Niwamamaze Inkuru Nziza Ubishashaye
1 “Nifuza kubabona, . . . [nshashaye] kubabgira ubutumwa bgiza namwe.” Uko ni ko intumwa Paulo yavuze mu ntango y’ikete yandikiye abavukanyi b’i Roma. Ni kuki none Paulo yari ashashaye kubagendera? Yavuze ati: “Mbone imbuto muri mwebge . . . Kuk’ubutumwa bgiza butantera isoni, ar’ubushobozi bg’Imana, buzan[a] . . . agakiza.”—Rom. 1:11-16.
2 Paulo yagaragaje uwo mushasharo nyene igihe yariko aravugana na ba bakurambere b’i Efeso. Yabibukije ati: “Uhereye umusi natanguriye gushika muri Asiya, . . . [sinaretse] . . . kubigishiriza [ku mugaragaro no] mu nzu no mu yindi. Nashinze intahe mu Bayuda no mu Bagiriki.” (Ivyak. 20:18-21) Mu karere kose Paulo yari yarakebewe ngo agakoreremwo, yari afise intumbero yo gukwiragiza inkuru nziza y’agakiza no kuronka ivyamwa vy’Ubwami. Ese ingene ako ari agatima keza twokwigana!
3 Dushobora kwibaza duti: ‘Ubwo noba ngaragaza yuko nk’ukwo nyene nshashaye kwamamaza inkuru nziza mu bantu bo mu karere iwacu? Aho kubona igikorwa co kwamamaza inkuru nziza nk’ibwirizwa gusa, noba nshashaye gushikiriza inkuru nziza abantu benshi bashoboka? Noba nararimbuye mw’isengesho uko ivyanje vyifashe? Noba naragerageje uburyo bwose buriho mu karere twakebewe, nk’ukwamamaza inkuru nziza urugi ku rundi, mw’ibarabara, mu bibanza vy’ubucuruzi, nkoresheje terefone aho bishoboka no mu gihe akaryo kizanye?’
4 Nukore Ubishashaye Muri Ndamukiza: Ukwezi kwa Ndamukiza ni igihe ciza co kurushiriza kugira uruhara mu gikorwa co kwamamaza inkuru nziza. Kubera ko ya masaha asabwa yageruwe, bikwiye gutuma benshi kuruta bashobora gukora ubutsimvyi bwo gufasha. Kumbure ukuntu ivyawe vyifashe kuzotuma ushobora gukora ubutsimvyi bwo gufasha muri Ndamukiza na Rusama. Canke hari aho woshobora kwiyandikisha ukaba umutsimvyi w’intahorereza kubera ya masaha asabwa yahinduwe. Niba uri umwamamaji w’ishengero, muri uku kwezi no mu gukurikira woba ushobora kumara mu murimo umwanya munini kuruta uwo usanzwe uwumaramwo, gutyo ube ufashe mu mugongo abashobora gukora ubutsimvyi? Ivyo vyonezereza umutima wa Yehova!
5 Nka kumwe kwa Paulo, abamamaji b’ishengero bose bakwiye kubandanya kugaragaza umushasharo mu kwongereza umwete mu gikorwa co kwamamaza inkuru nziza. Nitwakora uko dushoboye kwose mu gikenurwa, bizotuzanira umunezero nyakuri. Paulo yaranezererwa umurimo mweranda yarangura. Ni vyiza ko twigana akarorero gahebuje yatanze.—Rom. 11:13; 1 Kor. 4:16.