IKETE RYA KABIRI RYA PETERO

1 Jewe Simoni Petero, umushumba wa Yezu Kristu nkaba n’intumwa yiwe, ndabandikiye mwebwe abaronse ukwizera kw’agaciro nk’ukwo twaronse* biciye ku bugororotsi bw’Imana yacu n’ubw’Umukiza wacu Yezu Kristu.

2 Imana irushirize kubagirira ubuntu buhebuje* no kubaha amahoro biciye ku kumenya neza+ Imana na Yezu Umukama wacu. 3 Kuko ububasha bw’Imana bwaduhaye* ibintu vyose bidufasha kubaho no kuyihebera, ivyo tukaba tubikesha ukumenya neza iyo Mana yaduhamagaye+ biciye ku buninahazwa bwayo n’ukumera neza kwayo. 4 Biciye kuri ivyo bintu, yaraduhaye* ya mihango y’agaciro kandi ihambaye cane+, kugira ngo biciye kuri iyo mihango mugire akameremere nk’ak’Imana+. Yayiduhaye kubera ko twahevye ingeso mbi zo muri iyi si ziterwa n’ivyipfuzo bibi*.

5 Ku bw’iyo mvo rero, nimukore uko mushoboye kwose+ kugira ngo ukwizera kwanyu mukwongereko ingeso nziza+, ingeso nziza muzongereko ubumenyi+, 6 ubumenyi mubwongereko ukwigumya, ukwigumya+ mukwongereko ukwihangana, ukwihangana mukwongereko ukwihebera Imana+, 7 ukwihebera Imana mukwongereko ukwiyumvamwo abavukanyi, ukwiyumvamwo abavukanyi mukwongereko urukundo+. 8 Kuko nimba ivyo bintu mubifise kandi bikaba bigwiriye muri mwebwe, bizobabuza kuba abantu badakora canke ata co bama*+ mu bijanye no gukoresha ubumenyi butagira amakosa bwerekeye Umukama wacu Yezu Kristu.

9 Iyo umuntu adafise ivyo bintu, aba ari impumyi, akaba ahumiriza ngo ntabone umuco*+, kandi aba yibagiye ko yahumanuwe ibicumuro+ vyiwe vya kera. 10 Ku bw’ivyo rero bavukanyi, murushirize gukora uko mushoboye kwose ngo mugume muri abizigirwa kugira ntimuve mu bahamagawe+ kandi batowe n’Imana, kuko nimwaguma mukora ivyo bintu mutazogenda muguye+. 11 Aho ni ho muzohabwa umuhezagiro wo kwinjira* mu Bwami+ budahera bw’Umukama wacu akaba n’Umukiza Yezu Kristu+.

12 Ni co gituma nama niteguriye kubibutsa ivyo bintu, naho mubizi mukaba kandi mushinze imizi rwose mu kuri kuri muri mwebwe. 13 Mugabo mbona ko bibereye ko ndabakabura mu kubibutsa+ magingo nkiri muri iri hema*+, 14 kubera nzi yuko vuba ihema ryanje rigiye kuvaho, nk’uko n’Umukama wacu Yezu Kristu yabintomoreye+. 15 Nzokwama nkora uko nshoboye kwose kugira ngo ninamara kugenda, muze mushobore kwiyibutsa* ivyo bintu.

16 Igihe twabamenyesha ububasha bw’Umukama wacu Yezu Kristu n’igihe c’ukugaruka* kwiwe, ntitwisunze inkuru z’ikinyoma zaremaremwe ku buhinga, kuko twiboneye ugukayangana kwiwe+. 17 Imana ari yo Data yaramuhaye iteka n’ubuninahazwa, igihe Imana yo soko ry’ubuninahazwa bw’agatangaza yamubwira aya majambo ngo: «Uyu ni Umwana wanje nkunda cane, uwo jewe nashimye+.» 18 Emwe, ayo majambo twarayumvise ava mw’ijuru igihe twari kumwe na we kuri wa musozi mweranda.

19 Ni co gituma turushiriza kwemera amajambo y’abahanuzi. Muriko mugira neza kwitwararika ayo majambo ameze nk’itara+ rikayanganira ahantu h’umwiza, ni ukuvuga mu mitima yanyu. Mubandanye kubigira gushika umusi utamanzuye n’inyenyeri y’umutwenzi+ iserutse. 20 Ica mbere coco, murazi yuko ata buhanuzi bwo mu Vyanditswe buva ku vyiyumviro* vy’umuntu ku giti ciwe. 21 Kuko ata buhanuzi bwigeze buvugwa bivuye ku vyo umuntu agomba+, ahubwo abantu bavuga ivyava ku Mana barongowe* n’impwemu nyeranda+.

