Ikintu ca 3: Abantu beza bose baja mw’ijuru

Ico kintu cakomotse hehe?

Inyuma y’urupfu rw’intumwa za Yezu, mu ntango y’ikinjana ca kabiri G.C., abakuru ba Ekeleziya bo mu ntango barabaye rurangiranwa. Mu kudondora inyigisho zabo, igitabu kimwe c’inkoranyabumenyi c’abagatolika (New Catholic Encyclopedia) (2003), Imbumbe ya 6, ku rupapuro rwa 687, kivuga giti: “Inyigisho yari imenyerewe na benshi yari iy’uko ngo ubugingo bukimara kuva mu mubiri buca ubwo nyene buronka ubuhirwe bw’ijuru inyuma y’ugutyororwa mu buryo ubwo ari bwo bwose bukenewe umuntu amaze gupfa.”

Bibiliya ibivugako iki?

Igira iti: “Hahiriwe abitonda, kuko bazotorana isi.”​—Matayo 5:5.

Naho Yezu yasezeraniye abigishwa biwe yuko ‘yobateguriye ikibanza’ mw’ijuru, yarerekanye ko atari abagororotsi bose babwirizwa kujayo. (Yohani 3:13; 14:2, 3) None ntiyasenze asaba ko ivyo Imana igomba biba “kw’isi nko mw’ijuru”? (Matayo 6:9, 10) Mu vy’ukuri, hariho ibibanza bibiri abagororotsi bazojamwo. Bakeya bazofadikanya na Kristu gutegeka bari mw’ijuru, ariko benshi bazoba kw’isi ibihe bidahera.​—Ivyahishuwe 5:10.

Uko igihe cagiye kirahaca, Ekeleziya yo mu ntango yarahinduye ukuntu yabona ibijanye n’uruhara yo ubwayo yabwirizwa kurangura kw’isi. None ivyo vyavuyemwo iki? Igitabu kimwe c’inkoranyabumenyi (The New Encyclopædia Britannica) kivuga giti: “Ekeleziya yagiye irarushiriza kwishira mu kibanza c’Ubwami bw’Imana bwari bwitezwe.” Ekeleziya yaciye itangura gukomeza ububasha bwayo mu kwisuka mu vya politike, yirengagiza amajambo atomoye Yezu yavuze, yuko abayoboke biwe “atari ab’isi.” (Yohani 15:19; 17:14-16; 18:36) Kubera akosho Umwami w’abami w’Umuroma Konsitantino yagize, Ekeleziya yaradohotse ku bintu bimwebimwe yemera, kimwe muri vyo kikaba cari kijanye n’ukuntu neza na neza Imana imeze.

Gereranya iyi mirongo yo muri Bibiliya: Zaburi 37:10, 11, 29; Yohani 17:3; 2 Timoteyo 2:11, 12