Woba Ukunda Ivyibutswa vya Yehova mu Buryo Buhebuje?

“Umutima wanje witondeye [“ivyibutswa vyawe,” “NW”], kandi ndabikunda bihebuje.”​—ZABURI 119:167.

1. Ni hehe canecane dusanga herekeza hisubiriza ku vyibutswa vya Yehova?

YEHOVA ashaka ko abasavyi biwe baba abahirwe. Mugabo ntiwumve, kugira ngo twinovore ubuhirwe nyakuri, dutegerezwa kugendera mu vyagezwe vy’Imana kandi tugakurikiza amategeko yayo. Kugira ngo ivyo tubishikeko, araduha ivyibutswa. Ivyo biravugwa bisubirwamwo mu Vyanditswe, canecane muri Zaburi y’⁠119, bikaba bishoboka ko yatunganijwe n’Umuganwa w’Ubuyuda yari akiri muto, Hezekiya. Urwo ruririmbo ruryoheye ugutwi rutanguzwa n’amajambo agira iti: “Hahirwa abagenda batunganye, bakagendera mu vyagezwe vy’Uhoraho. Hahirwa abitondera [“ivyibutswa vyiwe,” NW], bakamurondeza umutima wose.”​—Zaburi 119:1, 2.

2. Ivyibutswa vya Yehova bifitaniye isano gute n’ubuhirwe?

² ‘Tugendera mu vyagezwe vya Yehova’ mu kwihereza ubumenyi nyakuri bw’Ijambo ryiwe no mu kubushira mu ngiro mu buzima. Ariko rero, kubera ko turi abanyagasembwa, turakenera ivyibutswa. Ijambo ry’Igiheburaho ryahinduwe ngo “ivyibutswa” ryerekana yuko Imana itwibutsa ivyagezwe vyayo, amategeko yayo, amateka yayo, amabwirizwa yayo, n’ingingo zayo. (Matayo 10:18-20) Tuzoguma dufise ubuhirwe mu gihe gusa tubandanya kwitondera ivyibutswa nk’ivyo, kubera yuko bidufasha kwirinda imitego yo mu vy’impwemu ivamwo akaga n’intuntu.

Numatane n’Ivyibutswa vya Yehova

3. Twishimikije Zaburi 119:60, 61, ni umwizero uwuhe dufise?

³ Ivyibutswa vya Yehova vyarakundwa cane n’Umwanditsi wa Zaburi, uwaririmvye ati: “Nkanyaruka, sintebe kwitondera amabgirizwa yawe. Imigozi y’abanyakibi yanyizingiriyeko, ariko sinibagiye ivyagezwe vyawe.” (Zaburi 119:60, 61) Ivyibutswa vya Yehova biradufasha kwihanganira uruhamo kubera yuko twizigiye ko Dawe wa twese wo mw’ijuru ashobora guca ibiziriko abansi batubohesha ngo ntidusaganye. Ku gihe kibereye, aradukurako intambamyi nk’izo kugira ngo dushobore kubandanya igikorwa co kwamamaza Ubwami.​—Mariko 13:10.

4. Dukwiye kwakira gute ivyibutswa vy’Imana?

⁴ Mu bihe bimwebimwe, turakosorwa n’ivyibutswa vya Yehova. Nimuze nantaryo dukenguruke ikosorwa nk’iryo, nk’uko umwanditsi wa Zaburi yabigize. Yavuze mw’isengesho ati: “[“Ivyibutswa vyawe,” NW] na vyo birampimbara . . . nkunda [“ivyibutswa vyawe,” NW].” (Zaburi 119:24, 119) Dufise ivyibutswa vyinshi vy’Imana kuruta ivyo uwo mwanditsi wa Zaburi yari afise. Ivyanditswe vy’Igiheburayo ibihumbi n’ibihumbi bisubirwamwo mu Vyanditswe vy’Ikigiriki, ntibitwibutsa gusa amabwirizwa Yehova yaha igisata ciwe mu gihe c’Ivyagezwe, mugabo kandi bitwibutsa imigambi yiwe ku biraba ishengero rya gikirisu. Igihe Imana ibona ko bibereye kutwibutsa ibintu bijanye n’ivyagezwe vyayo, turakura ubwatsi kubera ubuyobozi nk’ubwo. Kandi, mu ‘kumatana n’ivyibutswa vya Yehova,’ turirinda amohe y’icaha adahimbara Umuremyi wacu kandi adutwara ubuhirwe.​—Zaburi 119:31.

