Nukunde ubugororotsi n’umutima wawe wose

“Wakunze ubugororotsi.”​—ZAB. 45:7.

1. Ni igiki kizodufasha guca mu “mihora y’ubugororotsi”?

YEHOVA abicishije kw’Ijambo ryiwe no ku mpwemu nyeranda yiwe, ariko arayobora abasavyi biwe mu “mihora y’ubugororotsi.” (Zab. 23:3) Ariko rero kubera ko turi abanyagasembwa, usanga dufise impengamiro yo gukevya tukava muri iyo nzira. Kugira ngo dusubire gukora ibigororotse bisaba ko tugira utwigoro dukomeye. Ni igiki none kizodufasha kuroranirwa? Nka kumwe kwa Yezu, dutegerezwa gukunda gukora ibigororotse.​—Soma Zaburi 45:7.

2. “Imihora y’ubugororotsi” ni iki?

² None “imihora y’ubugororotsi” ni iki? Umuhora ni akayira. Iyo “mihora” igereranya ingingo mfatirwako za Yehova zerekeye ubugororotsi. Mu giheburayo no mu kigiriki, ijambo “ubugororotsi” ryerekeza ku kintu ‘kigororotse,’ rikaba rishaka kuvuga ukwumira ku ngingo ngenderwako zigenga ikibereye n’ikitabereye. Kubera ko Yehova ari we “hantu ho kuba h’ubugororotsi,” abasavyi biwe barahimbarwa no kumuhanga amaso kugira ngo abashingire inzira igororotse bakwiye gucamwo.​—Yer. 50:7.

3. Dushobora gute kwiga vyinshi ku vyerekeye ubugororotsi bw’Imana?

³ Nitwihatira n’umutima wacu wose guhuza n’ingingo mfatirwako z’Imana zigororotse, ni ho gusa tuzoba turiko turayihimbara mu buryo bushitse. (Gus. 32:4) Ivyo bitangurira ku kwiga ivyo dushoboye vyose ku vyerekeye Yehova Imana biciye kw’Ijambo ryiwe Bibiliya. Uko turushiriza kwiga ibimwerekeye, tukarushiriza kumwiyegereza buri musi, ni ko tuzorushiriza gukunda ubugororotsi bwiwe. (Yak. 4:8) Dutegerezwa kandi kwemera kuyoborwa n’Ijambo ry’Imana ryahumetswe igihe bibaye ngombwa ko dufata ingingo zihambaye mu buzima.

Nurondere ubugororotsi bw’Imana

4. Kurondera ubugororotsi bw’Imana birimwo n’iki?

⁴ Soma Matayo 6:33. Kurondera ubugororotsi bw’Imana birimwo n’ibindi uretse kumara umwanya turiko turamamaza inkuru nziza y’Ubwami. Kugira ngo Yehova yemere umurimo mweranda tumurangurira, ukuntu twigenza ku musi ku musi gutegerezwa kuba guhuye n’ingingo mfatirwako ziwe ziri hejuru. None abo bose bariko bararondera ubugororotsi bwa Yehova bategerezwa gukora iki? Bategerezwa “[kw]ambara wa muntu mushasha yaremwe hisunzwe ukugomba kw’Imana mu bugororotsi bw’ukuri no mu kudahemuka kw’ukuri.”​—Ef. 4:24.

5. Ni igiki kizodufasha gutsinda ugucika intege?

⁵ Uko twihatira kubaho twisunga ingingo mfatirwako zigororotse z’Imana, vyoshobora gushika tugacika intege kubera amakosa yacu. Ni igiki none codufasha gutsinda ugucika intege gutuma tugoyagoya maze tukiga gukunda ubugororotsi no gukora ibijanye na bwo? (Imig. 24:10) Dutegerezwa kwama twiyegereza Yehova mw’isengesho “dufise imitima nyakuri, dufise ugushira amazinda gukwiye kuvuye ku kwizera.” (Heb. 10:19-22) Twaba turi abakirisu barobanuwe canke dufise icizigiro co kuzoba kw’isi, turizera inkuka y’incungu ya Yezu Kristu n’ibikorwa arangura ari Umuherezi Mukuru wacu ahambaye. (Rom. 5:8; Heb. 4:14-16) Intumwa Yohani yanditse ati: “Amaraso ya Yezu . . . aratwoza igicumuro cose.” (1 Yoh. 1:6, 7) Vyongeye, Bibiliya ivuga yuko naho ibicumuro vyacu “vyoba bimeze nk’agahama, bizogirwa ivyera derere.” Mbega intunganyo nziza igitangaza Yehova yadushiriyeho biciye ku nkuka y’incungu y’Umwana wiwe akunda!​—Yes. 1:18.

