Inkuru Nziza Bashaka ko Wumva

IGIHE Yezu yari kw’isi, abigishwa biwe baraje kuri we hanyuma baramubaza bati: “Ikimenyetso kizoba iki c’ukuhaba kwawe n’ic’insozero ry’urunkwekwe rw’ibintu?” (NW) Yashubijeyo yuko hobayeho intambara zirwanwa n’amahanga menshi, ibigoyi, ibiza, vya nyamugigima, iyongerekana ry’ubugarariji, abigisha b’ivy’idini b’ibinyoma bahubisha benshi, ukwankwa hamwe n’uguhamwa kw’abayoboke biwe b’ukuri, hamwe n’ihwama ry’ugukunda ibigororotse mu bantu benshi. Igihe ivyo bintu vyotanguriye gushika, vyobaye vyerekana ko Kirisitu ahari mu buryo butaboneka be n’uko bwa Bwami bwo mw’ijuru bugira bushike. Iyo yobaye ari inkuru—inkuru nziza! Nuko rero Yezu yongeyeko aya majambo bwa gihimba ca nya kimenyetso ati: “[“Iyi nkuru nziza y’ubwami,” NW] [i]zovugwa mw isi yose, ngo [i]be ikimenyetso kibere icabona amahanga yose, maz’umuhero uzoca uza.”—Matayo 24:3-14.

Ibiherutse kuba mw’isi ubwavyo ni bibi, mugabo ico bisobanura ni ciza, ni ukuvuga ukuhaba kwa Kirisitu. Ibintu vyavuzwe aho haruguru vyatanguye kwibonekeza muri wa mwaka wavugwa cane w’1914! Vyaranze iherezo ry’Ibihe vy’Abanyamahanga be n’intango y’ikiringo mfatakibanza c’ukuva ku butegetsi bw’abantu tukaja ku Ngoma ya Kirisitu y’Imyaka Igihumbi (Ikimpumbi).

Ivy’uko hobayeho ikiringo mfatakibanza birerekanwa na Zaburi y’110, umurongo wa 1 n’uwa 2, be n’Ivyahishuriwe 12:7-12. Ngaho herekanwa yuko Kirisitu yovyagiye i buryo bw’Imana mw’ijuru gushika igihe yobereye Umwami. Maze intambara yobaye mw’ijuru yociye ituma Shetani atabwa kw’isi, bikazana ibara kw’isi, Kirisitu na we akaganza hagati y’abansi biwe. Umuhero nyawo w’ububisha woje biciye ku “marushwa ahambaye,” ayoshikiriye agaheta kayo ku ntambara yo kuri Harumagedoni hanyuma agakurikirwa n’Ingoma ya Kirisitu y’Imyaka Igihumbi irangwa amahoro.—Matayo 24:21, 33, 34; Ivyahishuriwe 16:14-16.

Bibiliya ivuga iti: “Arik’umenye yuko mu misi y’iherezo hazoba ibihe bigoye. Kukw abantu bazoba bikunda gusa, bakunda amahera, bīrārīra, bibona, batukana, batumvira abavyeyi, intashima, abanegura ivy’Imana, badakunda n’ababo, banka kwuzura, barementanya, batigarura, inkazi, badakunda ivyiza, abaguranyi, ibirandamuke, abikakisha, bakunda ibibahimbara bakabirutisha Imana, bafise ishusho yo kwubaha Imana, ariko bahakana ubushobozi bgakwo: abameze bartyo wame ubatera ibitugu.”—2 Timoteyo 3:1-5.

Bamwe boharira ngo ivyo bintu vyari vyarashitse muri kahise k’abantu, mugabo ukuri ni uko bitaribwigere bibaho gushika ku rugero nk’urwo. Nk’uko abatohozakahise hamwe n’abasasanuzi bavuga, kw’isi ntihigeze kubaho igihe kimeze nk’icahabaye kuva mu 1914 no kubandanya. (Raba urupapuro rw’7.) Ibintu vy’ibara vyageze kure rwose kuruta igihe cose c’imbere yaho. Vyongeye, ku vyerekeye iyindi mice ya ca kimenyetso Kirisitu yatanga c’imisi y’iherezo, ibi bintu birakwiye kurimburwa: Imenyekanishwa ry’ukuhaba kwa Kirisitu be n’Ubwami bwiwe rigirwa kw’isi yose ryarashikiriye urugero ritaribwigere rishikako muri kahise. Uguhamwa kw’abamamaza inkuru nziza ntaho kurigera kungana n’ukwashikiye Ivyabona vya Yehova. Abashika amajana muri bo bariciwe mu makambi y’itunatuniro y’Abanazi. Gushika uyu musi Ivyabona vya Yehova barabujijwe mu mihingo imwimwe, mu yindi na ho barafatwa, bagapfungwa, bagasinzikarizwa ubuzima, n’ukwicwa bakicwa. Ivyo vyose biri mu bigize ca kimenyetso Yezu yatanga.

