Gukoresha Amayagwa Yatanzwe

BIBILIYA igereranya ishengero rya gikirisu n’umutumba w’umuntu. Urugingo rwose rurakenewe, mugabo “zose [ntizi]gira igikorwa kimwe.” Mu buryo buhuye n’ivyo, dukwiye kurangura agateka ako ari ko kose dutewe. Ivyo bisaba yuko dutahura kandi tukitwararika neza ikigabu ico ari co cose dushinzwe co kuvuga, aho gufatira mu rwara ubuhambare bw’ibiganiro bimwebimwe kubera twiyumvira yuko ibindi biganiro ari vyo vyoba birushirije kuba ibishimishije. (Rom. 12:4-8) Umugwi wa wa mushumba w’umwizerwa kandi w’incabwenge ufise ibanga ryo gutanga ibifungurwa vy’impwemu “ku gihe kibereye.” (Mat. 24:45, NW) Igihe dukoresha ubushobozi bwacu bwite kugira ngo dushikirize insiguro dukurikije amacishabwenge twahawe, tuba twerekanye ko dukenguruka iyo ndinganizo. Ivyo biraterera agacumu k’ubumwe kw’ikora neza ry’ishengero ryose uko ringana.

Ivyo Gushiramwo. Igihe washinzwe ikiganiro mw’ishure, niwiyubare kugira ngo ushikirize ico kiganiro nyene woye gushikiriza ibindi bintu. Kenshi uzosanga hatangwa amayagwa atomoye yo kurabirako. Nimba utabwiwe amayagwa yanditse uzokoresha bwa shimikiro ry’insiguro yawe, ushobora gutororokanya amayagwa uyakuye ahantu wihitiyemwo. Ariko rero, igihe utegura insiguro yawe, uraraba neza yuko ivyo ushikiriza vyose vyubakiwe ku kiganiro catanzwe. Igihe uhitamwo ivyo ushiramwo, bizokenerwa kandi ko utirengangiza kurimbura abakwumviriza abo ari bo.

Nutohoze witonde ayo mayagwa urabirako, usuzume ivyanditswe biri muri yo. Maze nurimbure ukungene woyakoresha mu buryo burushirije kuba kirumara ku neza y’abakwumviriza. Nurobanure ingingo zibiri canke kumbure zitatu muri nya mayagwa yanditse kugira ngo zibe ari zo ukoresha bwa ngingo nkurunkuru mu nsiguro yawe. Muri ubwo buryo nyene, nurobanure mu mayagwa yatanzwe ivyanditswe utegekanya gusoma no gusigura.

Muri ayo mayagwa ukwiye gushikiriza ayangana iki? Ukwiye gushikiriza ayo ushobora gushikiriza neza gusa. Ntiwonone ukwigisha neza ngo urundemwo amakuru menshi. Nimba amwamwe mu mayagwa yawe adahuye n’ihangiro ry’insiguro yawe, niwitunire ku bihimba bizogufasha gushika kuri iryo hangiro. Muri ayo mayagwa yatanzwe, nukoreshe ibizoba birushiriza kugira ico vyigishije abakwumviriza. Intumbero woba ufise kuri iri nuta ry’uguhanurirwako mu vy’ukuvuga, si iyo kubona ivyo ushobora gushikiriza uko bingana, ahubwo ni iyo gukoresha ivyatanzwe ngo bikubere ishimikiro ry’insiguro yawe.

Insiguro yawe ntigenewe kuba gusa incamake y’amayagwa yatanzwe. Ukwiye gutegekanya gusigura ingingo zimwezimwe, ukazitebako, ukazitangira ibigereranirizo, kumbure ukanatanga akarorero k’ukuntu zokurikizwa. Ibindi vyiyumviro vy’inyongera bikwiye gukoreshwa kugira ngo uce irya n’ino ingingo zihambaye zo mu mayagwa wahawe aho kugira ngo bisubirire ayo mayagwa.

Abavukanyi bakwije ibisabwa vyo kuba abigisha amaherezo bashobora kuzosabwa gushikiriza inyigisho kw’Ikoraniro ry’Umurimo. Baratahura ko bakeneye gukoresha neza amayagwa yatanzwe ha kuyasubiriza ikindi kintu. Mu buryo nk’ubwo nyene, abavukanyi bashikiriza insiguro z’icese barahabwa incacagu zo kwisunga. Izo ncacagu zirareka umuntu agahuza n’ukuntu ibintu vyifashe, mugabo zikaba zerekana neza ingingo nkurunkuru zo guca irya n’ino, ivyiyumviro vyo gukoresha bizishigikira, be n’ivyanditswe bitanga umushinge wo kwubakirako nya nsiguro. Kwiga kwigisha ukoresheje amayagwa yatanzwe bwa shimikiro, ni igihimba gihambaye mu vyo kwitegurira utundi duteka tw’ivyo gushikiriza insiguro.

Iryo menyerezwa rirashobora no kugufasha kurongora inyigisho za Bibiliya zo ku muhana zitera imbere. Uzomenya gushimika ku mayagwa y’inyigisho ha gutitura ikiganiro mu gushimika ku bindi bintu bishobora kuba bishimishije mugabo bidakenewe kugira ngo ico kiganiro gitahurike. Yamara niwatahura neza iki cigwa, ntuzokwumira birenze urugero kuri ayo mayagwa ku buryo unanirwa gutanga izindi nsobanuro umutohoji ashobora kuba akeneye.