Ubwiza bw’ibiremwa vya Yehova

“Inzūzi ni zikome amashi”

URATEREZA akajisho kw’ikarata y’isi, maze mu mihingo myinshi uzobona imirongorongo irandaranda ica ku butaka. Iyo mirongorongo igenda irashamika, iraca mu biyaya, mu bugaragwa be no ku butaka buriko amashamba cimeza. Iranyuragira mu tubande, mu myonga no mu mashamba (Habakuki 3:9). Iyo mirongorongo tuvuga ni inzuzi, zikaba ari imihora y’isi yacu ituma ubuzima bushoboka. Mwene izo nzuzi ziremeza ubukerebutsi n’ububasha Umuremyi w’isi Yehova afise. Iyo tuzitegereje, twumva tugize inyiyumvo nka zimwe z’umwanditsi wa Zaburi, uwikoze mu gahogo ati: “Inzūzi ni zikome amashi, imisozi n’iririmbishirizwe icarimwe n’umunezero, imbere y’Uhoraho”.—Zaburi 98:8, 9a.

Inzuzi zirafitaniye isano rya hafi na kahise k’abantu. Bibiliya iravuga inzuzi nininini zine zamutse ku ruzi ruturuka muri Edeni (Itanguriro 2:10-14). Rimwe mu masirimuka yo mu ntango ryatanguriye mu tubande tumera tw’Uruzi Tigiri n’Uruzi Efurate mu Buseruko bwo Hagati. Amasirimuka ahambaye yashobotse bivuye ku Ruzi Hwang rwo mu Bushinwa, ku Ruzi Gange n’Uruzi Indus zo muri Aziya yo mu Bumanuko, hamwe no ku Ruzi Nili rwo mu Misiri.

Ntibitangaje rero kuba umuntu yamye nantaryo ajorezwa n’ububasha bw’inzuzi, ubwinshi bwazo hamwe n’ubwiza bwazo. Uruzi Nili rwo mu Misiri rutemba ibilometero hafi 6.670. Uruzi vyibonekeza ko rwagutse kuruta izindi, ni Amazone rwo muri Amerika yo mu Bumanuko. Mu gihe inzuzi zimwezimwe usanga ari nininini biteye akoba, izindi na zo usanga ziteye igomwe cane, nka rwa Ruzi Tone rwo mu Buyapani rutoya kuruta mugabo rukaba rwirasa bwampi mu gutemba.

Ni igiki gituma uruzi rutemba? Muri make, ni za nguvu z’isi zikwegera kuri yo ibiri mu kirere. Izo nguvu ni zo zikwega amazi akava ahakirururutse akamanuka ahateze. Rimwe na rimwe ivyo biratuma haba amasumo y’amazi aturagara. Mu kudondora ivyo bintu vy’ububasha kandi bikomakomeye, Bibiliya ivuga iti: “Uhoraho, inzūzi zishize hejuru, inzūzi zishize hejuru amajwi yazo: inzūzi zishize hejuru kubomborana kwazo”.—Zaburi 93:3.

“Ni nde yaciriye isegenya imigende imanukana”? Ni ko Yehova yabajije wa mugabo Yobu yubaha Imana (Yobu 38:25). None nyene, ayo mazi yose ava hehe? Inyishu tuyisanga mu buhinga buhanitse twokwita inzinguzingu y’amazi. Amazi y’isi aguma azunguruka bitumwe n’inkomezi ziva ku zuba hamwe na za nguvu z’isi zikwegera kuri yo ibiri mu kirere. Amazi amaze gutumuka nk’umwuka, araduga hejuru mu kirere. Mu nyuma uwo mwuka urakanya hanyuma ugacika ibicu vy’imvura. Haciye igihe, wa mwuka uragaruka kw’isi ari urubura canke imvura. Menshi muri ayo mazi arirundaniriza mu mabahari, mu biyaga, mu nzuzi, mu bibarafu bininibinini bimeze nk’ibitandara vyo mu bice bikanye cane vy’amasunwa y’isi, arirundaniriza no mu kuzimu.

Ku biraba iyo nzinguzingu y’igitangaza, Bibiliya ivuga iti: “Inzūzi zose zitembera mu kiyaga, yamar’ikiyaga nticuzura; ahantu inzūzi zija ni ho zama zishishikara [canke, “zigaruka kugira zongere zigende”, NW]” (Umusiguzi 1:7). Yehova we Mana y’ubukerebutsi butagira urugero akaba n’Imana yitwararikana urukundo, ni we wenyene ashoboye gushiraho iyo nzinguzingu ikabandanya idahagarara. None ico kintu kiranga ubuhanga buhambaye kitubwira iki ku kuntu Imana imeze? Ni Imana y’ubukerebutsi buhambaye kandi yitwararikana urukundo.—Zaburi 104:13-15, 24, 25; Imigani 3:19, 20.

Naho inzuzi ari nininini kandi zikaba nyinshi, amazi meza y’isi ari muri zo ni make cane. Ariko rero, ni nkenerwa cane kugira ngo ubuzima bushoboke. “Hamwe umuntu yoba ataronka amazi kandi akaba adafise ububasha kanaka kuri yo, haba mu bintu bitobito canke bihambaye akenera mu buzima bwiwe, ntiyoshobora kubaho. Inkuru z’ukungene umuntu yifata mu gukoresha ayo mazi, zigize umuce munini wa kahise k’isirimuka ry’abantu”. Ivyo bivugwa n’igitabu kimwe citwa Amazi.—Mu congereza.

Haraciye imyaka ibihumbi inzuzi zizimya umuntu inyota zikanamuronsa amazi y’ukuvomera imirima yiwe. Isi ndimwa iri hambavu y’inzuzi nyinshi ni yo yorohereza ibiterwa gukura neza. Raba ukuntu ico ciyumviro giserurwa mu muhezagiro Yehova yahaye abasavyi biwe, mu kuvuga ati: “Ewe kuntu amahema yanyu ari meza, yemwe aba Yakobo, ukuntu imihana yanyu ari myiza, yemwe Abisirayeli! Imeze nk’imishoka y’imyonga ishika kure, nk’imirima igendanye uruzi, nk’imibazibazi itewe n’Uhoraho, nk’ibiti vy’amasederi bimeze i ruhande y’amazi” (Guharūra 24:5, 6). Inzuzi zirafasha kandi mu kubungabunga ibikoko nk’imbata hamwe n’ubu bwoko bw’imbwebwe ubona ngaha. Mu vy’ukuri, uko turushiriza kwiga ivyerekeye inzuzi ni ko turushiriza kwumva tuvyuriwe umutima wo gushimira Yehova.

[Akajambo k’epfo]

[Uruzitiro/Ifoto ku rup. 8]

Isumo rya Iguaçú ryo ku mupaka igihugu ca Arijantine gihana na Berezile, riri mu masumo y’amazi yagutse kuruta ayandi yose. Riraguka gushika aho rirenza ibilometero bitatu uvuye ku nkengera uja ku yindi. Iryo sumo riri mw’ishamba rya manyenye rikiri ritoto, rikaba rigizwe n’amasumo hafi 300 matomato. Kw’isegunda imwimwe yose, amazi angana na metero kibe 10.000 ni yo ahisesa mu kiringo c’imvura.

[Ifoto ku rup. 9]

Uruzi Tone rwo mu Buyapani