafoto.)

¹² Tubatizwa mu izina rya Papa. Ibyo bisobanura ko tuba twemera tudashidikanya ko Yehova ari Papa wacu wo mu ijuru, waduhaye ubuzima. Twemera ko ari Imana Ishoborabyose, akaba n’Umuremyi w’ibintu byose. (Soma mu Byahishuwe 4:11.) Nanone tuzi ko ari we wumva amasengesho, kandi dukoresha izina rye mu gihe dusenga no mu gihe tubwira abandi ibimwerekeye (Zab. 65:2). Icyakora hari ikindi kintu tugomba kuba twemera tudashidikanya. Abantu bari bateze amatwi Petero kuri Pentekote, bari basanzwe bazi Yehova ariko bari bakeneye kumenya neza ko atanga ubuzima bw’iteka binyuze kuri Yesu Kristo wenyine.—Rom. 5:8.

13. Ni mu buhe buryo tubatizwa mu izina ry’Umwana? (Reba n’amafoto.)

¹³ Tubatizwa mu izina ry’Umwana. Ibyo bisobanura ko tuba dusobanukiwe neza ko Yesu ari Umwana w’Imana. Twemera tudashidikanya ko Yesu ari ‘inzira,’ ni ukuvuga ko ari we wenyine ushobora kudufasha kuba incuti za Yehova (Yoh. 14:6). Nanone tuba twemera ko Yesu ari we wadupfiriye kugira ngo tuzabone ubuzima. Kumenya ibyo, bituma twiyemeza kumwigana mu mibereho yacu ya buri munsi, atari ku munsi wo kubatizwa gusa (1 Yoh. 2:6). Ubwo rero kimwe na Yesu, ntitwemera ko hari ikintu cyatubuza gukora umurimo wo kubwiriza (Luka 4:43). Nanone twemera kwihanganira ibigeragezo kugira ngo dukorere Imana mu budahemuka (2 Tim. 3:12). Twumvira Yesu kubera ko ari “umutware w’itorero.” Ibyo bituma twishimira kumvira abo yashyizeho kugira ngo bayobore abigishwa be kandi babiteho.—Efe. 4:​8, 11, 12; 5:23.

14. (a) Ni mu buhe buryo tubatizwa mu izina ry’umwuka wera? (Reba n’amafoto.) (b) Ni iyihe mibatizo yindi abasutsweho umwuka babatizwa? (Reba agasanduku gafite umutwe uvuga ngo: “Imibatizo abasutsweho umwuka babatizwa.”)

¹⁴ Tubatizwa mu izina ry’umwuka wera. Ibyo bisobanura ko tuba twemera ukuri ku byerekeye umwuka wera. Umwuka wera si umuperisona cyangwa umwe mu bagize Ubutatu butagatifu. Ahubwo ni imbaraga Imana ikoresha. Nanone dusobanukiwe ko umwuka wera ari wo wayoboraga abahanuzi n’abanditse Bibiliya. Ibyo bituma dusoma Bibiliya buri gihe kandi tugakurikiza ibyo yigisha (2 Pet. 1:​20, 21). Ikindi kandi, twirinda gukora ibyaha bikomeye kuko bishobora gutuma Imana itaduha umwuka wayo wera kandi ntiwuhe n’itorero.—Efe. 4:30.

15. Ni iki dukwiriye kwiyemeza?

¹⁵ Niba warabatijwe, jya ukomeza kwiyibutsa impamvu kubatizwac ari iby’ingenzi cyane, kandi ukomeze kwibuka ibyo wasezeranyije Yehova igihe wamwiyeguriraga maze ukabatizwa. Wakora iki se niba utarabatizwa? Ese hari ikikubuza kubikora? Mu gice gikurikira, tuzareba uko wakuzuza ibisabwa kugira ngo ubatizwe.