Guma Ushira mu Ngiro Ivyo Wize

“Ivyo mwize, ivyo mwākiriye, ivyo mwumvise, ivyo mwambonanye, abe ari vyo mukora: ni ho Imana Nyen’amahoro izobana namwe.”​—AB’I FILIPI 4:9.

1, 2. Muri rusangi, Bibiliya yoba iriko iragira akosho mu buzima bw’abantu bavuga ko ari abanyedini? Sigura.

“IDINI Ririko Rirushiriza Kugira Akosho, Ariko Inyifato Runtu Iriko Iratituka.” Uwo mutwe w’ikiganiro wo mu kanyamakuru kamwe (Emerging Trends) watanze incamake y’ivyavuye mw’iperereza rimwe ryagizwe mu gihugu co muri Leta Zunze Ubumwe za Amerika. Biboneka yuko muri ico gihugu habaye iyongerekana ry’igitigiri c’abantu baja mu misa kandi bakavuga yuko idini rifise ikibanza gihambaye mu buzima bwabo. Ariko rero, iyo raporo ivuga iti: “Naho ivyo bitigiri bitangaje, Abanyamerika benshi baranegura mu buryo butomoye akosho idini ririko riragira ku buzima bw’abantu umwumwe ukwiwe no ku kibano cose muri rusangi.”

² Ivyo bintu ntibiri mu gihugu kimwe gusa. Mw’isi yose, abantu benshi bavuga yuko bemera Bibiliya kandi ko ari abanyedini, ntibariko barareka ngo Ivyanditswe bibagireko akosho kaboneka mu buzima bwabo. (2 Timoteyo 3:5) Uwurongoye umugwi umwe w’ivy’ubushakashatsi yavuze ati: “Turacasonera cane Bibiliya, mugabo mu bijanye no kumara umwanya tuyisoma koko, tuyiga twongera tuyikurikiza, ni ikintu co muri kahise.”

3. (a) Bibiliya igira ico ikoze gute ku bacika Abakirisu nyakuri? (b) Abayoboke ba Yezu bakurikiza gute impanuro ya Paulo yanditse mu B’i Filipi 4:9?

³ Ariko rero, ku Bakirisu nyakuri, ibintu bimeze ukundi. Ugukurikiza impanuro zo mw’Ijambo ry’Imana vyatumye bahindura ukuntu biyumvira n’ukuntu bigenza. Eka n’umuntu musha bagaragaza, abandi baramubona bitagoranye. (Ab’i Kolosayi 3:5-10) Ku bayoboke ba Yezu, Bibiliya si igitabu kidakoreshwa, co gutororokanirako umukungugu aho kiri ku kagege. Ahubwo nyabuna intumwa Paulo yabwiye Abakirisu b’i Filipi ati: “Ivyo mwize, ivyo mwākiriye, ivyo mwumvise, ivyo mwambonanye, abe ari vyo mukora: ni ho Imana Nyen’amahoro izobana namwe.” (Ab’i Filipi 4:9, ni twe tubihiritse.) Abakirisu ntibapfa gusa kwemera ukuri kw’Ijambo ry’Imana. Barashira mu ngiro ivyo biga, bakabandanya gukurikiza impanuro za Bibiliya mu muryango, ku kazi, kw’ishengero no mu yindi mice yose y’ubuzima.

4. Ni kubera iki ari urugamba gushira mu ngiro ivyagezwe vy’Imana?

⁴ Gushira mu ngiro ivyagezwe vy’Imana be n’ingingo ngenderwako zayo ntivyoroshe. Tuba mw’isi iri mu bubasha bwa Shetani wa Mucokoranyi, uwo Bibiliya yita “imana y’iki gihe.” (2 Ab’i Korinto 4:4; 1 Yohana 5:19) Ku bw’ivyo, birakenewe ko tuba maso tukirinda ikintu ico ari co cose cotubuza gukurikirana ingendo yo kuba intadohoka kuri Yehova Imana. Dushobora gute kuguma turi intadohoka?

