Turyohore ubuhanga bwacu mu busuku—Gufasha uwo mwajanye

Igituma bihambaye: Yezu yari azi ko kwamamaza uri kumwe n’uwundi muntu bifise akamaro. Rero igihe yarungika 70 mu bigishwa biwe ngo bamwitangire imbere kuja kwamamaza, yabarungitse ari babiribabiri. (Luka 10:1) Uwo mwajanye arashobora kugufasha igihe uhuye n’ibintu bitoroshe canke igihe utazi ico wokwishura umunyamuhana. (Umus. 4:9, 10) Arashobora gusabikanya nawe ubuhanga afise kandi rimwerimwe akaguterera iciyumviro coshobora kugufasha kurushiriza kuba umwamamaji kirumara. (Imig. 27:17) Arashobora kandi kukuremesha biciye ku biganiro vyubaka mugiranira imbere y’uko mushikira uwundi muhana.—Flp. 4:8.

Uko twobigira:

Nukurikire witonze igihe uwo mwajanye ariko arashinga intahe. (Yak. 1:19) Igihe icanditswe kiriko kirasomwa, nukurikire muri Bibiliya yawe. Ivyo bizotuma ushobora gufasha igihe bikenewe.
Nukoreshe ubukerebutsi kugira umenye nimba wogira uruhara mu kiganiro n’igihe wobigira. (Imig. 25:11) Igihe waherekeje uwundi mwamamaji ku nyigisho ya Bibiliya, ivyiyumviro bizoshika ugacishamwo azobikenguruka. Ivyo bisobanura ko udakwiye kwitega kuyobora ingingo kanaka. Ariko ntiwumve, igihe umwamamaji nyene inyigisho ya Bibiliya yipfuza gusaba umukirisu ahumuye, nk’umucungezi w’umuzunguruko, ngo ayobore iyo nyigisho kugira ngo amwigireko maze na we amenye utuntu n’utundi, uwo mwamamaji arashobora guhitamwo kubigira. Yamara, igihe muriko muramamaza inzu ku nzu, uwo muri kumwe yoshobora gushima ko umureka akavuga igihe aba ari we ashikiriwe. Mugabo, igihe aba ari umwamamaji mushasha canke igihe atazi ingene yokwishura ikibazo yabajijwe kibure ingene yovyifatamwo igihe abwiwe amajambo yo guhagarika ikiyago, hari aho yoshima ko umufasha. Ariko waba waherekeje uwundi mwamamaji mu busuku bw’inzu ku nzu, mu masubirayo kibure kuyobora inyigisho ya Bibiliya, niwirinde kumucira mw’ijambo, kwihariza ijambo canke gutanguza ikiganiro gitandukanye n’ico mwariko.
Nusabikanye na we ubuhanga ufise. Igihe ubona ko wobwira umwamamaji mwakoranye iciyumviro comufasha kurushiriza kuba kirumara mu busuku, ntureke kukimubwira; ariko ivyo ntiwobigira kenshi. (Imig. 3:27) Ku gihe kibereye, woshobora gutangura uti: “Wabonye vyagenze gute?” canke uti: “Noshobora kuguterera iciyumviro?” kibure uti: “Ehe ico mpora ngerageza gukora.” Nugumize ku muzirikanyi ko naho rimwerimwe abandi bashima ko umuntu abaterera iciyumviro, bazocika intege bagiye barabwirwa agakosa kose bakoze.

Muri uku kwezi nugerageze iki kintu:

Uhejeje gukorana mu busuku n’uwundi mwamamaji, numubwire ibintu yakoze canke yavuze vyakubereye ngirakamaro.