Kubera iki igiturire kidahera?

AYO majambo aradondora neza ivyaranze kahise k’ubutegetsi bw’abantu. Ubwo butegetsi bwarakwegeye abantu imibabaro n’amarushwa bitovugwa. Uko imyaka yagiye irarengana, hari abantu b’umutima ukunze bagiye baragira utwigoro two gutuma ikibano c’abantu kirushiriza kumera neza mugabo utwo twigoro tukaba impfagusa bivuye ku mwina no ku biturire. Ni kubera iki vyagenze gutyo? Kubera iki igiturire kidahera? Ahanini biva kuri ibi bintu bitatu bitugirako akosho kabi.

1. Akosho kava ku gicumuro.

Bibiliya iravuga idakikiriza yuko abantu “bagabwa n’igicumuro bose.” (Abaroma 3:9) Igicumuro “kiba” muri twebwe, nka kurya nyene kw’indwara idakira umuntu yandura ayikuye ku bavyeyi biwe. Igicumuro kiramaze imyaka ibihumbi ‘kiganza’ abantu. “Itegeko” ry’igicumuro riguma rikorera muri twebwe. Kubera ko abantu ari abanyabicumuro, usanga bashira imbere inyungu zabo bwite canke ugasanga mu buzima bwabo bashira imbere ivyo kwironkera amatungo canke ububasha, ivyo bakabigira ata kwitaho abandi.​—Abaroma 5:21; 7:17, 20, 23, 25.

2. Akosho kava kuri iyi si mbi tubamwo.

Isi tubamwo irangwa n’umwina be n’ubwikunzi. Mw’isi imeze gutyo, abantu bamwebamwe ntibiborohera gukora ibitandukanye n’ivyo abandi bakora. Babitumwe n’agatima k’ubwikunzi, barahahamira ubukuru. Vyongeye, barahahamira amaronko bakipfuza kuronka ibirenze ivyo bakeneye vy’ukuri. Ikibabaje ni uko badatinya gukoresha ubugunge kugira ngo bashike kuri ivyo bintu bipfuza. Aho kunanira utwosho tubi, “[barakurikira] isinzi mu ntumbero mbi.”​—Kuvayo 23:2.

3. Akosho kava kuri Shetani.

Shetani, ca kiremwa c’impwemu cagarariza, “a[ra]zimiza isi yose.” (Ivyahishuwe 12:9) Arahimbarwa no gukoresha abantu uko yishakiye. Abigiranye uruyeri arashobora gufatira ku cipfuzo umuntu wese afise co kubaho yorohewe mu vy’ubutunzi, maze agatuma nya muntu akoresha ubugunge.

None ivyo vyoba bisigura ko turi udukinisho Shetani yikoreshereza uko yigombeye, ku buryo tubwirizwa gukora ico ashaka cose? Ikiganiro gikurikira kirishura ico kibazo.