Nk’uko vyabuwe mu Vyahishuriwe 11:18, ‘amahanga yararakiye’ Ivyabona vya Yehova, ivyo bikaba vyerekana yuko ‘uburake bwa Yehova ubwiwe’ buzoziriringira ayo mahanga. Ico canditswe nyene kivuga yuko Imana ‘izohonya abahonya isi.’ Muri kahise k’abantu ntiharibwigere haba igihe ubushobozi isi ifise bwo gutunga ubuzima buhanamirwa. Ariko rero, ubu ibintu bimeze ukundi! Abanyasiyansi benshi barabuye yuko umuntu niyabandanya atosekaza isi, izocika aho umuntu adashobora kuba. Mugabo Yehova “yayibumvye kugira ngw ibekw abantu,” kandi azorandura abatosekaza isi imbere yuko bayitosekaza buhere.—Yesaya 45:18.

IMIHEZAGIRO IZOBA KW’ISI KU NGOMA Y’UBWAMI

Iciyumviro c’uko abantu boba kw’isi batwarwa n’Ubwami bw’Imana coshobora gusa nk’ikigoye kwemera ku bantu benshi bemera Bibiliya biyumvira yuko abazokizwa bose bazoja mw’ijuru. Bibiliya yerekana yuko igitigiri gitoyi gusa ari co kija mw’ijuru be n’uko abazoba kw’isi ibihe bidahera bazoba ari ishengero rinini ry’igitigiri kitagira akarimbi. (Zaburi 37:11, 29; Ivyahishuriwe 7:9; 14:1-5) Ivy’uko ubwo Bwami buganzwa na Kirisitu buzokwira isi bwongere buhangame kuri yo birerekanwa n’ubuhanuzi bwo mu gitabu ca Daniyeli.

Muri ico gitabu Ubwami bwa Kirisitu bugereranywa n’ibuye risituwe ku busegaba bwa Yehova bugereranywa n’umusozi. Rirakubita kandi rigasangangura igishushanyo kigereranya amahanga y’ububasha yo kw’isi, hanyuma “iryo buye ryikubise kur’ico gishushanyo ricika umusozi munini, ryuzura isi yose.” Ubwo buhanuzi burabandanya buti: “Ku ngoma z’abo bami, Imana yo mw ijuru izohagurutsa ubundi bgami butazokwigera buhangūra, kand’ingoma y’inganji yabgo nta ho izonyagwa n’irindi hanga; ariko buzomara bukomvomvore ubgami bgose bg’abo bami; yamara bgo buzohangama gushitsa ibihe vyose.”—Daniyeli 2:34, 35, 44.

Ubwo Bwami hamwe n’icizigiro gishigikiwe n’Ivyanditswe c’ubuzima budahera bwo kw’isi yahumanuwe kandi yagizwe akaroruhore, ni vyo Ivyabona vya Yehova bipfuza kukubwira. Abantu amamiliyoni bariho ubu hamwe n’amamiliyoni menshi cane y’abantu ubu bibereye mu mva zabo, bazoronka akaryo ko kwiberaho ibihe bidahera. Maze, ku Ngoma ya Kirisitu Yezu y’Imyaka Igihumbi, umugambi Yehova yari afise mu ntango wo kurema isi no kuyishirako umugabo n’umugore ba mbere, uzoranguka. Iyo Paradizo yo kw’isi ntizokwigera irambira abantu. Nk’uko nyene Adamu yari yashinzwe gukora mw’itongo ry’i Edeni, ni ko abana b’abantu bazoba bafise ibikorwa bihambaye mu kubungabunga isi hamwe n’ibiterwa be n’ibikoko biri kuri yo. “Bazoshitsa igihe kirekire banezererwa igikorwa c’amaboko yabo.”—Yesaya 65:22, Itanguriro 2:15.

Hoshobora gushikirizwa Ivyanditswe vyinshi vyo kwerekana ukuntu ibintu bizoba bimeze igihe rya sengesho Yezu yatwigisha rizoba ryishuwe, ari ryo ry’iri: “Ubgami bgawe buze, ivyo ugomba bibe mw isi nk’uko biba mw ijuru.” (Matayo 6:10) Ariko rero, reka twongereko iki canditswe conyene: “Numva ijwi rirenga, rivuye kuri ya ntebe, rit’Eh’ihema ry’Imana riri kumwe n’abantu, kand’izogerēra muri bo, na bo bazoba abantu bayo, kand’Imana ubgayo izobana na bo, izoba Imana yabo. Izohanagura amosozi yose ku maso yabo, kand’urupfu ntiruzoba rukiriho, kand’amaborogo no gutaka n’uburibge ntibizoba bikiriho: kukw ivya mbere bishize. Īvyagira kuri ya ntebe iravuga, iti Rāba vyose ndabihindura bisha. Kand’it’Andika, kukw ayo majambo ar’ayo kwizerwa n’ay’ukuri.”—Ivyahishuriwe 21:3-5.

[Iciyumviro ku rup. 15]

“Ibihe bigoye,”

ARIKO “maz’umuhero uzoca uza”

[Ifoto ku rup. 18]

Pays-Bas

[Ifoto ku rup. 18]

Nijeriya