Gumya “Icitegererezo c’Amajambo Mazima”

5. Amajambo Yezu yavuze ngo: ‘Abandanye ankurikira’ ashaka kwerekana iki?

⁵ Umuce umwe wo gushira mu ngiro ivyo twize usaba ko twumira ku gusenga kw’ukuri tudahemuka, naho tworwanywa n’abatizera. Ukwihangana gusaba akigoro. Yezu yavuze ati: “Umuntu ni yagomba kunkurikira, ni yiyanke, yikorere [“igiti ciwe co kubabarizwako hanyuma abandanye,” NW] ankurikir[a].” (Matayo 16:24) Yezu ntiyavuze yuko dukwiye kumukurikira mu ndwi imwe gusa, mu kwezi kumwe gusa, canke mu mwaka umwe gusa. Ahubwo yavuze ati: ‘Abandanye ankurikira.’ Amajambo yiwe yerekana yuko ivy’uko tuba abigishwa bidashobora kuba gusa mu gihe kinaka c’ubuzima bwacu canke ngo bibe ukwibanda ku Mana kw’igihe gito, uyu musi tukugize ejo kukaba kwaheze. Kwumira ku gusenga kw’ukuri tudahemuka bisobanura yuko twihangana turi abizerwa mu ngendo twahisemwo, naho hoza iki. Ivyo dushobora kubigira gute?

6. Ni icitegererezo c’amajambo mazima ikihe Abakirisu bo mu kinjana ca mbere bigishijwe na Paulo?

⁶ Paulo yahimirije Timoteyo, umukozi bakorana ati: “Gumya icitegererezo c’amajambo mazima wanyumvanye, ukigumishe ukwizera n’urukundo rubonerwa muri Kristo Yesu.” (2 Timoteyo 1:13) Paulo yashaka kuvuga iki? Ijambo ry’Ikigiriki ryahinduwe hano ngo “icitegererezo” urudome ku rundi ryerekeza ku gicapo c’umuhinguzi w’utugenegene. Naho igicapo nk’ico kitaba kirimwo utuntu twose, kiratanga ishusho itomoye ku buryo umuntu w’inkerebutsi acitegereje ashobora gutahura ico gishaka kwerekana muri rusangi. Muri ubwo buryo nyene, icitegererezo c’ukuri Paulo yigishije Timoteyo n’abandi, nticari kigenewe gutanga inyishu idomako ku kibazo cose coshobora kubazwa. Yamara, iyo nyigisho iratanga uburongozi bukwiye, nk’aho yoba ari igicapo, kugira ngo abantu b’imitima nziraburyarya bashobore gutahura ico Yehova abasaba. Birumvikana ko kugira ngo bahimbare Imana, bokeneye kugumya icitegererezo c’ukuri mu gushira mu ngiro ivyo bize.

7. Abakirisu bashobora gute kwumira ku citegererezo c’amajambo mazima?

⁷ Mu kinjana ca mbere, abantu nka Humenayo, Alekisandero na Fileto bariko baremesha ivyiyumviro bitari bihuje n’“icitegererezo c’amajambo mazima.” (1 Timoteyo 1:18-20; 2 Timoteyo 2:16, 17) None Abakirisu bo mu ntango bari gushobora gute kwirinda kuzimizwa n’abahakanyi? Mu kwiga bitonze ivyanditswe vyahumetswe no mu kubikurikiza mu buzima bwabo. Abakurikiye akarorero ka Paulo n’abandi bantu bizerwa barashoboye gutahura no kwiyamiriza ikintu ico ari co cose kitari gihuje n’icitegererezo c’ukuri bari barigishijwe. (Ab’i Filipi 3:17; Abaheburayo 5:14) Aho kuba “[ab]arwaye ibihāri, n’intambara z’amagambo,” barabandanije gutera baja imbere mu ngendo yabo nziza yo kuyobokera Imana. (1 Timoteyo 6:3-6) Dukora nka bo igihe tuguma dushira mu ngiro ukuri twize. Uzi ukuntu bikomeza ukwizera kubona abantu amamiliyoni basukurira Yehova kw’isi yose babandanya kugumya icitegererezo c’ukuri kwa Bibiliya bigishijwe!​—1 Ab’i Tesalonike 1:2-5.

Niwiyamirize “Imigani y’Ibinyoma”

8. (a) Shetani arondera gute gusenyura ukwizera kwacu muri iki gihe? (b) Ni imburizi iyihe dusanga muri 2 Timoteyo 4:3, 4 Paulo atanga?