5. Dushobora gute gushika ku gukunda ivyibutswa vya Yehova mu buryo buhebuje?

⁵ Dukwiye gukunda ivyibutswa vya Yehova ukungana iki? Umwanditsi wa Zaburi yaririmvye ati: “Umutima wanje witondeye [“ivyibutswa vyawe,” NW], kandi ndabikunda bihebuje.” (Zaburi 119:167, ni twe tubihiritse.) Tuzoshika ku gukunda ivyibutswa vya Yehova mu buryo buhebuje mu gihe tubibona kandi tuvyakira bwa mburizi za Sebibondo atwitwararika vy’ukuri. (1 Petero 5:6, 7) Turakeneye ivyibutswa vyiwe, kandi urwo tubikunda ruzokura uko tubona ukuntu bitwungura.

Igituma Dukeneye Ivyibutswa vy’Imana

6. Ni imvo imwe iyihe ituma dukenera ivyibutswa vya Yehova, kandi ni igiki kizodufasha kuvyibuka?

⁶ Imvo imwe ituma dukenera ivyibutswa vya Yehova ni iy’uko dukunda kwibagira. Inkoranyabumenyi imwe (The World Book Encyclopedia) ivuga iti: “Mu bisanzwe, abantu baguma barushiriza kwibagira uko igihe kirengana. . . . Kumbure biramaze gushika ntushobore kwibuka izina canke ikindi kintu wahora wamiza mu kanwa. . . . Ukwo kwibagira kw’akanya gato, ugukunda gushika, kwitwa urwiba. Abanyasiyansi barugereranya no kugerageza gutora ikintu kiri mu kibanza kitagenewe, mu cumba ibirimwo ari umwandagaro. . . . Uburyo bwiza bwo kuraba neza ko wokwibuka ikintu umenye, ni ukuciga imbere yuko wibaza ko ukizi neza.” Inyigisho igiranywe ubwira n’isubiramwo bizodufasha kwibuka ivyibutswa vy’Imana no gushira aho bishize ku bw’ineza yacu bwite.

7. Ni kuki ivyibutswa vy’Imana bikenewe muri iki gihe kuruta ikindi gihe cose cahise?

⁷ Dukeneye ivyibutswa vya Yehova muri iki gihe kuruta ikindi gihe cose caheze, kubera yuko ububisha bwashitse ku rugero runini kuruta ikindi gihe cose kuva abantu babayeho. Mu gihe dutega yompi ivyibutswa vy’Imana, turaronka uguca mu kajisho gukenewe kugira ngo twirinde gukwegwakwegerwa mu nzira mbi z’isi. Umwanditsi wa Zaburi yavuze ati: “Mfise ubgenge buruta ubg’abigisha banje bose; kukw [“ivyibutswa vyawe,” NW] ari vyo ndimbūra. Ndusha abatāma ubgenge, kuko nitondeye amateka washinze. Nabujije ibirenge vyanje inzira mbi yose, kugira ngo nitondere ijambo ryawe.” (Zaburi 119:99-101) Mu kwitondera ivyibutswa vy’Imana, tuzoca kure “inzira mbi yose” twongere twirinde gucika nk’abantu muri rusangi, abo “ivyiyumviro vyabo biri mu mwiza, batandukanijwe n’ubu[zima] buva ku Mana.”​—Abanyefeso 4:17-19.

