Inyishu wosuzuma

ABANTU benshi bamaze kwihweza ibimenyamenya, bashika ku ciyumviro c’uko ubuzima bwashizweho n’uwufise ubwenge burengeye ubw’abantu. Raba nk’akarorero ivyerekeye umwigisha wa filozofiya yitwa Antony Flew yahoze ari umuhakanamana akomeye. Igihe yamenya ukuntu ibifise ubuzima bikozwe mu buryo buhanitse rwose, akamenya n’ivyerekeye amategeko agenga ibiri mu kirere, yarahinduye ivyiyumviro. Yarasubiyemwo amajambo yavuzwe n’abafilozofe ba kera, ati: “Dutegerezwa gushira aho ibimenyamenya bishize.” Uwo mwigisha Flew yabona ko ibimenyamenya vyerekana yuko hariho Umuremyi.

Gerard, umwe twavuga muri uru rukurikirane rw’ibiganiro, na we nyene yashitse kuri ico ciyumviro. Naho yize amashure menshi akaba n’umuhinga mu bijanye n’udukoko tuguruka, yavuze ati: “Nta kimenyamenya na kimwe nabonye cemeza ko ubuzima bwapfuye kwiyadukiza buvuye ku bintu bidafise ubuzima. Ndavye ukuntu ibifise ubuzima bikozwe mu buryo buhanitse kandi burimwo urutonde, narajijutse yuko hategerezwa kuba hariho Umuremyi yabiteguye akongera akabitunganya.”

Nk’uko nyene umuntu ashobora kumenya ivyerekeye umuhinguzi w’utugenegene mu kwihweza utugenegene yahinguye, ni ko na Gerard yahavuye amenya ingene Umuremyi ameze mu kwihweza ibintu yaremye. Gerard yarafashe n’umwanya wo gusuzuma igitabu cahumetswe n’Umuremyi, ari co Bibiliya. (2 Timoteyo 3:16) Bibiliya yaramufashije kuronka inyishu zimushika ku nyota z’ibibazo yibaza ku bijanye na kahise k’abantu, iramufasha no kubona umuti w’ingorane zihanze abantu muri iki gihe. Ivyo vyatumye ajijuka yuko Bibiliya na yo nyene yakomotse ku wufise ubwenge burengeye ubw’umuntu.

Nk’uko na Gerard yavyiboneye, inyishu Bibiliya itanga ni ngirakamaro. Tukuremesheje kuzisuzumira.