Ni Ngombwa Turote

WEWE woba uhora ugira indoto? Uvúze yuko uhora uzigira nta woguhaririza, kuko twese turota igihe turi mw itiro, naho twokwivugisha yuko tutarota. Vyagereranijwe yuko mu ndoto zose, izirenga 95 kw ijana zitībukwa. Wewe izo wibuka ni izihe? Mu vy’ukuri, izo mu bisanzwe twibuka ni izo tugira tugomba twikangure.

Abapererezi b’ivy’indoto bǎtoye yuko itiro ari ikintu kibandanya, rikadwebeza mu masaha makeyi ya mbere hanyuma maze rikaja rirageruka. Ukurota kuza canecane mu biringo vy’umukomango w’amaso unyaruka, witwa uw’itiro REM. Iryo rija rirakurakuranwa n’itiro ritari REM. Buri kiringo c’itiro ritari REM n’iriri REM kimara nk’iminuta 90, ivyo biringo birisubiriza incuro zitanu canke zitandatu mw ijoro, ica nyuma kigashika umuntu aca yikangura.

Kwiyumvira yuko ubwonko bwawe bukora gahoro mu gihe c’itiro, ni ukwihenda. Vyǎratowe yuko mu ndoto ubwonko bukora cane kuruta mu bihe bimwebimwe umuntu aba ari maso, kiretse amanerone amwamwe yo mw itsinatsina ry’ubwonko, ayari n’ico agira kw ikebu no ku bwibutsi. Bisa n’uko ano aruhuka mu gihe c’itiro REM. Ariko mu bisanzwe amaselǐle yo mu dutsidutsi mu bwonko aragiranira ihanahanamakuru rica muri yo.

Ubwonko bwacu ni igihimba c’umubiri kinyuriranye bimwe vy’akajoreza, kigizwe n’imicemice amamiliyaridi itanga ibimenyetso biva nko kw ijana gushika ku majana abiri canke atatu ku musegunda. Mu bwonko bw’umuntu harimwo imicemice mu bwinshi isumba abantu bari kw isi. Abashakashatsi bamwebamwe bagereranya yuko burimwo imicemice itandukanye iva ku mamiliyaridi 20 gushika ku mamiliyaridi 50. Ubunyurirane bwabwo buremeza ico umwanditsi wa Bibiliya Dawidi yavuze ku vyerekeye umubiri w’umuntu: “Ndagushimira yuko naremwe uburyo buteye ubgoba butangaje: ibikorwa vyawe n’ibitangaza.”—Zaburi 139:14.

Ivy’Indoto

Mu gihe tuba turi maso, za nyurīro zitanu zacu ziguma zirungikira ubwonko amabwiro hamwe n’amashusho, ariko mu gihe c’itiro ivyo si ko bigenda. Ubwonko buratunganya amashusho muri bwo nyene, ata kintu izo nyurīro zifashijemwo. Kubera ico, ivyo tubona mu ndoto hamwe n’ibikorwa tuzibonamwo, rimwe na rimwe bimera nk’ivyezeri. Ivyo bituma bidushobokera kugira ibintu birenga ku mateka y’ibibaho, nk’ukuguruka bunyoni canke gutibuka uvuye ku manga ntihagire ico uba. Igihe kirashobora guhinduka ukundi ku buryo kahise kaboneka nk’uko koba ari kubu. Canke mu gihe turiko tugerageza kwiruka ntidusa n’abashoboye kwitunganiriza imyikomango tugira—amaguru yacu ntava aho ari. Ivyo twokwiyumvamwo n’ivyo twobona mu masaha tuba tudasinziriye, birumvikana ko bishobora kugira ico bikoze ku ndoto zacu. Abatari bake bǎshikiwe n’ibicavutu biteye ubwoba vy’intambara ntibashobora kworoherwa no kuvyibagira, eka mbere bamwe ntibashobora kwibagira inyiyumvo zivuye ku guterwa n’inkozi y’ikibi. Ibintu mwen’ivyo bituvuruga igihe tuba turi maso, birashobora kuza mu ndoto zacu, bigatuma tugira imikangaguriko. Ibintu bisanzwe biba biri mu mizirikanyi yacu igihe tugiye kuryama birashobora kwuburuka mu ndoto zacu.

Rimwe na rimwe igihe turiko tugerageza gutunganya ingorane yinaka, umuti wayo uratuzamwo mu gihe c’itiro. Ivyo bishobora kugaragaza yuko itiro ryose ritaba rigizwe n’ukurota. Igihimba kimwe caryo ni ukwiyumvira.

Igitabu kimwe cerekeye ivy’indoto n’ubwonko bwacu kivuga ibi: “Imero isanzweho rwose y’igikorwa c’umuzirikanyi mw itiro si ukurota ariko ni ukwiyumvira. Ukwiyumvira kwo mw itiro ntiguherekezwa n’inyurīro, kandi si ukutagira ifatiro. Gutera kuba ugukwiragiye, kukaba kandi kwishinga ibishikiragihe biba mu buzima, ivyahise n’ibizoza, kandi kenshi gukunda gupfa kwizana, nta co kurema, kandi kurisubiriza.”

Abantu bamwebamwe biyumvira yuko ibiri mu ndoto zabo bifise ubutumwa budasanzwe bibafitiye. Kugira nya ndoto bazisigurirwe, baragumana agakaye hagitanda cabo kugira bashobore kuvyandika igihe bikanguye. Ku biraba ubugirekamaro bw’ibitabu bigerageza gutanga insobanuro y’ibimenyetso vyo mu ndoto, igitabu The Dream Game, canditswe na Ann Faraday, kivuga giti: “Ibitabu vy’indoto, ivyo muronderamwo insobanuro y’imitwe-shimikiro y’indoto n’ibigereranyo vyazo, biranganya ukuba ibitaco bimaze, vyaba ivya kera canke ibishingiye ku ndimbo y’ivy’inyigenzo.”

Kubera ko bisa n’uko indoto zikomoka canecane mu bwonko, vyoba ari ibidategereka twiyumviriye yuko zidufitiye ubutumwa budasanzwe. Dukwiye kuzibona nk’ikora risanzwe ry’ubwonko ridufasha kubuzigama ngo bugume bufise amagara meza.

Ariko bite none ku bavuga yuko bari baronse indoto z’urupfu rw’incuti canke umugenzi hanyuma bukeye bwaho bakumva ko nya muntu yapfuye? Ivyo none ntivyoba vyerekana ko indoto zishobora kubûra kazoza? Mu gihimba gikurikira, turaja kurimbura ikiri inyuma y’indoto menyeshakazoza.