⁸ Shetani aragerageza gusenyura ukutadohoka kwacu biciye ku kubiba inkeka ku vyerekeye ivyo twigishijwe. Muri iki gihe, cokimwe no mu kinjana ca mbere, abahakanyi be n’abandi bantu bararondera gusenyura ukwizera kw’abantu ataco biyagiriza. (Ab’i Galatiya 2:4; 5:7, 8) Rimwe na rimwe bakoresha ibimenyeshamakuru kugira ngo bakwiragize amakuru agoretse canke mbere ibinyoma vyeruye ku vyerekeye uburyo abasavyi ba Yehova bakora be n’imvo bakorana. Paulo yabuye yuko hari abotaye ukuri. Yanditse ati: “Igihe kizoza, [ntiba]zokwemera kwumva ukwigisha kuzima; ariko kukw amatwi abarya yifuza kwumva ibibanezereza, bazokwirundaniriza abigisha bahūje n’ukwifuza kwabo, kandi bazokwiziba amatwi, ngo ntibumve ukuri, bazozimira bakurikire imigani y’ibinyoma.”​—2 Timoteyo 4:3, 4.

9. Ni igiki Paulo ashobora kuba yari afise mu muzirikanyi igihe yerekeza ku ‘migani y’ibinyoma’?

⁹ Aho kugumya icitegererezo c’amajambo mazima, bamwebamwe barashimishijwe n’“imigani y’ibinyoma.” Iyo migani y’ibinyoma yari imiki? Kumbure Paulo yari afise mu muzirikanyi inkuru mpererekano zadendekeranijwe, nk’izo dusanga mu gitabu ca Tobi kitemerwa ko kiri mu bitabu vyahumetswe.a Imigani y’ibinyoma ishobora kandi kuba yarimwo ibihuha vy’ishwashwa kandi vy’urusaku. Ico gihe kandi bamwebamwe, “bahūje n’ukwifuza kwabo,” bashobora kuba barahendwa mu buryo bw’ubwenge, bahenzwe n’abihaye ukubona ingingo mfatirwako z’Imana ukutari kwo canke abanegura abaja imbere abandi mw’ishengero. (3 Yohana 9, 10; Yuda 4) Haba hari igitsitaza ikihe, bamwebamwe bisa n’uko bihitiramwo inyigisho z’ikinyoma aho guhitamwo ukuri kw’Ijambo ry’Imana. Bidatevye bararetse gushira mu ngiro ibintu bari barigishijwe, maze ivyo biba ari vyo bituma ubwabo bamererwa nabi mu vy’impwemu.​—2 Petero 3:15, 16.

10. Ni imigani y’ibinyoma imwimwe iyihe iriho muri iki gihe, kandi Yohani yashimitse gute ku vy’uko ukwiyubara gukenewe?

¹⁰ Turashobora kwirinda ivyo gukwegakwegwa n’imigani y’ibinyoma muri iki gihe mu gihe dusuzuma neza kandi tukaba abarobanuzi ku vyerekeye ivyo twumviriza be n’ivyo dusoma. Nk’akarorero, ibimenyeshamakuru akenshi biraremesha ubushegabo. Abantu benshi bararemesha ivyo gukekeranya nimba Imana iriho, canke bakaremesha ivyo guhakana Imana bimwe vyeruye. Abashakashatsi b’inkuru z’ivya Bibiliya baracokora ivyo Bibiliya ivuga ko yahumetswe n’Imana. Abahakanyi ba kino gihe na bo baguma bagerageza kubiba imbuto z’inkeka kugira ngo basenyure ukwizera kw’Abakirisu. Ku biraba ingeramizi nk’iyo nyene yatejwe n’abigira abavugishwa n’Imana bo mu kinjana ca mbere, intumwa Yohani yabuye ati: “Abo nkunda, ntimwemere impwemu zose, ariko mugerageze impwemu ko zavuye ku Mana: kukw abigira abavugishwa n’Imana benshi bādutse mw isi.” (1 Yohana 4:1) Ni co gituma dukeneye kwiyubara.