Nusuzume ibirwanisho vyawe vyo mu buryo bw’impwemu

6. Ni kubera iki bihambaye cane ko dusuzuma ibirwanisho vyacu vyo mu buryo bw’impwemu?

⁶ Turakeneye kwama twambaye “ubugororotsi nk’igikingirizo c’igikiriza,” kubera ko ari ikirwanisho gihambaye cane muri vya birwanisho vyo mu buryo bw’impwemu biva ku Mana. (Ef. 6:11, 14) Twaba duherutse kwiyegurira Yehova canke tukaba tumaze imyaka mirongo turangura umurimo mweranda, birahambaye cane ko dusuzuma ibirwanisho vyacu vyo mu buryo bw’impwemu ku musi ku musi. Uti kubera iki? Kubera ko Shetani n’amadayimoni yiwe bakororewe mu micungararo y’isi. (Ivyah. 12:7-12) Shetani ishavu riraniga kandi arazi ko asigaje igihe gito. Ni co gituma yongereje ibitero agaba ku basavyi b’Imana. Twoba tubona ko bihambaye kwambara “ubugororotsi nk’igikingirizo c’igikiriza”?

7. Tuzokwigenza gute nimba dutahura ko dukeneye kwambara “ubugororotsi nk’igikingira igikiriza”?

⁷ Igikingirizo c’igikiriza kirakingira umutima nya mutima. Kubera ko turi abanyagasembwa, usanga umutima wacu w’ikigereranyo ufise impengamiro yo kuba umuhemu no kuba mubi cane. (Yer. 17:9) Kubera yuko umutima wacu ufise impengamiro yo gukora ikibi, birahambaye ko umenyerezwa ukongera ugatozwa indero. (Ita. 8:21) Nimba dutahura ko dukeneye kwambara “ubugororotsi nk’igikingirizo c’igikiriza,” ntituzoza turabwambura mu guhitamwo ibintu vyo kwinezereza Imana yanka; eka kandi ntituzokwirekerana ngo twihe ishusho turiko turakora ikintu kibi. Ntituzopfisha ubusa umwanya twategekanirije ibintu vy’agaciro mu kuraba televiziyo. Ahubwo tuzoguma twita ku rutare kugira ngo dukore ibihimbara Yehova. Naho vyoshika tugatsitara mu kumara umwanya muto twatwawe n’ivyiyumviro vy’umubiri bitagororotse, twosubira guhaguruka tubifashijwemwo na Yehova.​—Soma Imigani 24:16.

8. Ni kubera iki dukeneye “inkinzo yagutse y’ukwizera”?

⁸ Muri vya birwanisho vyacu vyo mu buryo bw’impwemu harimwo n’“inkinzo yagutse y’ukwizera.” Iradushoboza “kuzimya imyampi yose yaka umuriro ya wa mubisha.” (Ef. 6:16) Ukwizera be n’ugukunda Yehova n’umutima wacu wose na vyo biradufasha gukora ibijanye n’ubugororotsi no kuguma mu nzira ijana mu buzima budahera. Uko turushiriza kwiga gukunda Yehova, ni ko tuzorushiriza guha agaciro ubugororotsi bwiwe. Mugabo tuvuge iki ku bijanye n’ijwi ryacu ryo mu mutima? Ridufasha gute mu twigoro tugira two gukunda ubugororotsi?

