Nguma mfise vyinshi nkora mw’ishirahamwe rya Yehova

Nk’uko vyavuzwe na Vernon Zubko

NAKURIYE kw’iyororero-rimiro ryari hafi y’i Stenen, kino kikaba ari ikigwati co mu ntara ya Saskatchewan muri Kanada. Abavyeyi banje Fred na Adella barakora bagatama kugira ngo baturonse ivyo twaba dukeneye mu vy’impwemu no mu vy’umubiri twe na mushikanje mukuru Aurellia hamwe na batoyi banje ari bo Alvin, Allegra na Daryl. Gushika n’ubu turacakengurukira abavyeyi bacu kuba baratwigishije ukuri.

Dawe, uno akaba yari umukirisu yarobanuwe, yari umwamamazanjili adatinya. Yarakora agatama kugira ngo aronke ibitubeshaho, ariko kandi yaritwararika ivy’uko abantu bose bamenya ko yari Icabona. Yama ariko aravuga ivyerekeye ukuri. Sinzokwigera nibagira umwete n’umutima rugabo yari afise. Akenshi yarambwira ati: “Nugume ufise vyinshi ukora mw’ishirahamwe rya Yehova maze uzokwirinda ingorane nyinshi.”

Akenshi twaramamaza mw’ibarabara ry’i Stenen no mu micungararo y’aho. Ivyo ntivyama vyoroshe kuri jewe. Mu gisagara kimwekimwe cose wasanga hari abantu b’inkozi z’ikibi, bano bakaba baraza aho twebwe abakiri bato twaba turi bakadutyekeza. Igihe kimwe, nkaba nari mfise imyaka umunani, nari mpagaze aho ibarabara rikatira mfise Umunara w’Inderetsi na Be maso! nza mbona umugwi w’abakiri bato urankikuje. Baranshikuye agakofero gashasha nari nambaye maze bagashira ku giti cari gishinze inyuma yanje. Igishimishije ni uko hari umuvukanyi ageze mu za bukuru yari anshinze ijisho yabonye ivyariko biraba. Yaregeye maze abaza ati: “Vernon, habaye iki?” Utwo duhungu twaciye ubwo nyene dukamangana. Naho ico kintu cashitse cambabaje gatoyi, caranyigishije yuko igihe umuntu ariko aramamaza mw’ibarabara akwiye kuguma agenda aho kuguma ahagaze nk’igiti. Ico kintu canshikiye nkiri muto caratumye kandi ngira uburindutsi nari nkeneye kugira ngo namamaze inzu ku nzu.

Twe na Alvin twabatijwe muri Rusama 1951, nkaba nari mfise imyaka 13. Ndacibuka yuko umuvukanyi Jack Nathan, uno akaba ari we yatanze insiguro y’ibatisimu, yaduhimirije kutigera tureka ngo ukwezi guhere tutavuze ivyerekeye Yehova.a Mu muryango wacu, twama tubona ko umurimo w’ubutsimvyi ari wo mwuga mwiza kuruta iyindi yose twokurikirana. Ni co gituma mu 1958, maze guheza amashure, naciye nimukira i Winnipeg muri Manitoba kugira ngo nkore ubutsimvyi. Naho dawe yahimbarwa no gukorana nanje mu bikorwa umuryango wacu wakora ndi uwusena imbaho, we na mawe bararemesha cane ivyo gukora ubusuku bw’igihe cose kandi baranshigikiye igihe nimuka.

Ndonka aho kuba hashasha be n’uwundi dufashanya

Mu 1959, ibiro vy’ishami vyarasavye uwo wese yari abishoboye ngo yimukire i Québec, aho abamamazanjili bari bakenewe cane. Naciye nja gukorera ubutsimvyi i Montréal. Ese ukuntu ryari ihinduka rikomeye! Cari ikintu gishasha mu buzima bwanje kuko nariko ndiga kuvuga igifaransa no kumenyera imico kama itandukanye n’iy’iwacu. Umucungezi wacu w’umuzunguruko yambwiye ati: “Ntukigere uvuga ngo ‘uku ni ko twabikora iwacu.’” Iyo yari impanuro nziza.​—1 Kor. 9:22, 23.

Igihe nimukira i Québec nta mutsimvyi nari mfise twafashanya igikorwa. Ariko rero, mushiki wacu umwe akiri muto yitwa Shirley Turcotte, uno tukaba twari twaramenyaniye i Winnipeg, yarabaye umufasha wanje w’igihe cose igihe twubakana muri Ruhuhuma 1961. Na we nyene yava mu muryango wakunda Yehova. Naho ico gihe ntabitahura neza, yombereye isoko ry’inkomezi n’indemesho rihambaye cane mu myaka n’iyindi yokurikiye.