11. Ni uburyo bumwe ubuhe bwo kwisuzuma bwodufasha kuraba ko twoba turi mu kwizera?

¹¹ Ku bijanye n’ivyo, Paulo yanditse ati: “Ba ari mwebge mwisuzuma, mumenye yuko muhagaze mu kwizera.” (2 Ab’i Korinto 13:5) Iyo ntumwa yaduhimirije kuguma twisuzuma kugira ngo tumenye nimba turiko twumira ku nyigisho zose za gikirisu. Nimba dufise akamenyero ko gutega amatwi ababona ibintu mu buryo bubi, dukeneye kwisuzuma tukabishira no mw’isengesho. (Zaburi 139:23, 24) Twoba duhengamiye ku gutora amakosa abasavyi ba Yehova? Nimba ari ukwo biri, ni kubera iki? Twoba twababajwe n’amajambo umuntu kanaka yavuze canke ibintu yakoze? Nimba ari ukwo biri, twoba tuguma tubona ibintu mu buryo bubereye? Umubabaro uwo ari wo wose duhangana muri uru runkwekwe rw’ibintu ni uw’igihe gito. (2 Ab’i Korinto 4:17) No mu gihe dushikiwe n’ikigeragezo kanaka mw’ishengero, ni kubera iki twohagarika gusukurira Imana? Nimba hari ikintu kinaka kitubabaje, ntivyoba vyiza none kuruta dukoze uko dushoboye kwose kugira ngo dutorere inyishu ico kibazo maze tugaheza tukakirekera mu maboko ya Yehova?​—Zaburi 4:4; Imigani 3:5, 6; Abanyefeso 4:26.

12. Abanyaberoya badusigiye gute akarorero keza?

¹² Aho kunegura, nimuze tugume tubona neza inyigisho yo mu buryo bw’impwemu turonka biciye ku kwiyigisha no ku kwitaba amakoraniro y’ishengero. (1 Ab’i Korinto 2:14, 15) Kandi aho guhinyura Ijambo ry’Imana, ese ukuntu birushiriza kuba ibiranga ubukerebutsi tugize agatima nk’ak’Abanyaberoya bo mu kinjana ca mbere basuzuma Ivyanditswe bitonze! (Ivyakozwe 17:10, 11) Nimuze rero dushire mu ngiro ivyo twiga, mu kwiyamiriza imigani y’ibinyoma no mu kwumira ku kuri.

13. Twoshobora gute gukwiragiza imigani y’ibinyoma tutanabizi?

¹³ Hariho ubundi bwoko bw’umugani w’ikinyoma dukeneye kubako maso. Hari amakuru menshi cane y’ishwashwa akwiragizwa, akenshi biciye ku makete arungikwa muri orodinateri (ivyo bita E-mail, [soma ngo Imeili]). Vyoba biranga ubukerebutsi kuba maso kuri mwene ayo makuru, canecane mu gihe tutazi inkomoko yayo. No mu gihe icabonywe canke inkuru yoba yarungitswe n’Umukirisu afise izina ryiza, uwo muntu ashobora kuba ubwiwe atazi ido n’ido ry’iyo nkuru. Ni co gituma bihambaye kwiyubara ku vyerekeye gusubiramwo canke kurungika inkuru zitasuzumwe neza. Birumvikana ko tutokwipfuza gusubiramwo “amakuru atuka Imana,” (UB) canke “imigani ihumanya.” (1 Timoteyo 4:7) Kubera yuko tubwirizwa kandi kuvugana ivy’ukuri, twoba turiko turakora mu buryo buranga ubukerebutsi twirinze ikintu ico ari co cose cotuma mbere dukwiragiza ibinyoma tutanabizi.​—Abanyefeso 4:25.

Ivyiza Biva ku Gushira mu Ngiro Ukuri

14. Ni ivyiza ibihe biva ku gushira mu ngiro ivyo twize mw’Ijambo ry’Imana?

¹⁴ Gushira mu ngiro ivyo twiga biciye ku kwiyigisha Bibiliya no ku kwitaba amakoraniro ya gikirisu biravamwo ivyiza vyinshi. Nk’akarorero, twoshobora kubona yuko ubucuti dufitaniye n’abo dusangiye ukwizera burushiriza kumera neza. (Ab’i Galatiya 6:10) Inyifato ubwacu dufise irahinduka ikamera neza mu gihe dukurikiza ingingo ngenderwako za Bibiliya. (Zaburi 19:8) Vyongeye, bivuye ku gushira mu ngiro ivyo twiga, ‘turashariza ivyigishwa vy’Imana’ kandi bigashoboka ko dukwegera abandi ku gusenga kw’ukuri.​—Tito 2:6-10.