Nugume ufise ijwi ryo mu mutima ryiza

9. Twungukira gute ku kuguma dufise ijwi ryo mu mutima ryiza?

⁹ Igihe twabatizwa, twarasavye Yehova “ijwi ryo mu mutima ryiza.” (1 Pet. 3:21) Kubera ko twizera incungu, amaraso ya Yezu arapfuka ibicumuro vyacu gutyo tukaba abadahumanye imbere y’Imana. Ariko rero, kugira ngo tugume turi abantu badahumanye, turakeneye kuguma dufise ijwi ryo mu mutima ryiza. Nimba bishika ijwi ryacu ryo mu mutima rikatwagiriza canke rikatugabisha, turakwiye gukenguruka kuba rikora neza. Ivyo vyerekana yuko ijwi ryacu ryo mu mutima ritatimvye ku bijanye n’inzira za Yehova zigororotse. (1 Tim. 4:2) Ariko rero, ijwi ryo mu mutima rirashobora kurangura urundi ruhara ku bantu bipfuza gukunda ubugororotsi.

10, 11. (a) Niwigane ikintu cabaye cerekana igituma dukwiye kwumvira ijwi ryacu ryo mu mutima ryamenyerejwe na Bibiliya. (b) Ni kubera iki gukunda ubugororotsi bishobora gutuma tunezerwa cane?

¹⁰ Igihe dukoze ikintu kibi, ijwi ryacu ryo mu mutima ryoshobora kutwagiriza canke kutubuza amahoro. Hari uwukiri muto umwe yakebeje arava mu mihora canke mu nzira y’ubugororotsi. Yariziziwe n’ivyo kuraba amashusho yerekana ubushegabo yongera aratangura kunywa ikiyayuramutwe citwa marijuwana. Kubera ko yumva yiyagirije igihe yaba agiye ku makoraniro akongera akumva ko ari umwiyorobetsi igihe yaba ariko aragira uruhara mu murimo wo mu ndimiro, yaciye ahagarika kugira uruhara muri ivyo bikorwa vya gikirisu. Yavuze ati: “Mugabo sinari nzi na gato yuko ijwi ryanje ryo mu mutima ryogize ico rimbaza ku vyo nari narakoze.” Yongeyeko ati: “Ubupfu bwanje bwamaze nk’imyaka ine.” Yaciye atangura kuzirikana ivyo kugaruka mu kuri. Naho yiyumvira ko Yehova atokwumvirije isengesho ryiwe, nticabujije ko amusenga amusaba ngo amubabarire. Haciye iminuta idashika kuri cumi, nyina wiwe yaramugendeye maze amuremesha kugaruka ku makoraniro. Yaragiye ku Ngoro y’Ubwami hanyuma arasaba umukurambere umwe ngo amugirire inyigisho ya Bibiliya. Mu nyuma, yarabatijwe kandi ubu arakengurukira Yehova kuba yararokoye ubuzima bwiwe.

¹¹ Ntitumaze kwibonera none yuko iyo dukoze ibigororotse twironkera umunezero mwinshi? Uko twiga gukunda ubugororotsi tukongera tugakora ibijanye na bwo mu buryo burushirije kuba ubushitse, ni ko gukora ibihimbara Data wa twese wo mw’ijuru bizorushiriza kutunezera. Zirikana kandi iki kintu: Igihe kiri mu gushika aho ijwi ryo mu mutima ry’abantu bose rizotuma bagira inyiyumvo z’umunezero gusa; bazogaragaza ishusho y’Imana mu buryo butagira agahaze. Ku bw’ivyo, nimuze dutsimbataze ibwina mu mutima wacu ugukunda ubugororotsi maze tunezereze Yehova.​—Imig. 23:15, 16.

12, 13. Twomenyereza gute ijwi ryacu ryo mu mutima?