Tugira urugendo i Gaspé

Haciye imyaka ibiri tugize ubugeni, twaragenywe ngo tuje kuba abatsimvyi badasanzwe i Rimouski, i Québec. Ku mpeshi yakurikiye, ibiro vy’ishami vyaradusavye ngo tugire urugendo rwo kwamamaza hirya no h’ino mu gace k’isi kinjira mu mazi kitwa Gaspé, kano kakaba kari ku nkengera ya Kanada yo mu Buseruko. Igikorwa twari twashinzwe cari ico gutera imbuto z’ukuri nyinshi zishoboka. (Umus. 11:6) Twarapakiye umuduga wacu ibinyamakuru birenga 1.000 be n’ibitabu bishika 400, hamwe n’ibifungurwa be n’impuzu maze turatangura urwo rugendo twomazemwo ukwezi kwose turiko turamamaza. Twarakoreye mu buryo bwitondewe mu bigwati vyose bitobito vyo mu karere ka Gaspé. Iradiyo yo muri ako karere yaragabishije abantu yuko Ivyabona bariko baraza maze ibabwira ngo ntibakire ibitabu vyacu. Ariko rero, benshi mu baba muri ako karere bumvise nabi iryo tangazo maze bibaza yuko iyo radiyo yariko iramenyekanisha ibitabu vyacu, baca baravyakira.

Muri iyo myaka, ivyo kureka abantu bakamamaza vyasa n’aho ari bishasha mu bice bimwebimwe vy’i Québec, kandi abantu ntibari bamenyereye kubona abapolisi bahagarika umuntu. Ivyo vyarashitse mu gisagara kimwe aho twariko turatanga ibisohokayandikiro ku mihana nka yose. Umupolisi umwe yaradusavye ngo tujane na we ku gituro c’abapolisi, kandi twarabigize. Nahavuye menya ko umushikirizwamanza w’ico gisagara yari yatanze itegeko ry’uko batubuza kwamamaza. Kubera yuko umukuru w’igipolisi atari ho yari uwo musi, narashikirije uwo mushikirizwamanza ikete ririmwo ivyangombwa vyose rivuye ku biro vy’ishami vy’i Toronto ryasigura ibijanye n’uburenganzira bwacu bwo kwamamaza. Uwo mushikirizwamanza amaze gusoma iryo kete, yaciye avuga n’ingoga na n’ingoga ati: “Umve ndakubwire, jewe sinshaka ingorane. Umupatiri wo mw’iparuwasi ni we yambwiye ngo ndabahagarike.” Kubera ko twashaka yuko abantu bo muri ico cibare batahura yuko igikorwa cacu kidateye kubiri n’amategeko, twaciye ubwo nyene dusubira muri ka karere wa mupolisi yari yaduhagarikiyemwo maze turabandanya ubusuku bwacu.

Igihe twasubira kuraba wa mukuru w’igipolisi bukeye, yarababajwe no kwumva yuko twari twahagaritswe. Igihe yavugana n’uwo mushikirizwamanza kuri telefone yaramushavuriye cane! Uwo mukuru w’igipolisi yatubwiye yuko turamutse tugize ingorane iyo ari yo yose, dukwiye kumuhamagara we ubwiwe akayitunganya. Naho twari abanyamahanga tukaba kandi twari tuzi igifaransa gike, twasanze abantu bo muri ako karere bafise umutima mwiza kandi ari abakiranyi. Mugabo twaribaza duti: ‘Boba bazokwigera bamenya ukuri?’ Imyaka itari mike inyuma y’aho, twararonse inyishu y’ico kibazo igihe twasubirayo tugiye kwubaka Ingoro z’Ubwami hirya no h’ino muri Gaspé. Twasanze abantu benshi twari twarabwiye inkuru nziza basigaye ari abavukanyi bacu. Mu vy’ukuri, Yehova ni we akuza.​—1 Kor. 3:6, 7.