8. Dushobora gute kurushiriza kugira ivya ngombwa bituma twererwa mu guhangana n’ibigerageza ukwizera?

⁸ Ivyibutswa vy’Imana birakenewe kandi kubera yuko bidukomeza kugira ngo twihanganire ibigeragezo vyinshi duhura muri iki “gihe c’iherezo.” (Daniyeli 12:4) Ivyo vyibutswa bidashikirijwe, twocika ‘abumva [ibintu] bakavyibagira.’ (Yakobo 1:25) Mugabo kwiyigisha Ivyanditswe no kuvyigira mw’ishengero tubigiranye ubwira, tubifashijwemwo n’ibisohokayandikiro biva kuri “wa mushumba w’umwizewa kandi w’incabwenge,” bizodusahiriza kugira ngo twererwe mu guhangana n’ibigeragezo vy’ukwizera. (Matayo 24:45-47, NW) Intunganyo nk’izo zo mu buryo bw’impwemu zituma dushobora kubona ico dutegerezwa gukora kugira ngo duhimbare Yehova igihe dusanze turi mu bintu bigerageza.

Uruhara Ruhambaye Cane rw’Amakoraniro Yacu

9. Ba “bantu b’ingabirano” ni bande, kandi bafasha gute abo basangiye ukwemera?

⁹ Ivyibutswa vy’Imana dukenera, mu buryo bumwe tubironkera mu makoraniro y’Abakirisu, aho inyigisho itangwa n’abavukanyi bagenywe. Intumwa Paulo yanditse yuko igihe Yezu “[yaduga], aja iyo hejuru ajanye iminyago, [yagavye] [“abantu b’ingabirano,” NW].” Paulo yongeyeko ati: “[Kirisitu] yahaye bamwe kuba intumwa, abandi kuba abavugishwa na we, abandi kuvuga ubutumwa bgiza, abandi kuba abungere n’abigisha: kugira ngw abera babone [kubogorwa], baheze bakore igikorwa [c’ubusuku], bubake umubiri wa Kristo.” (Abanyefeso 4:8, 11, 12) Ese ukuntu dushobora gukura ubwatsi kuba abo “bantu b’ingabirano”​—ni ukuvuga abakurambere bagenywe​—bayobora ivyiyumviro vyacu ku vyibutswa vya Yehova igihe dukoraniye hamwe ku bw’ugusenga!

10. Iciyumviro nyamukuru kiri mu Baheburayo 10:24, 25 ni ikihe?

¹⁰ Gukura ubwatsi ku bw’intunganyo z’Imana bizotuvyurira umutima wo kwitaba indwi ku ndwi amakoraniro atanu y’ishengero tugira. Ivy’uko gukoranira hamwe ubudahorereza bikenewe, Paulo yarabishimitseko. Yanditse ati: “Twiyumviraneko, kugira ngo turwane ishaka ryo gukundana n’iry’ibikorwa vyiza, twoye guheba gukoranira hamwe, nk’uko bamwe bagira, ariko duhanūrane, kand’uko mubonye wa musi wegereza, murushirize kugenza murtyo.”​—Abaheburayo 10:24, 25.

11. Rimwe ryose mu makoraniro tugira ku ndwi ritwungura gute?

¹¹ Woba ukenguruka ivyo amakoraniro yacu adukorera? Inyigisho y’Umunara w’Inderetsi igirwa ku ndwi irakomeza ukwizera kwacu, ikadufasha gushira aho ivyibutswa vya Yehova bishize, ikongera ikaduha ingoga zo kunanira “impwemu y’iyi si.” (1 Ab’i Korinto 2:12; Ivyakozwe 15:31) Kw’ikoraniro ry’icese, abashikirizansiguro barashikiriza inyigisho iva mw’Ijambo ry’Imana, harimwo n’ivyibutswa vya Yehova be n’“amajambo y’ubu[zima] budashira” y’akaroruhore Yezu yavuze. (Yohana 6:68; 7:46; Matayo 5:1–7:29) Ubuhanga bwacu bw’ukwigisha burakarishwa kw’Ishure ry’Ubusuku bwa Gitewokarasi. Ikoraniro ry’Umurimo riri n’agaciro ntangere mu vy’ukudufasha kuryohora uburyo dushikiriza inkuru nziza inzu ku yindi, mu gihe c’amasubirayo, ku nyigisho za Bibiliya zo ku mihana, be no mu zindi nzira z’ubusuku bwacu. Umugwi mutoyi kuruta wo ku Nyigisho y’Igitabu y’Ishengero uraduha akaryo karushirije ko guserura ivyiyumviro kenshi biba birimwo ivyibutswa vy’Imana.

