Inyishu ku bibazo vyanyu

◼ Uburyo bwiza bwo gutanga intererano zo gufasha abavukanyi bo mu bindi bihugu bari mu nkenero ni ubuhe?

Rimwe na rimwe, turumva ivy’abavukanyi bo mu kindi gihugu bakenye mu vy’umubiri biturutse ku ruhamo, ku vyago, canke ku bindi bintu bigoye. Abavukanyi bamwebamwe baravyuriwe umutima wo kurungika ku biro vy’ishami vyo muri ivyo bihugu amahera yo gufasha ata handi biriwe barayacisha, basaba yuko akoreshwa mu gufasha umuntu munaka, canke ishengero rinaka kibure iporoje kanaka y’ubwubatsi.—2 Kor. 8:1-4.

Ukwo kwitwararikana urukundo abo dusangiye ukwizera ni ikintu co gushima. Mugabo rero, akenshi usanga hariho ibintu vyihutirwa cane biba bikenewe kuruta ivyo uwo yatanze intererano aba afise ku muzirikanyi. Rimwe na rimwe, hari igihe usanga ico kintu iyo ntererano irungikiwe kimaze kwitwararikwa. Mugabo ntiwumve, twokwizigira tudakeka yuko igihe intererano zirungitswe ku biro vy’ishami ku bw’igikorwa kirangurirwa kw’isi yose, ku bw’Ikigega kigenewe Ingoro z’Ubwami, canke ku bw’ugutabara abashikiwe n’ivyago, ayo mahera azokoreshwa nk’uko uwo yayatanze yabisavye.

Abavukanyi bo ku mashami yose baramenyerejwe bihagije gutabara badatebaganye igihe hari ibikenewe bishitse giturumbuka. Uko biri kwose, ishami riramenyesha Inama Nyobozi ibijanye n’ico kintu. Niba hari iyindi mfashanyo ikenewe, Inama Nyobozi yoshobora gusaba amashami yegereye aho hantu ngo afashe, canke amahera agashobora kurungikwa avuye ku cicaro gikuru.—2 Kor. 8:14, 15.

Ku bw’ivyo rero, intererano zose zigenewe igikorwa kirangurirwa kw’isi yose, amaporoje y’ubwubatsi abera mu bindi bihugu, canke ivy’ugutabara abashikiwe n’ivyago, zikwiye kurungikwa ku biro vy’ishami vyo mu gihugu ubamwo, waba ubicishije kw’ishengero canke ari wewe ubwawe uzirungitse. Muri ubwo buryo, wa “mushumba wo kwizigirwa w’ubgenge” abicishije kuri izo ndinganizo zashizweho n’Inama Nyobozi, aritwararika mu buryo buri ku rutonde ivyo ikivukano co kw’isi yose gikeneye.—Mat. 24:45-47; 1 Kor. 14:33, 40.