URWARUKA RURIBAZA
Noba nkwiye guheba ishure?
«Ndanka ishure ga yemwe!» Nimba wanka ishure, ushobora kuba wumva woriheba. Iki kiganiro kirakwereka ibindi bintu vyiza wokora, aho guheba ishure.
Igituma hari abaheba ishure
Ng’izi imvo zimwezimwe abigisha batanga:
Amanota mabi. «Nguma ndonka amanota mabi.»
Kutavyitaho. «Ivyo niga mbona ata kamaro bifise.»
Ubukene. «Mbwirizwa kurondera utwo nkora kugira mfashe umuryango.»
Zirikana ingaruka
Bibiliya ivuga iti: «Umuntu yiyubara aritondera intambuko ziwe.» (Imigani 14:15) Icigwa ni ikihe? Nimba uriko uriyumvira guheba ishure, nuzirikane witonze ingaruka.
Niwibaze uti:
«Nintaheza amashure, vyoba bizonyorohera kuronka akazi?»
«Niwibuke ko umusi uri izina uzobwirizwa kurondera akazi kugira uronke igitunga umuryango. Wobigenza gute usanze abakoresha nka bose basaba ko umuntu aba yarahejeje n’imiburiburi amashure yisumbuye kugira bamuhe akazi?»—Julia.
«Hamwe noheba ishure, vyoba bizonyorohera kwihanganira ingorane zizonshikira muri kazoza?»
«Ishure riragutegura mu buzima. Muri kazoza, uzohura n’abantu batandukanye, ushikirwe n’ibigeragezo wongere ukore ibikorwa bisa neza na neza n’ivyagushikiye kw’ishure.»—Daniel.
«Hamwe noheba ishure, noba nzoronka ubuhanga nzokenera ninakura?»
«Ubu ushobora kubona ko umenga ishure nta kamaro rifise, ariko niwashikana imyaka 23 ugatangura kugerageza gukoresha neza amahera yawe, uzokwibwira uti: “Nagize neza gukurikira icigwa c’ibiharuro.”»—Anna.
Ikintu ciza wokora
Nusabe imfashanyo. Bibiliya ivuga iti: «Abajanama benshi batuma ibintu bigenda neza.» (Imigani 11:14) Nimba uguma uronka amanota mabi, niwiture umuvyeyi, umwigisha canke uwundi muntu akuze wizigiye akwereke ivyo woryohora.
«Nimba biriko birakugora, nuganire n’umwigisha wawe. Hari igihe woba wibaza ko ingorane ihagaze kuri uwo mwigisha, ariko akenshi gusaba imfashanyo gusa birashobora gutuma ibintu bigenda neza.»—Edward.
Niwiyumvire ingene ishure rizokugirira akamaro muri kazoza. Bibiliya ivuga iti: «Iherezo ry’ikintu riruta intango yaco.» (Umusiguzi 7:8) Niwaheza amashure, uzoba waratsimbataje kamere n’ubuhinga biruta kure n’iyo ivyo wize mw’ishure.
«Niwakura ntuzoza uratunganya ibisomwa canke ngo ukore ibibazo, ariko ukuntu uvyifatamwo mu bintu bitesha umutwe kw’ishure biragutegura ku bw’ingorane zishobora kuzogushikira niwaheza amashure.»—Vera.
Guheba ishure bimeze nko kuva mu bwato butarashika ku nkengera. Uricuza icatumye ubuvamwo!
Nuzirikane witonze ingingo ufata. Bibiliya ivuga iti: «Abihutagiza bose bibashikana ku bukene.» (Imigani 21:5) Ntiwihutire kubona ko ata kindi wokora atari guheba ishure. Urashobora kurangiza amashure yawe mu gukurikirana ivyigwa vyigishwa biciye ku buhinga bwa none.
«Ishure rirakwigisha gukora cane, gutorera umuti ingorane no gukorana neza n’abandi. Kwiga biravamwo ivyiza bimara igihe kirekire. Birabereye ko wihata ugaheza amashure.»—Benjamin.
Iciyumviro nyamukuru: Niwaheza amashure, uzoba wize ibintu vyinshi bizogufasha mu buzima niwakura.