12, 13. Abasavyi b’Imana bo mu gihugu kimwe co muri Aziya bagaragaje gute ko bakenguruka amakoraniro y’Abakirisu?

¹² Kuba turi ku makoraniro y’ishengero tudahorereza biratuma twibutswa amabwirizwa y’Imana kandi bikadufasha kuguma dukomeye mu vy’impwemu mu gihe duhangana n’indwano, amagume yo mu vy’ubutunzi, be n’ibindi bigerageza ukwizera kwacu. Akamaro k’amakoraniro karumviswe mu buryo bukomeye n’Abakirisu nka 70 bo mu gihugu kimwe co muri Aziya, abateshejwe izabo bagahatirwa kuba mw’ishamba rya nyaganande. Kubera biyemeje kubandanya gukoranira hamwe ubudahorereza, barasubiye mu gisagara cabo cari gisinzikajwe n’intambara, barasambura ivyari bisigaye ku Ngoro y’Ubwami, maze basubira kuyubakira muri iryo donzi.

¹³ Inyuma yo kwihanganira imyaka itari mike y’intambara mu kandi gace k’ico gihugu nyene, abasavyi ba Yehova baracasukura n’umwete. Umwe mu bakurambere bo muri ako karere yabajijwe ati: “Ni igiki cafashije kuruta mu vy’ugutuma abavukanyi baguma bafatanye mu nda?” Yatanze iyihe nyishu? “Mu myaka 19, nta koraniro ryigeze riducika. Rimwe na rimwe, kubera amabombe yacucagirwa canke izindi ngorane, bamwebamwe mu bavukanyi ntibashobora gushika ku kibanza c’ikoraniro, mugabo ntitwigeze na rimwe duhagarika ikoraniro.” Abo bavukanyi n’abavukanyikazi bakundwa nta nkeka baratahura akamaro ko ‘kutareka gukoranira hamwe.’

14. Dushobora kwigira iki ku mugenzo wa Ana yari yigereye mu zabukuru?

¹⁴ Wa mupfakazi Ana w’imyaka 84 “ntiyava mu rusengero.” Ico ivyo vyavuyemwo ni uko ari ho yari igihe akayoya Yezu kazanwa kamaze igihe gito kavutse. (Luka 2:36-38) Woba wiyemeje kudahara ku makoraniro? Woba uriko uragerageza uko ushoboye kugira ngo witabe ikiringo cose c’amateraniro n’amahwaniro yacu? Inyigisho nzanakunguko mu vy’impwemu turonkera muri iyo mitororokano, iraduha ikimenyamenya kigaragara c’uko Dawe wa twese wo mw’ijuru abungabunga abasavyi biwe. (Yesaya 40:11) Ivyo bihe kandi biratsimbataza umunezero, vyongeye ukuba tuhari biragaragaza ko dukenguruka ivyibutswa vya Yehova.​—Nehemiya 8:5-8, 12.

Abashizwe ku Ruhande n’Ivyibutswa vya Yehova

15, 16. Kwitondera ivyibutswa vya Yehova bigira ico bikoze gute ku kuntu twigenza?

¹⁵ Kwitondera ivyibutswa vy’Imana birafasha mu kudutandukanya n’iyi si mbi. Nk’akarorero, gukurikiza ivyibutswa vy’Imana biratuma tutisuka mu bushegabo. (Gusubira mu Vyagezwe 5:18; Imigani 6:29-35; Abaheburayo 13:4) Ikigeragezo co kubesha, kuba ingunge canke kwiba kirashobora guhashwa bigakunda mu gushira aho ivyibutswa vy’Imana bishira. (Kuvayo 20:15, 16; Abalewi 19:11; Imigani 30:7-9; Abanyefeso 4:25, 28; Abaheburayo 13:18) Kwitondera ivyibutswa vya Yehova kandi biratuma tutihora, tudatara inzika mu nda canke ngo hagire uwo dusiga iceyi.​—Abalewi 19:16, 18; Zaburi 15:1, 3.

