Woba uvyibuka?

Woba warinovoye ugusoma inomero z’Umunara w’Inderetsi za vuba? Raba nimba ushobora kwishura ibibazo bikurikira:

• Dushobora gute kuvuga neza “ururimi rutyoroye,” ari kwo kuri kwerekeye Imana n’imigambi yayo? (Zef. 3:9)

Nka kurya kw’ururimi ruvugwa, kugira ngo tuvuge neza “ururimi rutyoroye,” turakeneye gutega yompi, kwigana abaruvuga neza, gufata ku mutwe amazina y’ibitabu vya Bibiliya be n’imirongo yayo imwimwe, gusubiramwo ivyo twiga, gusoma n’ijwi rirenga, gusuzuma indimburo ari co citegererezo c’ukuri, gukora turondera gutera imbere, kwishingira ibiringo vyo kwiyigisha be no kwimenyereza “kuvuga” urwo rurimi rutyoroye.​—15/8, urupapuro rwa 21-25.

• Kugira umuntu amenye ukuntu Imana imeze bisaba ko aba azi ibintu bimwebimwe ibihe?

Yehova ni izina ryayo, kandi igomba ko tuyimenyera kuri iryo zina. (Yes. 12:2) Ni “Imana y’urukundo n’amahoro.” (2 Kor. 13:11) Ni “Imana izi vyose” ikongera ikaba Imana y’“agakiza.” (1 Sam. 2:3; Zab. 25:5) Imana izokwiyegereza rero abayizi.​—1/9, urupapuro rwa 4-7.

• Iciyumviro c’“igitsibo c’imigozi itatu” gishobora gute kwerekeza ku mubano?

“Igitsibo c’imigozi itatu” ni imvugo y’ikigereranyo. (Umus. 4:12) Igihe yerekejwe ku mubano, iba ishaka kuvuga umugabo n’umugore, yo migozi ibiri, itsibiye ku mugozi nyamukuru, ni ukuvuga Imana. Igihe umugabo n’umugore bunze ubumwe n’Imana birabaronsa inkomezi zo mu buryo bw’impwemu zibafasha kwihanganira ingorane, gutyo bigatuma mu mubano harangwa agahimbare.​—15/9, urupapuro rwa 16.

• Ivy’“ukurambikwako ibiganza” bivugwa mu Baheburayo 6:2 bishaka kuvuga iki?

Aho gushaka kuvuga ivyo kugena abakurambere bakirisu, birashoboka ko hariko havugwa ivy’ukurambikwako ibiganza mu buryo bwo gutanga ingabirano z’impwemu nyeranda. (Ibik. 8:14-17; 19:6)​—15/9, urupapuro rwa 32.

• Sebibondo mwiza aramenya ko abana biwe bakeneye iki?

Bimwebimwe mu vyo bakeneye ni (1) ugukundwa na ba se (2) akarorero keza, (3) kuba ahantu harangwa agahimbare, (4) kwigishwa ivy’impwemu, (5) gutozwa indero, (6) gukingirwa.​—1/10, urupapuro rwa 18-21.

• Abaja imbere abandi berekana gute ko batera iteka abandi?

Uburyo bumwe umukurambere yobigiramwo ni mu kutigera asaba abandi gukora ibintu we ubwiwe adashima gukora. Aratera iteka abandi kandi mu kubasigurira igituma abasavye ibintu binaka canke abahaye ubuyobozi bunaka.​—15/10, urupapuro rwa 22.

• Ni ibintu nyamukuru ibihe vyotuma abubakanye bazigama indagano y’ukwabirana?

Ni bibiri. (1) Nushire imbere umubano wanyu w’ababiranye. (2) Niwirinde ubwoko bwose bwo guhemuka. Umubano wanyu waba utekaniwe canke urimwo ingorane, uwo mwubakanye arakeneye kumenya ko wiyemeje gutuma uwo mubano uroranirwa; ivyo bintu nyamukuru bibiri bizofasha.​—1/11, urupapuro rwa 18-21.

• Umukurambere mukirisu ashobora kwigira iki ku kuntu umwungere wo muri Isirayeli yakoresha inkoni y’inyobozo?

Umwungere yakoresha inkoni y’inyobozo kugira ngo ayobore ubusho bwiwe. Igihe intama zaba ziriko zirinjira canke zisohoka mu ruhongore, ‘zaca munsi y’iyo nkoni y’inyobozo,’ gutyo agashobora kuziharura. (Lew. 27:32) Umwungere mukirisu na we nyene arakeneye kumenya neza ubusho bw’Imana no kuguma azi neza ingene umwe wese mu babugize amerewe.​—15/11, urupapuro rwa 9.

• Inabibondo ashobora gute kwerekana yuko abona ko isuku rihambaye?

Ibifungurwa birashobora kwandura mu buryo butandukanye, ni co gituma akaraba imbere yuko abikorako kandi akaguma abifundikiye. Aguma asukura inzu kugira ngo yirinde imbeba be n’utundi dukoko. Ibindi bintu ashobora kugira, ni ukuraba ko impuzu ziguma zisukuye no kwama yiyuhagira. Ibintu nk’ivyo birahuye n’ivyo Bibiliya isaba.​—1/12, urupapuro rwa 9-11.