¹² Twokora iki none kugira ngo tumenyereze ijwi ryacu ryo mu mutima? Igihe twiga Ivyanditswe n’ibisohokayandikiro vyacu bishingiye kuri Bibiliya, birahambaye ko twibuka ko “umutima w’umugororotsi [u]zirikana kugira ngo wishure.” (Imig. 15:28) Rimbura ukuntu ivyo bitugirira akamaro igihe duhanganye n’ibibazo bijanye n’akazi. Igihe akazi kanaka gateye kubiri mu buryo butomoye n’ivyo Ivyanditswe bisaba, benshi muri twebwe turihutira gushira mu ngiro ubuyobozi duhabwa biciye ku mugwi wa wa mushumba w’umwizigirwa kandi w’ubwenge. Ariko rero igihe biba bidatomoye yuko akazi kanaka koba kemewe canke katemewe, tuba dukeneye kurondera ingingo ngenderwako zo muri Bibiliya zivuga ibijanye n’ako kazi maze tukazizirikana tubijanisha n’isengesho.a Ivyo birerekeye ingingo ngenderwako zimwezimwe nk’imwe ivuga ko dukeneye kwirinda gukomeretsa amajwi yo mu mutima y’abandi. (1 Kor. 10:31-33) Turakwiye canecane kwitwararika ingingo ngenderwako zerekeye ubucuti dufitaniye n’Imana. Nimba Yehova atari umugani kuri twebwe, tuzobanza kwibaza duti: ‘Gukora aka kazi vyoba vyobabaza Yehova, bigatuma atuntura?’​—Zab. 78:40, 41.

¹³ Igihe turiko turategura Inyigisho y’Umunara w’Inderetsi canke Inyigisho ya Bibiliya y’ishengero, turakwiye kwibuka yuko dukeneye kuzirikana amakuru yashikirijwemwo. Twoba dusanga twama duca akarongo tunyarutsa ku nyishu y’ikibazo kijanye n’ingingo maze tugaca tuja ku yikurikira? Birashoboka ko mwene ivyo biringo vy’ukwiga bitodufasha kurushiriza gukunda ubugororotsi canke gutsimbataza muri twebwe ijwi ryo mu mutima rikora neza. Nimba twipfuza gukunda ubugororotsi, turakeneye kwiga n’ubwira tukongera tukazirikana ivyo dusoma mw’Ijambo ry’Imana ryanditse. Ku bijanye no kwiga gukunda ubugororotsi n’umutima wacu wose, ntidukwiye kurondera kwiyorohereza!

Gusonza no kunyoterwa ubugororotsi

14. Yehova Imana na Yezu Kristu bipfuza ko tumererwa gute ku vyerekeye umurimo mweranda twashinzwe?

¹⁴ Yehova Imana na Yezu Kristu bipfuza ko duhimbarwa uko turangura umurimo mweranda twashinzwe. Ni igiki none kizotuma duhimbarwa? Nta kindi atari ugukunda ubugororotsi! Muri ya Nsiguro yo ku Musozi, Yezu yavuze ati: “Hahiriwe abashonje kandi banyotewe ubugororotsi, kuko bazohazwa.” (Mat. 5:6) Ayo majambo asobanura iki ku bantu bafise icipfuzo co gukunda ubugororotsi?

15, 16. Ni mu buryo butandukanye ubuhe abashonje kandi banyotewe mu buryo bw’impwemu bashobora guhazwa?

¹⁵ Isi tubamwo itwarwa na wa mubisha. (1 Yoh. 5:19) Iyo dutoye ikinyamakuru mu gihugu ico ari co cose, dusangamwo amakuru avuga ibikorwa vy’ubunyamaswa be n’ubukazi bigirwa ku rugero rutari bwigere rubaho. Ukuntu umuntu afata uwundi bunyamaswa birahagarika umutima cane ku buryo umuntu w’umugororotsi atipfuza kubiraba. (Umus. 8:9) Twebwe abakunda Yehova, turazi yuko abantu bashonje kandi banyotewe mu vy’impwemu bipfuza kwiga ivy’ubugororotsi ari bo gusa ashobora guhaza. Abantu batibanga Imana bagiye gukurwaho, abakunda ubugororotsi na bo ntibasubire gushikirwa n’imibabaro iterwa n’abantu batibanga amategeko be n’ibikorwa vyabo bibi. (2 Pet. 2:7, 8) Ese ukuntu bazoba baruhuriwe!

¹⁶ Kubera ko turi abasavyi ba Yehova tukaba n’abayoboke ba Yezu Kristu, turatahura yuko abashonje kandi banyotewe ubugororotsi “bazohazwa.” Bazohimbarwa bimwe bishitse biciye ku ntunganyo Imana yashizeho yerekeye amajuru mashasha be n’isi nshasha aho “ubugororotsi buzoba.” (2 Pet. 3:13) Nimuze rero ntiducike intege canke ngo dutangazwe n’uko agahahazo be n’ubukazi vyakuyeho ubugororotsi muri iyi si ya Shetani. (Umus. 5:8) Yehova we Musumbavyose arazi ibiriko biraba kandi vuba azorokora abakunda ubugororotsi.

