‘Ugutabarwa kwanje kuva kuri Yehova’

Abakiri bato bashemeza Yehova bararyohora ubuzima bwabo

“NIPFUZA ibintu vyiza bishoboka ubuzima bushobora gutanga!” Ukwo ni ko umuhungu umwe w’umuyabaga yadondoye ivyo yiteze ku buzima. Ariko ni gute uwukiri muto ashobora gukura mu buzima ibintu vyiza bibaho? Bibiliya iratanga inyishu idakikiriza iti: “Wame wibuka Umuremyi wawe mu misi y’ubu[to] bgawe”.​—Umusiguzi 12:1.

Gushemeza Yehova no kumukorera si ivy’abakuze gusa. Samweli, agahungu ka Elukana na Hana, kari kakiri gato cane igihe kasukurira Yehova kw’ihema (1 Samweli 1:19, 20, 24; 2:11). Akigeme k’Agaheburayokazi kari kakiri gato mu myaka karerekanye ukwizera gushitse kari gafitiye Yehova igihe kashikiriza iciyumviro c’uko umukuru w’ingabo w’Umunyasiriya Namani yoja ku muhanuzi Elisa kugira ngo akizwe imibembe (2 Abami 5:2, 3). Muri Zaburi 148:7, 12, abahungu be n’abakobwa basabwa gushemeza Yehovaa. Igihe Yezu yari afise imyaka 12 gusa, yarashimishwa cane no gukorera Se wiwe (Luka 2:41-49). Kubera ivyo abana bamwebamwe bari barigishijwe mu Vyanditswe, igihe babona Yezu ku rusengero barasemereye bati: “Hoziyana mwana wa Dawidi”.​—Matayo 21:15, 16.

Gushemeza Yehova muri iki gihe

Muri iki igihe, abakiri bato benshi bo mu Vyabona vya Yehova barishimira ivyo bemera kandi bakabiyagira abandi n’umutima rugabo kw’ishure be n’ahandi. Dufate uturorero tubiri.

Mu Bwongereza, abigana n’umukobwa umwe w’imyaka 18 yitwa Stephanie bariko baraharira ku kibazo co gukorora inda be no ku bindi bibazo bijanye n’inyifato runtu. Umwigisha yashimitse avuga ko ivyo gukorora inda vyemewe nka hose, be n’uko ata mukobwa n’umwe yoba afise imvo yo kubirwanya. Igihe abanyeshure bose bo mw’isomero bashigikira ico ciyumviro, Stephanie yumvise atobura kuburanira impagararo afise ishingiye kuri Bibiliya. Stephanie yararonse akaryo ko kuburanira nya mpagararo yiwe igihe umwigisha yamubaza ico avyiyumvirako. Naho Stephanie yahagaritse umutima mu ntango, yarakoresheje ako karyo arashikiriza ico Ivyanditswe bivuga kuri ico kibazo. Yarasubiyemwo amajambo yo muri Kuvayo 21:22-24, aca asigura ko niba vyari bibi kugirira nabi akana kataravuka, bica vyumvikana rero ko gukorora inda binyuranye n’ukugomba kw’Imana.

Nya mwigisha, uwari umwe mu bakuru b’idini, ntiyari bwigere asoma iyo mirongo. Intahe Stephanie yashinze ashize amanga yatumye atanguza ku bo vyigana ibindi biyago vyinshi vyiza ku bibazo bitandukanye. Ubu hariho umukobwa umwe yama yakira ibinyamakuru Umunara w’Inderetsi na Réveillez-vous!, abandi babiri na bo baritavye ihwaniro ry’intara ry’Ivyabona vya Yehova barabona aho Stephanie abatizwa bwa kimenyetso c’uko yiyeguriye Imana.

Vareta w’imyaka itandatu y’amavuka aba mu gihugu ca Suriname co muri Amerika yo mu Bumanuko, ntiyagishije akaryo ko gushemeza Imana igihe umwigisha wiwe yari akeneye indemesho zivuye mu Vyanditswe. Aho umwigisha amariye kugaruka kw’ishure inyuma y’imisi itatu yari amaze ataboneka, yabajije abanyeshure biwe ko boba bari bazi igituma atari ahari. Bishuye bati: “Burya ntiwari urwaye?”. Na we ati: “Oya. Mwenewacu yari yapfuye, ubu nkaba numva mbabaye. Rero, ndabasavye mutekereze”.

Kuri uwo muhingamo, igihe nyina wa Vareta yari aryamye aruhutse, Vareta we yariko yizingururira ibinyamakuru vya kera, agenda arasoma imitwe y’ibiganiro. Yagiye abona yubuka ku Munara w’Inderetsi wo ku wa 15 Mukakaro 2001 (wo mu rurimi rwabo) wavuga ngo: “Hoba hariho ubuzima inyuma yo gupfa?”. N’akanyamuneza kenshi, yarakanguye nyina wiwe aca avuga ati: “Ma, Ma, ehe! Naronse ikinyamakuru nzoha mwigisha kivuga ivy’urupfu!”. Uwo mwigisha yararungikiwe ico kinyamakuru kiri kumwe n’agakete Vareta amwandikiye. Vareta yanditse ati: “Iki ni wewe canecane ndakirungikiye. Mw’Iparadizo, uzosubira kubona mwenewanyu kuko Yehova atigera abesha. Yarasezeranye ko azozana iparadizo, atari mw’ijuru, ariko kw’isi”. Uwo mwigisha yarakengurutse cane indemesho ishingiye kuri Bibiliya yakuye muri ico kinyamakuru.

Tegura kazoza

Yehova ni “Imana ihimbawe”, kandi ashaka ko abakiri bato na bo bahimbarwa (1 Timote 1:11, UB). Ijambo ryiwe bwite rivuga riti: “Nezererwa ubu[to] bgawe, kand’umutima wawe ukunezereze mu misi y’ubusore bgawe” (Umusiguzi 11:9). Yehova ntabona gusa ivy’igihe umuntu aba arimwo, arabona n’inkurikizi z’igihe kirekire zizova ku nyifato nziza canke mbi umuntu yogira. Ni co gituma Ijambo ryiwe rikebura abakiri bato riti: “Wame wibuka Umuremyi wawe mu misi y’ubusore bgawe, imisi mibi itaraza, igihe kitarashika, ah’uzovuga, uti Nta kikinnezereza”.​—Umusiguzi 12:1.

Egome, Yehova yipfuza ko abakiri bato banezerererwa bimwe bishitse ya ngabirano y’agaciro, ari yo buzima. Mu kwibuka Imana no mu kuyishemeza, abakiri bato barashobora kugira ubuzima buri n’ico buvuze kandi bumara akanyota. N’igihe nyene bahuye n’ingorane zitoroshe, boshobora kuvugana umutima mu nda bati: ‘Ugutabarwa kwanje kuva kuri Yehova’.​—Zaburi 121:2.

[Akajambo k’epfo]

[Iciyumviro nyamukuru ku rup. 9]

“Mw isi ni mushime Uhoraho, . . . namwe misore n’inkumi”.​—ZABURI 148:7, 12

[Uruzitiro ku rup. 8]

YEHOVA ARAFATA MU MUGONGO ABAKIRI BATO

[Ni] wewe vyizigiro vyanje, Mwami Uhoraho: ni wewe nizera, uhereye mu buto bganje”.​—Zaburi 71:5.

‘Imana ihaza ubuzima bwawe ivyiza, igatuma usubira mu busore busha bumeze nk’ubw’inkukuma’.​—Zaburi 103:5.