¹⁶ Mu gukurikiza ivyibutswa vy’Imana, tuguma twejejwe, canke dushizwe ku ruhande ku bw’umurimo wayo. Kandi ese ukuntu bihambaye gutandukanywa n’iyi si! Mw’isengesho yatuye Yehova mw’ijoro rya nyuma ry’ubuzima bwiwe bwo kw’isi, Yezu yatakamvye ku bw’abayoboke biwe ati: “Nabahaye ijambo ryawe; kand’ab’isi barabanka, kukw atar’ab’isi, nk’uko nanje ntar’uw’isi. Singusaba ng’ubakūre mw isi, ariko ng’ubarinde wa Mubi. S’ab’isi, nk’uko nanje ntar’uw’isi. Ubeze mu kuri: ijambo ryawe ni ryo kuri.” (Yohana 17:14-17) Nimuze tubandanye gukunda cane Ijambo ry’Imana, iridushira ku ruhande ku bw’umurimo wayo mweranda.

17. Ni igiki coshika mu gihe twokwiyobagiza ivyibutswa vy’Imana, none dukwiye gukora iki?

¹⁷ Bwa basavyi ba Yehova, dushaka kuguma twemewe ku bw’umurimo wiwe. Ariko rero, hamwe twokwiyobagiza ivyibutswa vy’Imana, twotsindwa n’impwemu y’isi ikorerezwa kenshi mu mvugo yayo, mu bitabu, mu kwimara ubute, no mu kuntu yigenza. Kandi nta nkeka ntidushaka gucika inkunzi z’amahera, abirarira, abibona, intashima, abahemu, inkazi, ibirandamuke, abikakisha, abakunda ibibahimbara bakabirutisha Imana​—tukaba tuvuze gusa bike mu biranga abantu bonkowe ku Mana. (2 Timoteyo 3:1-5) Kubera yuko tugeze kure mu misi y’iherezo y’uru runkwekwe rw’ibintu rubi, nimuze tugume dusenga dusaba imfashanyo Imana kugira ngo dushobore kubandanya kwitondera ivyibutswa vya Yehova maze gutyo ‘tuvyitondere nk’uko ijambo ryayo ribivuga.’​—Zaburi 119:9.

18. Kwitondera ivyibutswa vy’Imana bizotuma dutera izihe ntambwe nziza?

¹⁸ Ivyibutswa vya Yehova ntibitugabisha gusa ku bintu dutegerezwa kudakora. Kwitondera ivyibutswa vyiwe bizotuma tugira ico dukoze ciza, bituvyurire umutima wo kwizigira Yehova tugaherezako no kumukunda n’umutima wacu wose, n’ubugingo bwacu bwose, n’umuzirikanyi wacu wose, n’inkomezi zacu zose. (Gusubira mu Vyagezwe 6:5; Zaburi 4:5; Imigani 3:5, 6; Matayo 22:37; Mariko 12:30) Ivyibutswa vy’Imana biratuvyurira kandi umutima wo gukunda abandi bantu nkatwe. (Abalewi 19:18; Matayo 22:39) Tugaragariza Imana n’abandi bantu nkatwe urukundo canecane mu gukora ivyo Imana igomba no mu gusangira n’abandi “ukumenya Imana” gutanga ubuzima.​—Imigani 2:1-5.

Kwitondera Ivyibutswa vya Yehova Ni Bwo Buzima

19. Dushobora gute kwereka abandi yuko ari ngirakimazi kandi ko ari nzanakunguko kwumvira ivyibutswa vya Yehova?

¹⁹ Mu gihe twitondeye ivyibutswa vya Yehova tukongera tugafasha abandi kubigenza gurtyo, tuzokwikiza twongere dukize n’abadutega amatwi. (1 Timoteyo 4:16) Dushobora gute kwereka abandi yuko kwumvira ivyibutswa vya Yehova ari ngirakimazi kandi ko ari nzanakunguko? Mu gushira mu ngiro ingingo za Bibiliya mu buzima bwacu bwite. Abantu ‘bari mu mero nziza y’umutima ituma baronka ubuzima budahera’ (NW) ico gihe bazoronka ikimenyamenya c’uko ingendo yerekanwa mw’Ijambo ry’Imana koko ari yo nziza birushirije umuntu yokurikira. (Ivyakozwe 13:48) Bazobona kandi yuko ‘Imana iri muri twebwe vy’ukuri,’ maze bavyurirwe umutima wo kwifatanya natwe mu gusenga Umukama Segaba Yehova.​—1 Ab’i Korinto 14:24, 25.