Ivyiza biva ku gukunda ubugororotsi

17. Bimwebimwe mu vyiza biva ku gukunda ubugororotsi ni ibihe?

¹⁷ Muri Zaburi 146:8 harashimika ku vyiza bihambaye biva ku gukurikira inzira y’ubugororotsi. Uwo mwanditsi wa Zaburi yaririmvye ati: “Yehova arakunda abagororotsi.” Iyumvire ntuze ico kintu! Segaba w’ibiriho vyose aradukunda kubera ko dukunda ubugororotsi! Kubera yuko Yehova adukunda, turizigira yuko azoturonsa ivyo dukeneye uko tuguma dushira ivyungura Ubwami mu kibanza ca mbere mu buzima bwacu. (Soma Zaburi 37:25; Imigani 10:3.) Amaherezo, iyi si yose uko ingana izobako abantu bakunda ubugororotsi. (Imig. 13:22) Impêra benshi mu basavyi b’Imana bazoronka kubera ko bazoba barakoze ivy’ubugororotsi ni umunezero mwinshi be n’ubuzima butagira iherezo mw’Iparadizo nziza igitangaza yo kw’isi. Mbere no muri iki gihe, abakunda ubugororotsi bw’Imana barironkera amahoro yo mu mutima atuma mu miryango yabo no mu mashengero barimwo harangwa ubumwe.​—Flp. 4:6, 7.

18. Ni ibintu vyiza ibihe twokora uko turindira umusi wa Yehova?

¹⁸ Uko turindira yuko umusi uhambaye wa Yehova ushika, dutegerezwa kubandanya kurondera ubugororotsi bwiwe. (Zef. 2:2, 3) Nimuze rero tugaragaze ko dukunda bivuye ku mutima inzira za Yehova Imana zigororotse. Ivyo birimwo kuguma twambaye neza “ubugororotsi nk’igikingirizo c’igikiriza” kugira ngo dukingire umutima wacu w’ikigereranyo. Turakeneye kandi kuguma dufise ijwi ryo mu mutima ryiza, rino rikaba rizotuma tugira umunezero rikongera rikanezereza umutima w’Imana yacu.​—Imig. 27:11.

19. Dukwiye kwiyemeza gukora iki, kandi ni igiki tuzoca irya n’ino mu kiganiro gikurikira?

¹⁹ “Amaso [ya Yehova] anyuragira mw’isi yose kugira ngo yerekane inkomezi ziwe ku bw’abafise umutima ukwiye kuri we.” (2 Ngo. 16:9) Ese ukuntu ayo majambo aduhumuriza uko dukora ibigororotse duhanganye n’ibintu biguma bihindagurika, ubukazi be n’ububisha birushiriza kwongerekana muri iyi si irimwo akajagari! Ego ni ko, inzira zacu zigororotse zoshobora kuzazanira abantu amasinzi biyonkoye ku Mana. Mugabo turironkera ivyiza vyinshi mu kwisunga ubugororotsi bwa Yehova. (Yes. 48:17; 1 Pet. 4:4) Ku bw’ivyo rero, tubigiranye umutima ukwiye, nimuze twiyemeze kubandanya twironkera umunezero mu gukunda ubugororotsi n’umutima wacu wose no mu gukora ibijanye na bwo. Ariko rero, kugira umutima ukwiye birimwo no kwanka ubugarariji. Ikiganiro gikurikira kizotwereka ico ivyo bisobanura.

[Akajambo k’epfo]

Wokwishura gute?

• Ni kubera iki guha agaciro incungu ari nkenerwa kugira ngo dukunde ubugororotsi?

• Ni kubera iki bihambaye ko twambara “ubugororotsi nk’igikingirizo c’igikiriza”?

• Dushobora gute kumenyereza ijwi ryacu ryo mu mutima?

[Ifoto ku rup. 26]

Ijwi ryo mu mutima ryamenyerejwe riradufasha gutorera inyishu ibibazo bijanye n’akazi