Yarabwiye abo bigana ivyo yemera

WOSHIMA gufasha abo mwigana kurushiriza gutahura ivyo wemera bishingiye kuri Bibiliya? Umunyeshure umwe w’imyaka 18 yitwa Magdalena wo mw’ishure ryisumbuye ryo muri Polonye, arakunda kuyagira abo bigana ivyo yemera bwa Cabona ca Yehova. Ku bw’ivyo, arakunda kubazwa ibibazo bikurikira: ‘Kuba icabona ca Yehova bisobanura iki?’, ‘Muremera Yezu Kirisitu?’. None abo bigana yabafasha gute? Magdalena yarasenga Yehova amusaba ubuyobozi maze agaca akora ibihuje n’amasengesho yiwe.—Yakobo 1:5.

Umusi umwe, Magdalena yarasavye umwigisha yubahiriza ivyo yemera, nimba yoshobora kwereka isomero ya videwo yitwa Les Témoins de Jéhovah: un nom, une organisationa. Uwo mwigisha yaravyemeye. Magdalena yaciye abwira abo bigana ati: “Ndiko ndatunganya ivy’uko umugenzi wanje umwe ashikiriza isomero ikiganiro c’iminuta 90. Kizoba kirimwo ukwerekana videwo be no guhana ijambo ku vyerekeye Ivyabona vya Yehova. Mwoshima kuza?”. Bose baremeye. Magdalena na Wojciech, uwo akaba ari umwamamaji w’igihe cose azi utuntu n’utundi, baratanguye gutegura ico gikorwa.

Iciyumviro bari bafise cari ic’uko, imbere yo kwerekana iyo Videwo hobanza gushikirizwa insiguro y’iminuta 20 ishingiye kuri ka gatabu Ivyabona vya Yehova—Ni Bande? Bemera Ibiki?b, hagakurikira ikiganiro c’ibibazo n’inyishu. Ivyo biheze, bari guca barabira iyo videwo mu bubiko bw’ibitabu bw’ishure. Umunyeshure wese wo muri iryo somero yari kuronka ingabirano, ikaba yari ibahasha nini irimwo udutabu nka tungahe, igitabu Les Jeunes s’interrogent:—Réponses pratiquesc be n’udupapuro tw’inkuru nziza hamwe n’ibinyamakuru.

Ku musi wo kwerekana iyo videwo, hari abanyeshure bigana 14, wa mwigisha be n’abandi banyeshure 4 vyahuriranye n’uko bari ngaho mu bubiko bw’ibitabu. Wojciech yabanje gusigura ko abanditsi b’ivyese be n’abanditsi b’ibindi bintu b’Abanyapolonye batari bake bakoresha izina ry’Imana, Yehova, mu vyo banditse. Yarerekanye kandi ko ibitabu bimwebimwe vya kera vy’ikatikisimu vy’abagatolika vyarimwo izina ry’Imana. Mu gusigura igikorwa Ivyabona vya Yehova barangura mu gihe ca none, yarerekanye udutabu twerekana ibiro vy’amashami bitandukanye be n’amafoto yerekana Ingoro z’amateraniro zitari nke.

Vyaciye bivyura ikiyago kirimwo ubushwashwanutsi. Magdalena na Wojciech bakoresheje Bibiliya mu kwishura ivyo bibazo. Ivyo vyaratangaje abari ngaho vyongera birabajijura ko Ivyabona vya Yehova batigisha ivyo bikuriye mu mutwe. None bimwebimwe muri ivyo bibazo vyari ibihe, kandi vyishuwe gute?

Ikibazo: Bibiliya yuzuyemwo imvugo zidatomoye be n’imvugo ngereranyo, umuntu wese akaba yobisigura uko avyumva. None umuntu ashobora gute kubaho yisunga Bibiliya?