15. (a) Uwukiri muto umwe yagize umutima rugabo gute wo gushinga intahe kw’ishure? (b) Wigiye iki kuri ico kintu cabonywe?

¹⁵ Mu Vyabona vya Yehova, hariho abakiri bato benshi bashira mu ngiro ivyo bize biciye ku kwiyigisha Bibiliya no ku bisohokayandikiro vya gikirisu hamwe no mu kwama bari ku makoraniro y’ishengero. Ukwigenza neza kwabo ni intahe ikomeye ku bigisha no ku bo bigana kw’ishure. (1 Petero 2:12) Rimbura ivyabaye kuri Leslie, agakobwa k’imyaka 13 y’amavuka ko muri Leta Zunze Ubumwe za Amerika. Karemera yuko kakunda gusanga bigoye kubwira abo bigana ivyerekeye ukwizera kwako, mugabo umusi umwe ivyo vyarahindutse. “Abanyeshure baganiriye ivyerekeye ukuntu abantu bagerageza kugurisha ibintu ku bandi. Umwigeme umwe yaciye ashira ukuboko hejuru hanyuma avuga Ivyabona vya Yehova.” None ko Leslie yari Icabona, yavyifashemwo gute? Avuga ati: “Nararwaniye ukwizera kwanje, kandi ndazi neza yuko ivyo vyatangaje umuntu wese, kubera akenshi naguma ninumiye mw’ishure.” Ugushira amanga kwa Leslie kwavuyemwo iki? Leslie avuga ati: “Narashoboye guha umunyeshure agatabu be n’agapapuro k’inkuru nziza, kubera yari afise ibindi bibazo.” Ese ukuntu Yehova ategerezwa kuba anezerwa igihe abakiri bato bashira mu ngiro ivyo bize bagira umutima rugabo wo gushinga intahe kw’ishure!​—Imigani 27:11; Abaheburayo 6:10.

16. Uwukiri muto umwe w’Icabona yungukiye gute kw’Ishure ry’Ubusuku bwa Gitewokarasi?

¹⁶ Akandi karorero ni aka Elizabeth. Kuva ku myaka indwi kubandanya mu myaka yiwe yose yamaze mu mashure y’intango, uwo mwigeme yari akiri muto yaratumira abigisha biwe ku Ngoro y’Ubwami igihe cose yaba afise ikigabu mw’Ishure ry’Ubusuku bwa Gitewokarasi. Mu gihe umwigisha yaba atashoboye kwitaba, Elizabeth yaraguma kw’ishure ivyigwa birangiye maze agashikiriza insiguro yiwe uwo mwigisha. Mu mwaka wiwe wa nyuma w’amashure yisumbuye, Elizabeth yaranditse raporo ku mpapuro cumi yerekeye ivyiza biva mw’Ishure ry’Ubusuku bwa Gitewokarasi maze abishikiriza imbere y’umugwi w’abigisha bane. Yarasabwe kandi gutanga insiguro y’akarorero yo mw’Ishure ry’Ubusuku bwa Gitewokarasi, aho yahisemwo ikiganiro kivuga ngo “Ni Kubera iki Imana Ireka Ububisha Bukabandanya?” Elizabeth yarungukiye kuri porogarama yo kwigisha irongorwa n’Ivyabona vya Yehova mw’Ishure ry’Ubusuku bwa Gitewokarasi. Uwo ni umwe gusa mu Bakirisu benshi bakiri bato batuma Yehova ashemezwa mu gushira mu ngiro ivyo bize mw’Ijambo ryiwe.

17, 18. (a) Bibiliya itanga impanuro iyihe ku biraba ukutagunga? (b) Umuntu umwe yakozwe ku mutima gute n’inyifato izira ubugunge y’Icabona ca Yehova umwe?

