IKIBAZO CA 2
Kuki ntashima uko nsa?
WARI GUKORA IKI?
Iyumvire iki kintu: Igihe Julia yiravye mu kiyo, nta kindi abona atari uko avyibushe. Naho abavyeyi n’abagenzi biwe bamubwira ko angana n’ivubi, we yibwira ati: “Ndakeneye guta ibilo.”
Julia aheruka kwiyumvira gufata ingingo ruhasha kugira ate “ibilo bikeyi.” Afise umugambi wo kwiyicisha inzara imisi nk’ingahe . . .
Iyaba wari Julia, wari gukora iki?
BANZA UZIRIKANE!
Ushobora kuba wibona nka kurya kw’umuntu yiravye mu kiyo cerekana umuntu uko atari
Si bibi kwitwararika ukuntu usa. Nkako, Bibiliya iravuga ko abagabo n’abagore bamwebamwe bari beza. Aho harimwo Sara, Rasheli, Abigayili, Yozefu na Dawidi. Bibiliya ivuga ko umugore yitwa Abishagi yari “mwiza bihebuje.”—1 Abami 1:4.
Ariko rero, abakiri bato benshi bararazwa ishinga cane n’ukuntu basa. Ivyo birashobora kubatera ingorane zikomeye. Zirikana kuri ibi bintu:
Mu cigwa kimwe cagizwe, abigeme 58 kw’ijana bavuze ko bavyibushe birenze, mu gihe 17 kw’ijana bonyene ari bo vy’ukuri bari bafise iyo ngorane.
Mu kindi cigwa na ho, abagore 45 kw’ijana bafise ibilo biri munsi y’ivyo bategerezwa kugira basanze biyumvira ko bafise ibilo vy’umurengera!
Abakiri bato bamwebamwe bariyicisha inzara kugira bate ibilo, ivyo bikaba bigeramira amagara yabo.
Nimba ufise iyo ngorane canke iyindi ngorane ijanye no gufungura, nurondere imfashanyo. Niwiture umuvyeyi canke uwundi muntu akuze wizigiye. Bibiliya ivuga iti: “Umugenzi nyakuri akundana igihe cose, kandi ni uwo muvukana yavukiye kuhaseruka mu gihe c’amarushwa.”—Imigani 17:17.
IKINTU CIZA KURUTA IBINDI WORYOHORA!
Mu vy’ukuri, ubwiza bwo ku mutima ni bwo butuma abandi bagushima canke batagushima. Zirikana akarorero ka Abusalomu umuhungu w’Umwami Dawidi. Bibiliya ivuga iti:
“Nta mugabo yari mwiza nka we . . . ku buryo ashemezwa cane ukuraho. . . . Nta gahonzi yari afise.”—2 Samweli 14:25.
Ariko uwo musore yari yuzuye ubwibone, uguhahamira ubukuru n’ubuhemu! Ni co gituma Bibiliya itamuhayagiza, ahubwo ivuga ko yari umuhemu ata co yibanga, akaba n’umwicanyi yuzuye urwanko.
Ku bw’ivyo, Bibiliya iduhanura iti:
“Mwambare wa muntu mushasha.”—Abakolosayi 3:10.
“Ugushaza kwanyu ntikube ukw’inyuma . . . , ahubwo kube wa muntu yihishije wo mu mutima.”—1 Petero 3:3, 4.
Naho atari bibi kwipfuza gusa neza, uribuka ko hariho ikintu gihambaye kuruta uko uboneka, na co akaba ari umutima wawe. Ubiravye neza, ingeso nziza ni zo zituma abandi bagushima kuruta kuba wugaye canke usa neza! Umwigeme yitwa Felicia avuga ati: “Ubwiza burashobora gukanga umuntu, ariko umutima wawe n’ingeso nziza ufise ni vyo canecane abandi bazokwibukirako.”
UKUNTU USA
Woba ushima ukuntu usa?
Woba uriyumvira kwiyambiza canke kwiyicisha inzara kugira umere uko ushaka?
Ni ibiki wohindura ku mubiri wawe iyaba vyashoboka? (Hitamwo ivyo ushaka vyose.)
UBUREBURE
UBUNINI
UMUSHATSI
ITAYE
ISURA
AKABIRI KO MU MASO
Nimba wishuye ego ku bibazo bibiri vya mbere kandi ugahitamwo ibintu bitatu canke birenga ku kibazo kigira gatatu, hari aho abandi boba batakubonamwo ubwo bubi wibonamwo. Biroroshe ko umuntu asanga yarengeje urugero, agahagarikwa umutima cane n’ukuntu asa.—1 Samweli 16:7.