Nitwitwararike Ibikorwa vy’Igitangaza vy’Imana

¹ Mu kiringo c’imisi myiza ntangere itatu, twarakoraniye kw’Ihwaniro ry’Intara ryari ryataziriwe ngo “Abakora ivy’Ijambo ry’Imana.” Ivyiyumviro vyacu twarabihindukije tubikura ku myitwarariko y’ubuzima bwa misi yose maze twitunira ku bikorwa vy’igitangaza vya Yehova. Iyo porogarama yari yateguriwe kwongerereza ukwizera kwacu dufitiye Imana n’Ijambo ryayo, gukomeza ubucuti dufitaniye na yo, no kwongerereza ishaka dufitiye ubusuku. None turiko turungukira gute ku bintu twigishijwe?—Yoh. 13:17.

² Imiryango Iragamburuka Ijambo ry’Imana: Uruhererekane rwari rufise umutwe uvuga ngo “Nugamburuke Ijambo ry’Imana” rwaradufashije gusuzuma ukuntu imiryango yacu imeze mu vy’impwemu. Abana barakunda kwiga. Kubera ico, abavyeyi bubaha Imana bararemeshejwe kugira inyigisho ya Bibiliya wo mushinge wo kwubakirako umuryango ukomeye mu vy’impwemu. Baserugo benshi ubu bariko baraganira n’abana babo batoyi kuri ya boroshire nshasha y’umutwe uvuga ngo Urashobora Kuba Umukunzi w’Imana! Ivyo bizobafasha kugiriranira ubucuti buhimbaye kandi butanyiganyiga na Yehova. Bavyeyi, nimwigishe abana banyu ukuntu bokwitwararika inyiyumvo z’Imana. Nimube muserura urukundo mukunda Imana n’ibikorwa vyayo. (Zab. 103:2) Nimukorere hamwe kugira ngo mwishingire kandi mushikire intumbero ngirakamaro zishingiye mu Vyanditswe zijanye n’ukugira uruhara bimwe vyuzuye mu gusukurira Yehova.

³ Ijambo ry’Imana Riramurikira Inzira Yacu: Twarahimbawe kuronka igitabu gishasha c’umutwe uvuga ngo La prophétie d’Isaïe, lumière pour tous les humains I. Ugeze hehe mu gusoma iyo mbumbe ya mbere? Igitabu ca Yesaya kirabura imanza zibabaje zizoshitswa ku mahanga aterekwa Imana hamwe n’ibintu biteye agahimbare Imana izohezagiza abasavyi bayo bijanye n’Ubwami. (Yes. 34:2; 35:10) Kirubaka kandi ukwizera n’ukwizigira Yehova hamwe n’uburyo akora ibintu.—Yes. 12:2-5.

⁴ Mu gihe usoma ico gitabu La prophétie d’Isaïe I, urashobora gutahura imbere y’igihe ukuntu Yesaya yagumanye ukutadohoka kwiwe kuri Yehova kandi yari akikujwe n’ububisha. Igihe yahabwa ubutumire bwo kuba intwarabutumwa y’Imana, yishuye ati: “Ndi hano, ba ari jewe utuma.” (Yes. 6:8) Kuzirikana ku mutima wiwe ukunze bizokuremesha kubandanya kwamamaza inkuru nziza, ugire uruhara bimwe vyuzuye mu gushinga ‘intahe mw’isi yose.’—Mat. 24:14.

⁵ Ukwitwararika kwacu ibikorwa vy’igitangaza vya Yehova bizohayagiza ubukuru bwiwe. Nuko rero, nimukunde cane agateka ko kuba abakora ivy’ijambo ry’Imana!