Inyishu: Hari abavuga yuko Bibiliya imeze nk’inanga ushobora kuvuzako umurya wishakiye. Ariko nimwiyumvire gatoyi: Igihe woba ushaka kumenya ico umwanditsi ashaka kuvuga mu vyo yanditse, none ntivyoba vyiza kuruta ubimwibarije? Yehova Imana, we yandikishije Bibiliya, ntameze nk’abanditsi b’abantu bapfuye, ni muzima (Abaroma 1:20; 1 Ab’i Korinto 8:5, 6). Amajambo akikuje icanditswe arashobora kwerekana uburyo nyabwo bwo kugisobanura. Vyongeye, Bibiliya kenshi usanga ikintu kanaka ikivuga mu vyanditswe bitari bike, gutyo kugereranya ivyo vyanditswe bikaba vyofasha. Ku bw’ivyo, turashobora kureka Imana ikayobora ivyiyumviro vyacu, bikaba ari nk’aho ari yo iriko iradusigurira ico canditswe. Ivyo tubigize, twoshobora kurushiriza kumenya ivyo igomba nk’uko vyahishuwe muri Bibiliya kandi tukabaho tuvyisunga. Si vyo none?

Ikibazo: Ni itandukaniro irihe riri hagati y’abakirisu n’Ivyabona vya Yehova?

Inyishu: Twebwe turi abakirisu! Ariko rero, aho gupfa kuvuga ko ari abakirisu, Ivyabona vya Yehova barihatira kubaho bisunga ivyo bemera be n’ivyo Imana ibigisha ku neza yabo (Yesaya 48:17, 18). Kubera ko ivyo bigisha vyose bishingiye kuri Bibiliya, barazi ko bavuga ukuri.—Matayo 7:13, 14, 21-23.

Ikibazo: Ni kubera iki mushikira abantu mutazi namba, maze mukabagobera ngo muganire? Aho ntikuba ari ukwemeza abandi ku nguvu ivyo mwemera?

Inyishu: Mu gihe uhuye n’umuntu mw’ibarabara akakuvugisha n’urupfasoni, akakubaza iciyumviro ufise ku kintu kanaka, wumva ivyo ari bibi (Yeremiya 5:1; Zefaniya 2:2, 3)? (Wojciech na Magdalena baciye bagira umwerekano w’ukuntu baza barabaza abahita nimba Imana yitaho abacumukujwe n’imvura y’isegenya iheruka gutera muri Polonye.) Tumaze kwumva ico uwo muntu avyiyumvirako, duca tumwereka ibiri muri Bibiliya. Igihe umuntu adashatse ko tuganira, turamusezera tukibandaniriza (Matayo 10:11-14). Ukwo kwoba ari ukuganiriza abandi ku nguvu? Mbega hoho, abantu boba bakwiye kuguma ari ibiragi?

Ikibazo: Ni kubera iki mudahimbaza imisi mikuru?

Inyishu: Duhimbaza ikintu kimwe rudende Bibiliya idutegeka kwibuka, ico na co akaba ari Icibutso c’urupfu rwa Yezu Kirisitu (1 Ab’i Korinto 11:23-26). Ku vyerekeye imisi mikuru na yo, urashobora kumenya inkomoko yayo mu gusoma inkoranyabumenyi canke ibindi vyandikano bivuga ukuri. Niwabigira uzobona neza igituma ata kintu na kimwe nk’ico duhimbaza.—2 Ab’i Korinto 6:14-18.

Hari n’ibindi bibazo vyinshi vyabajijwe kandi birishurwa. Ico kiyago cafashe umwanya muremure ku buryo vyabaye ngombwa ko ivyo kwerekana ya videwo vyimurirwa ku wundi musi.

None abo banyeshure bavyakiriye gute? Reka Magdalena abitwibwirire: “Naratangajwe n’ukubona abanyeshure bamwebamwe bakunda kugira utugugu no gutyekeza abandi, barabajije ibibazo ata gufyina. Naho bavuga ko batemera Imana, muri ico kiyago barerekanye ko bayemera”! Abari ngaho barakiriye n’umutima ukunze ingabirano bahawe, bose hamwe bakaba bakiriye ibitabu 35, udutabu 63 be n’ibinyamakuru 34.

Ese ukuntu ari igikorwa cakorewe kw’ishure, maze kiravamwo ikintu c’akaroruhore! Ntivyafashije gusa abo bigana na Magdalena kurushiriza kumenya no gutahura Ivyabona vya Yehova, ariko kandi vyararemesheje benshi muri abo bakiri bato kuzirikana ku ntumbero y’ubuzima. Ubona gute nawe ugize akigoro ko gufasha abo mwigana kurushiriza kumenya ivyo wemera?

[Akajambo k’epfo]

[Ifoto ku rup. 31]

Magdalena na Wojciech bariko bitegurira ca kiganiro