Ibintu bitatu twokora vyerekana ko twiheka kuri Yehova

Dawidi yaratsinze Goliyati kubera yiheka kuri Yehova. (1Sm 17:45) Yehova yipfuza kwerekana inkomezi ziwe ku bw’abasavyi biwe. (2Ng 16:9) Ni gute none twokwiheka ku mfashanyo Yehova atanga aho kwiheka ku tuntu n’utundi tuzi canke ku bubangukirwe dufise? Ng’ibi ibintu bitatu twokora:

• Nusenge kenshi. Ntusenge gusa usaba imbabazi igihe wamaze gukora ikosa ahubwo kandi nusenge usaba inkomezi igihe uhanganye n’ikigeragezo. (Mt 6:12, 13) Ntusenge usaba gusa ko Yehova ahezagira ingingo wamaze gufata ahubwo kandi numusenge umusaba ubuyobozi n’ubukerebutsi imbere y’uko ufata ingingo.​—Yak 1:5

• Nugire akamenyero ko gusoma Bibiliya no kuyiga. Nusome Bibiliya buri musi. (Zb 1:2) Nuzirikane ku burorero buri muri Bibiliya wongere ushire mu ngiro ivyigwa ubukuramwo. (Yak 1:23-25) Niwitegurire indimiro aho kwiheka ku vyo umaze gushikako. Niwungukire bimwe bishitse ku makoraniro y’ishengero mu kuyategura imbere y’igihe

• Nukurikize ubuyobozi bw’ishirahamwe rya Yehova. Nugume urondera kumenya ubuyobozi bugezweho ishirahamwe ritanga kandi wihutire kubukurikiza. (Gh 9:17) Nutege yompi abakurambere igihe batanga impanuro n’ubuyobozi.​—Heb 13:17

NIMURABE IVIDEWO IVUGA NGO NTA MVO YOTUMA DUTINYA URUHAMO, MUCE MWISHURA IBIBAZO BIKURIKIRA:

• Ni ibintu biteye ubwoba ibihe vyashikiye abavukanyi na bashiki bacu?

• Ni ibiki vyabafashije gutsinda ubwoba?