Umwaka wa 2023 waranzwe n’ingorane: Bibiliya ibivugako iki?

Ibintu vyabaye hirya no hino kw’isi mu 2023, birerekana ko tubayeho mu kiringo Bibiliya yita «imisi ya nyuma.» (2 Timoteyo 3:1) Nurabe ingene ibiriko biraba bihuye n’ibintu Bibiliya yari yaravuze ko vyobaye muri iki gihe.

Ibintu Bibiliya yari yaravuze ko vyobaye

«Intambara n’amakuru y’intambara.»​—Matayo 24:6.

•  «Imishamirano ikomeye iriko iriyongera ahantu henshi kw’isi.»a

«Vya nyamugigima biva hamwe bija ahandi.»​—Mariko 13:8.

•  «Kuva mu ntango z’umwaka wa 2023, harabaye ibinyamugigima bikomakomeye 13 hirya no hino kw’isi, ico akaba ari kimwe mu bitigiri biri hejuru vya nyamugigima zabaye mu mwaka umwe, kuva batanguye kubika amakuru ajanye n’ibinyamugigima vyagiye biraba.»b

«Ibintu biteye ubwoba.»​—Luka 21:11.

•  «Igihe c’ubushuhe kw’isi yose carangiye; ubu hoho haje igihe co kwaka kubera ubushuhe bukaze.»​—Vyavuzwe na António Guterres, umunyamabanga mukuru wa ONU.c

«Inzara.»​—Matayo 24:7.

•  «Mu mwaka wa 2023, abantu ntiborohewe kuronka ibitunga imiryango yabo.»d

«Ibihe bitoroshe kandi bigoye kwihanganira.»​—2 Timoteyo 3:1.

•  «Hirya no hino kw’isi, umuntu umwe mu bantu umunani arafise ingorane kanaka yo mu mutwe.»e

Twokwitega iki mu 2024?

Nta n’umwe yoshobora kuvuga atihenda ibizoba mu 2024. Ariko ibiriko biraba kw’isi birerekana ko Ubwami bw’Imana, ni ukuvuga intwaro yo mw’ijuru, bugiye gusubirira intwaro z’abantu, maze bukureho ibintu vyose bituma abantu bashikirwa n’ingorane be n’amaganya.​—Daniyeli 2:44; Ivyahishuwe 21:4.

Mu kurindira, igihe twumva dufise amaganya, nidusabe Imana idufashe. Bibiliya ivuga iti:

«Ni wewe nizigira igihe mfise ubwoba.»​—Zaburi 56:3.

Twokwerekana gute ko twizigira Imana? Turagusavye urondere kumenya n’ibindi Bibiliya isezerana ku bijanye n’ingene muri kazoza ingorane zose zizoba zakuweho. Nugerageze kwiga Bibiliya natwe ata co urishe kugira ubone ingene ivyo Bibiliya isezerana bishobora kugirira akamaro wewe n’umuryango wawe.