Turonka intoranwa

Mu 1970, agakobwa kacu Lisa karavutse. Iyo ntoranwa ivuye kuri Yehova yatumye turushiriza kugira umunezero mu buzima. Shirley na Lisa barakoranye nanje mu maporoje menshi yo kwubaka Ingoro z’Ubwami. Lisa ahejeje amashure, yavuze ati: “Murazi ga mawe na dawe, kubera ko natumye mumara igihe mutari mu murimo w’igihe cose, nzogerageza gutunganya ico kintu cabaye mu kuba umutsimvyi.” Lisa aracakora ubutsimvyi ubu hakaba haciye imyaka irenga 20, ariko ubu ho abukora ari kumwe n’umunega wiwe Sylvain. Baratewe agateka ko gukorera ku maporoje atari make yo kwubaka mu bindi bihugu bari kumwe. Intumbero yacu uko tugize umuryango ni iyo kuguma tworoheje ubuzima bwacu no kwitanga kugira ngo dukore umurimo wa Yehova. Sinigeze nibagira amajambo Lisa yavuze igihe yatangura gukora ubutsimvyi. Nkako, yaratumye nsubira gukora ubusuku bw’igihe cose mu 2001, kandi kuva ico gihe ndacakora ubutsimvyi. Gukora ubutsimvyi birabandanya kunyigisha kwizigira Yehova mu kintu ico ari co cose nkora no kugira ubuzima bworoheje ariko bumara akanyota kandi buteye umunezero.

Amaporoje y’ubwubatsi asaba ko umuntu aba afise urukundo, ari intahemuka akaba n’umwizigirwa

Yehova yaranyigishije yuko mu gihe twitanze kandi tukemera igikorwa ico ari co cose adushinze, turonka imihezagiro myinshi. Kuba nkorera muri Komite y’ubwubatsi y’akarere yinaka be no mu maporoje y’ubwubatsi ndi kumwe n’abavukanyi be n’abavukanyikazi banje bo hirya no h’ino i Québec be n’ahandi, ni agateka ntangere.

Naho abitanga bamwebamwe boshobora kuba badatanga insiguro zihambaye bari ku mukiruruko, igihe bari mu maporoje yo kwubaka Ingoro z’Ubwami barakayangana nk’inyenyeri. Abo bavukanyi bakundwa barashira umutima ku gikorwa kandi ubuhanga bafise buca bwibonekeza. Ivyo vyama nantaryo bituma haboneka inyubakwa nziza cane ikoreshwa mu gusenga Yehova.

Hari uwambajije ati: “Ni kamere zihambaye kuruta izindi izihe uwukora avyishakiye kuri poroje y’ubwubatsi bw’Ingoro y’Ubwami akwiye kuba afise?” Mfatiye ku vyo niboneye, imbere ya vyose, umuntu ategerezwa kuba akunda Yehova n’Umwana wiwe hamwe n’umuryango w’abavukanyi. (1 Kor. 16:14) Ubwa kabiri, birakenewe ko aba intahemuka n’umwizigirwa. Igihe ibintu bitagenze nk’uko tuvyipfuza, kandi ivyo birashika, umuntu w’intahemuka arabandanya gushigikira intunganyo ya gitewokarasi. Ukuba ari umwizigirwa bizotuma yitanga ku yandi maporoje.

Ndakengurukira Yehova

Naho dawe yapfuye mu 1985, impanuro yampaye yo kuguma mfise vyinshi nkora mw’ishirahamwe rya Yehova ndacayibuka. Cokimwe n’abandi bamaze kuronka igikorwa cabo mu gice co mw’ijuru c’ishirahamwe rya Yehova, nta gukeka ko afise vyinshi akora. (Ivyah. 14:13) Ubu mawe afise imyaka 97. Kubera ko arwaye indwara yonona ubwonko, ntashobora kuvuga nk’uko yahora. Naho ari ukwo, arazi ibiri muri Bibiliya yiwe. Mu makete aturungikira, arasubiramwo ivyanditswe akongera akaturemesha kuguma dusukurira Yehova tudahemuka. Ese ukuntu twese abana dukenguruka kuba twaravyawe n’abavyeyi b’abanyarukundo nk’abo!

Ndakengurukira kandi Yehova kuba yarampaye Shirley, umukenyezi wanje akaba n’umufasha wanje w’umwizigirwa. Ntiyigera yibagira na gato impanuro nyina yamuhaye ati: “Vernon azokwama afise vyinshi akora mu kuri, kandi uzobwirizwa kwiga kumusangira n’abandi.” Igihe twubakana, ubu hakaba haciye imyaka 49, twariyemeje yuko twosazanye dusukurira Yehova, kandi twempi turamutse turokotse umuhero w’ivy’iyi si, tugasubira ibuto maze tukabandanya kumusukurira ibihe bidahera. Ego cane, twaragize “vyinshi [d]ukora mu gikorwa c’Umukama.” (1 Kor. 15:58) Yehova ku ruhande rwiwe yaratwitwararitse vy’ukuri yongera ariyemeza neza ko ata ciza na kimwe twokwigera tubura.

[Akajambo k’epfo]

[Akajambo gasigura ifoto ku rup. 31]

“Intumbero yacu uko tugize umuryango ni iyo kuguma tworoheje ubuzima bwacu no kwitanga kugira ngo dukore umurimo wa Yehova”