Za Mfungurwa za Nyuma zo Ku Mugoroba ni iki?

IMFUNGURWA za Nyuma zo ku Mugoroba ni iki, kandi zifise insobanuro iyihe ku bantu babayeho muri iki kinjana ca 21? Ubajije Umukirisu Imfungurwa za Nyuma zo ku Mugoroba ico ari co, azokubwira yuko ari za mfungurwa Yezu Kirisitu yasangira n’intumwa ziwe ku mugoroba, imbere y’uko urupfu rwiwe rwo kwitangako inkuka rushika. Kubera yuko ari zo mfungurwa za nyuma Yezu yasangiye n’abayoboke biwe b’abizerwa, zikunze kwitwa Imfungurwa za Nyuma zo ku Mugoroba. Kandi kubera yuko zatangujwe n’Umukama Yezu Kirisitu ubwiwe, izina Imfungurwa z’Umukama zo ku Mugoroba rirabereye.

Mu binjana n’ibindi, benshi barahevye ubuzima bwabo ku bintu babona ko bibereye ko bavyihebera. Zimwezimwe muri izo mpfu zaragize ico zimarira abantu bamwebamwe mu kiringo kinaka. Mugabo ubiravye, nta na rumwe muri izo mpfu zo kwitanga, naho rwoba rwarashimagijwe gute, rworuha rwegereza urwa Yezu Kirisitu mu gaciro. Ikigeretseko, muri kahise k’abantu karanzwe n’amatati, nta rupfu na rumwe rwagize ico ruhindura cane nka rwo kw’isi yose. Kubera iki?

Kugira ngo twishure ico kibazo kandi tugufashe kumenya ico za Mfungurwa z’Umukama zo ku Mugoroba zisobanura kuri wewe, turagutumiye ngo usome ikiganiro gikurikira.