Akayabu ko mu bugaragwa k’imbonekarimwe

[Ifoto ku rup. 10] — Akayabu ko mu bugaragwa gatwara inda amezi abiri, kakavyara ubuyabu nka butatu

NI MU masaha yitereye y’ijoro, akaba ari mu bugaragwa. Akayabu ko mu bugaragwa ng’ako karasokorotse kavuye aho kaba maze kagahagarara. Kareraguza kakongera kakabanga amatwi. Hanyuma karamera nk’akabunda, kagaca gatangura kugendagenda gasoboka muri ako karere kuzuye umusenyi.

Nya kayabu karatarukira bukwi na bukwi ku mbeba yasamaye. Inyuma y’ivyo, karabandanya uruhigi iryo joro ryose, kakaza karacishamwo gasimba mu kirere kugira ngo gacakire utundi dukoko. Gacakiye ivyo kadashobora kurya ngo kamare, ibisigaye gaca kabipfukisha umusenyi. Mu gitondo ca kare, gaca gasubira iyo kaba kandi ni gake usanga kanyeguruka ku murango. Raba ibintu bimwebimwe bidasanzwe biranga ako kayabu k’imbonekarimwe.

Ubushobozi budasanzwe bwo kwumva bw’ako kayabu butuma kamenya ahari ikintu kocakira, niyo coba kiri mu kuzimu
Kugira ngo akagabo karondere akagore, karakuga n’ijwi ryo hejuru. Ubushobozi bwo kwumva akagore gafise, butuma kumva ijwi ry’ako kagabo naho koba kari kure cane
Ubwoya bwuzuye ku majanja y’ako kayabu buratuma kadacokera mu musenyi bukongera bugakingira ayo majanja yako ubushuhe n’ubukanye birenze
Mu matwi yako, huzuyeyo ubwoya bwera bugakingira imisenyi itumurwa n’umuyaga
Biragoye gukurikirana ako kayabu kubera ko amajanja yako yuzuyeko ubwoya butuma bitoroha kubona amakanda y’aho kaciye
Akayabu ko mu bugaragwa karashobora kubaho katanywa amazi, kagatungwa n’ayo gakura mu co kacakiye
Umusenyi wo mu bugaragwa bwitwa Karakoum urashobora gushuha gushika kuri dogere 80. Ibindi bihe, harashobora gukanya gushika kuri dogere 25 munsi y’ubusa