20, 21. Ivyibutswa vy’Imana be n’impwemu yayo bizodushoboza gukora iki?

²⁰ Mu kubandanya kwiga Ivyanditswe, tugashira mu ngiro ivyo twiga, tukongera tukungukira bimwe vyuzuye ku ntunganyo zo mu vy’impwemu za Yehova, tuzoshika ku gukunda ivyibutswa vyiwe mu buryo buhebuje. Ivyo vyibutswa tubikurikije, bizodufasha kwambara “wa muntu musha, yaremwe mw ishusho y’Imana mu kugororoka no mu kwera kw’ukuri.” (Abanyefeso 4:20-24) Ivyibutswa vya Yehova be n’impwemu yiwe yera bizodushoboza kugaragaza urukundo, umunezero, amahoro, ukwihangana, kugira neza, ingeso nziza, kuba umwizigirwa, ubugwaneza n’ukwirinda​—akaba ari kamere zidasa na gato n’ibiranga isi iri mu bubasha bwa Shetani! (Ab’i Galatiya 5:22, 23; 1 Yohana 5:19) Ni co gituma dushobora gukura ubwatsi igihe twibutswa ivyo Yehova asaba mu gihe c’ukwiyigisha Bibiliya, biciye ku bakurambere bagenywe no ku makoraniro yacu, ku materaniro be no ku mahwaniro.

²¹ Kubera yuko twitondera ivyibutswa vya Yehova, turashobora kunezerwa n’igihe mbere twoba turiko turacumukura tuzira ukurondera ubugororotsi. (Luka 6:22, 23) Turahanga amaso Imana kugira ngo iturokore mu bintu birushirije kuba ibiduhanamiye. Ivyo birahambaye mu buryo budasanzwe ubu aho amahanga yose ariko aratororokanywa ku bwa ya “ntambara yo ku musi uhambaye w’Imana ishobora vyose” yo kuri Harumagedoni.​—Ivyahishuriwe 16:14-16.

22. Umwiyemezo wacu ukwiye kuba uwuhe ku biraba ivyibutswa vya Yehova?

²² Niba dushaka kuronka ingabirano tudakwiriye y’ubuzima budahera, dutegerezwa gukunda ivyibutswa vya Yehova mu buryo buhebuje kandi tukavyitondera n’umutima wacu wose. Nimuze rero tugire ka gatima umwanditsi wa Zaburi yari afise, uwaririmvye ati: “[“Ivyibutswa vyawe,” NW] n’ivyo kugororoka ibihe bidashira: umpe ubgenge mbone kubaho.” (Zaburi 119:144) Kandi, ese twogaragaza umwiyemezo ubonekera mu majambo y’uwo mwanditsi wa Zaburi agira ati: “Ndagutakambiye [Yehova], nkiza, kugira ngo nitondere [“ivyibutswa vyawe,” NW].” (Zaburi 119:146) Egome, mu mvugo no mu ngiro, nimuze tugaragaze yuko vy’ukuri dukunda ivyibutswa vya Yehova mu buryo buhebuje.

Wokwishura Gute?

• Umwanditsi wa Zaburi yabona gute ivyibutswa vya Yehova?

• Ni kuki dukeneye ivyibutswa vy’Imana?

• Amakoraniro yacu afise uruhe ruhara ku bijanye n’ivyibutswa vy’Imana?

• Ivyibutswa vya Yehova bidutandukanya gute n’iyi si?

[Ifoto ku rup. 25]

Umwanditsi wa Zaburi yarakunda ivyibutswa vya Yehova mu buryo buhebuje

[Ifoto ku rup. 26, 27]

Ukurikije akarorero ka Ana, woba wiyemeje kudahara ku makoraniro?

[Ifoto ku rup. 28]

Kwumvira ivyibutswa vya Yehova biradushira ku ruhande bwa bantu badahumanye kandi bemewe ku bw’umurimo wiwe