2 Ariko rero harabayeho n’abahanuzi b’ikinyoma mw’ihanga ry’Imana, nk’uko no muri mwebwe hazobaho abigisha b’ikinyoma+. Bazorema mu mpisho utugwi dusambura ukwizera, bihakane na shebuja yabaguze+, bikwegere gutikizwa ningoga. 2 Vyongeye, benshi bazokwigana inyifato yabo iteye isoni kandi y’akagagazo*+, kandi inzira y’ukuri izotukwa kubera bo+. 3 N’ikindi kandi, bazokoresha amajambo y’uruhendo, babarye imitsi babigiranye umwina. Mugabo urubanza baciriwe kuva kera+ ntiruriko rurikwega, n’ugutikizwa kwabo ntigusinziriye+.

4 Vy’ukuri Imana ntiyaretse guhana ba bamarayika bacumuye+. Ahubwo yabatereye muri Tarutaro*+, ibashira mu minyororo* y’umwiza w’umuzitanya ngo bagumeyo gushika igihe c’ugushitswako urubanza+. 5 Ntiyaretse no guhana isi ya kera+, mugabo yarazigamye Nowa, umwe yamamaza ubugororotsi+, imuzigamira hamwe n’abandi indwi+ igihe yazana umwuzure kw’isi y’abantu batubaha Imana+. 6 Kandi igihe Imana yatikiza ca gisagara ca Sodomu n’ica Gomora ikabihindura iminyota, yarabiciriye urubanza+, iba ihaye abantu batayubaha akarorero k’ibizoza+. 7 Yararokoye na wa mugororotsi Loti+ yatuntuzwa cane n’inyifato iteye isoni kandi y’akagagazo* y’abagarariji. 8 Uko bukeye uko bwije, uwo muntu w’umugororotsi yamana akababaro mu mutima wiwe ugororotse, kubera ibikorwa vy’ubugarariji yabona kandi yumva igihe yabana na bo. 9 Yehova* arazi rero kurokora mu kigeragezo abantu bamwihebera+, mugabo abatagororotse akababika ngo bazotikizwe* ku musi w’urubanza+, 10 na canecane abarondera guhumanya imibiri y’abandi+, bagakengera n’ubukuru*+.

Barubahuka kandi ni intagondwa. Ntibatinya no gutuka abo Imana yateye iteka*. 11 Ariko abamarayika bobo, naho babarusha inkomezi n’ububasha, ntibabagiriza bakoresheje amajambo y’ibitutsi, kubera ko bubaha Yehova*+. 12 Mugabo abo bantu bavuga nabi ivyo batazi, bakaba bameze nk’ibikoko bitagira ubwenge bigenza itima vyavukiye gufatwa no kwicwa+. Bazoshikirwa n’agatikizo bakwegewe n’ingendo yabo ijana ku gatikizo, 13 baronke impembo yo kumererwa nabi kubera ubukozi bw’ikibi bwabo.

Bahimbarwa no kubaho biryohera+, n’igihe aba ari ku murango. Abo bantu ni ibirabagu n’utunenge kw’ishengero, abantu baryohererwa* inyigisho zabo z’uruhendo igihe baba bariko basangira namwe inzimano+. 14 Amaso yabo yuzuye ukurenga ibigo+ kandi ntashobora kuvavanura n’igicumuro. Bararyosharyosha abadashikamye*. Bafise umutima wamenyerejwe kugira umwina. Ni abana bavumwe. 15 Barataye inzira igororotse, barazimira. Bakurikiye inzira ya Balamu+ mwene Beyori, umwe yakunze impembo y’ubukozi bw’ikibi+, 16 mugabo agakosorwa kubera yarenze ku bigororotse+. Igitungwa c’igitwazi kitavuga caravuze n’ijwi ry’umuntu, kirabuza nya muhanuzi gukora ivy’ubusazi+.

17 Abo ni amasoko atagira amazi, bakaba n’ibipfungu bitwarwa n’igihuhusi gikaze. Babikiwe umwiza w’umuzitanya kuruta iyindi yose+. 18 Bavuga amajambo yo kwihambaza ata co amaze. Barafatira ku vyipfuzo vy’umubiri+, bagakora n’ibintu vyerekana inyifato iteye isoni kandi y’akagagazo*, kugira baryosharyoshe abakiva mu vyara vy’abantu babayeho mu buryo butabereye+. 19 Naho babasezeranira umwidegemvyo, bo ubwabo ni abaja b’ukubora+. Nakare umuntu aba umuja w’uwumurushije* ububasha+. 20 Mu vy’ukuri, nimba bamaze kuva mu buhumane bw’isi+ kubera bamenye neza Umukama Yezu Kristu akaba n’Umukiza wacu, hanyuma bagasubira kwisuka muri ivyo bintu nyene kandi bikabarusha inguvu, iherezo ryabo riba ribaye ribi gusumba uko ivyabo vyari mu ntango+. 21 Vyari kubabera vyiza kutamenya neza inzira y’ubugororotsi, hako bayimenya hanyuma bagaha umugongo amabwirizwa meranda bahawe+. 22 Ivyababayeko ni bimwe bivugwa muri wa mugani w’ukuri uvuga ngo: «Imbwa igarutse kurya ivyo yadashwe, n’ingurube yuhagiwe igarutse kwivurunga mu rwondo+.»