¹⁷ Bibiliya ikebura Abakirisu kwigenza mu buryo buzira ubugunge muri vyose. (Abaheburayo 13:18) Ubugunge burashobora gusenyura ubucuti dufitaniye n’abandi, kandi igihambaye kuruta, bugasenyura ubucuti dufitaniye na Yehova ubwiwe. (Imigani 12:22) Kuba twigenza mu buryo buzira ubugunge biratanga ikimenyamenya c’uko turiko dushira mu ngiro ivyo twize, kandi vyatumye abantu benshi barushiriza kwubaha Ivyabona vya Yehova.

¹⁸ Rimbura icabonywe cerekeye umusoda yitwa Filipo. Yaratakaje isheki itanditseko amahera, ikaba yariko umukono, aza kubimenya ari uko ayigarukaniwe biciye kuri posita. Iyo sheki yari yatowe n’Icabona ca Yehova umwe, akaba yari yamaditseko agapapuro gatoyi kavuga yuko ivyo umuntu yatoye iyo sheki yemera mu vy’idini ari vyo vyamuvyuriye umutima wo kuyisubiza. Filipo vyaramukoze ku mutima. Yavuze ati: “Bari kuntwara amadolari 9.000 (nk’imiliyoni 7 n’igice z’amarundi)!” Ikindi gihe yaracitse intege aho inkofero yiwe yibirwa mw’isengero. Bisa n’uko ari umuntu yari amuzi yatwaye inkofero yiwe, mu gihe umuntu atazi yari yamusubije isheki yari iciye amadolari ibihumbi! Mu vy’ukuri, Abakirisu b’inzirabugunge baratuma Yehova Imana aterwa iteka!

Nubandanye Gushira mu Ngiro Ivyo Wize

19, 20. Tuzokwungukira gute ku gukora mu buryo buhuje n’ivyo twiga mu Vyanditswe?

¹⁹ Abashira mu ngiro ivyo bize mw’Ijambo ry’Imana bararonka ivyiza bidaharurwa. Umwigishwa Yakobo yanditse ati: “Uwitegereza ivyagezwe bitunganye rwose, ari vyo vy’umwidegemvyo, akabishishikara, atar’uwumva akavyibagira, arikw ar’ūbikora, ni we azohabga umugisha mu vy’akora.” (Yakobo 1:25) Vyemere, nitwakora mu buryo buhuje n’ivyo twiga mu Vyanditswe, tuzogira ubuhirwe nyakuri kandi tuzoba dushoboye guhangana n’imikazo yo mu buzima tukererwa. Ikiruta vyose, tuzohezagirwa na Yehova twongere tugire icizigiro c’ubuzima budahera!​—Imigani 10:22; 1 Timoteyo 6:6.

²⁰ Uko bishoboka kwose rero, nubandanye kwijukira ivyo kwiga Ijambo ry’Imana. Nuze urikoraniriza hamwe n’abasenga Yehova ubudasiba, kandi utege yompi amayagwa ashikirizwa ku makoraniro ya gikirisu. Nukurikize ivyo wiga, ugume ubishira mu ngiro, ni ho “Imana Nyen’amahoro izobana nawe.”​—Ab’i Filipi 4:9.

[Akajambo k’epfo]

Woba Wibuka?

• “Icitegererezo c’amajambo mazima” ni iki, kandi dushobora gute kubandanya kukigumya?

• “Imigani y’ibinyoma” dukeneye kwiyamiriza ni imiki?

• Ni ivyiza ibihe abashira mu ngiro ivyo biga mw’Ijambo ry’Imana baronka?

[Ifoto ku rup. 17]

Abakirisu bo mu ntango bari gushobora gute kwirinda kuzimizwa n’abahakanyi?

[Ifoto ku rup. 18]

Imbuto z’inkeka zirashobora kubibwa n’ibimenyeshamakuru, biciye kuri Internet no ku bahakanyi bo mu gihe ca none

[Ifoto ku rup. 19]

Ntibiranga ubukerebutsi gukwiragiza amakuru atasuzumwe neza

[Amafoto ku rup. 20]

Ku kazi, kw’ishure n’ahandi hose, Ivyabona vya Yehova barakurikiza ivyo basoma mw’Ijambo ry’Imana