3 Bakundwa, iri rero ni ikete rigira kabiri ndabandikiye. Cokimwe no mw’ikete ryanje rya mbere, ndiko ndakabura ubushobozi bwanyu bwo kwiyumvira neza mu kubibutsa+. 2 Ndabigize kugira mwibuke amajambo yavuzwe kera* n’abahanuzi beranda, na ya mabwirizwa y’Umukama wacu akaba n’Umukiza yashikirijwe biciye ku ntumwa zanyu. 3 Ubwa mbere, mumenye yuko mu misi ya nyuma hazoza abacokoranyi* bacokorana, bagenda bisunga ivyipfuzo vyabo bwite+, 4 bavuga ngo: «Yasezeranye ngo azogaruka, none ari hehe+? Erega, kuva umusi ba sogokuruza bacu basinzira mu rupfu, ibintu vyose biguma kwa kundi nyene vyari kuva mu ntango y’irema+.»

5 Bariyobagiza n’ibigirankana yuko kera hariho ijuru n’isi yumutse ihagaze hejuru y’amazi no hagati mu mazi, biciye kw’ijambo ry’Imana+. 6 Bariyobagiza kandi yuko biciye kuri ivyo bintu, isi y’ico gihe yatikijwe igihe yarengerwa n’amazi y’umwuzure+. 7 Mugabo biciye kuri iryo jambo nyene, ijuru n’isi vy’ubu bibikiwe umuriro, kandi birindirijwe umusi w’urubanza n’ugutikizwa kw’abantu batubaha Imana+.

8 Ariko bakundwa, ntimuyoberwe yuko kuri Yehova* umusi umwe ari nk’imyaka 1.000, n’imyaka 1.000 nk’umusi umwe+. 9 Yehova* ntatevye gushitsa ivyo yasezeranye+ nk’uko bamwe bavyiyumvira, ahubwo yihanganiye mwebwe kuko adashaka yuko hagira n’umwe ahona, ahubwo ashaka ko bose baronka akaryo ko kwigaya+. 10 Yamara umusi wa Yehova*+ uzoza nk’igisuma+. Kuri uwo musi ijuru rizovaho+ mu kwasana gukomeye*, ibintu vy’ishimikiro bishonge kubera ugushuha gukaze, n’isi n’ibikorwa biri muri yo bishirwe ahabona+.

11 Ko ivyo bintu vyose bibwirizwa gushonga gutyo, nimwiyumvire uko mukwiye kumera. Mukwiye kuba abantu b’ingeso nyeranda kandi bakora ibikorwa vyerekana ko bihebera Imana, 12 murindiriye kandi mwamiza mu bwenge* ukuza* kw’umusi wa Yehova*+. Uwo musi uzotuma ijuru ritikizwa+ n’umuriro, n’ibintu vy’ishimikiro biyage kubera ugushuha gukaze. 13 Mugabo nk’uko yabisezeranye, turindiriye ijuru rishasha n’isi nshasha+, kandi aho ni ho hazoba ubugororotsi+.

14 Ku bw’ivyo bakundwa, ko murindiriye ivyo bintu, mukore uko mushoboye kwose ngo impera n’imperuka aze abasange mutagira agatosi, mutagira akanenge, kandi muri mu mahoro+. 15 Vyongeye, nimubone ko ukwihangana kw’Umukama wacu ari ubukiriro, nk’uko n’umuvukanyi wacu dukunda cane Pawulo yabibandikiye yisunze ubukerebutsi yahawe+. 16 Ivyo bintu arabivuga mu makete yiwe yose. Ariko ayo makete arimwo ibintu bimwebimwe bigoye gutegera. Abantu ata co bazi* kandi badashikamye barabigoramika nk’uko bagoramika n’ibindi vyanditswe, bakikwegera agatikizo.

17 Mwebwe rero bakundwa, ko ivyo musanzwe mubizi, mwiyubare ntimutwarwe ngo muja⁠ne na bo mu buzimire bw’abantu b’abagarariji, bigatuma mutaba mugishikamye*+. 18 Ahubwo mwigenze mu buryo butuma murushiriza kugirirwa ubuntu buhebuje* no kuronka ubumenyi bwerekeye Umukama wacu akaba n’Umukiza Yezu Kristu. Naninahazwe ubu no gushika ibihe bidahera. Amen.