A wudzrunguli bya Solomoni byi kombisa leswi nga ha humelelaka mugandzreli mun’wana ni mun’wana wa Yehovha. A nga ha hamba xidoho lexikulu, ntsrhaku a tibyela leswaku “e ti kuma na wele xidohweni” kumbe a ku “e ti kuma na swi yentxekile”. Kambe, loko a yanakanyisisa ha hombe hi leswi swi yentxekiki a nga ha gungula leswaku a teke swiboho swa kukazri leswi nga liki swa wutlhazri leswi mu yentxiki a doha. Ku nga ha va swiboho swa ku fana ni ku hamba wunghanu ni vhanu lava nga liki vanene, ku hungata hi mintxhumu leyi bihiki kumbe ku ya mimbangwini leyi nga liki yinene, ku nga ha va hi ku kongoma kumbe hi ku tizrisa interneti. Swi nga yentxeka a va a yima ni ku khongota, ku dondzra Bibele, ku ya mintlhanganwini kumbe ku ya nsin’wini. Ku fana ni djaha ledzri ku khaneliwaka ha dzrone ka Amaproverbia, xidoho lexi a xi yentxiki swi nga yentxeka xi nga vanga swa kola ni kola. Hi dondzra yini? A hi fanelanga ku fambela kule ni xidoho ntsena kambe hi fanela ku fambela kule ni le ka leswi nga hi yentxaka hi doha.—Mat. 5:29, 30. Xihondzro Xa Ku Zrindzra 07/2024 pp. 16-17 §§ 10-11

Kambe he byini wukosi lebyo? I ntizro wa ku zrezra lowu huluxaka wutomi bya vhanu ni ku khanela hi Mfumu wa Xikwembu Nkulukumba. (2 Kor. 4:1) Nakone i yini swibya swa vumba? I malandzra ya Xikwembu Nkulukumba lama zrezraka madzrungula lamanene. A minkameni ya Pawulo a vaxavisi a va tizrisa tihotsro ta vumba akuva va beka mintxhumu ya lisima ya ku fana ni swakuda, vhinyu ni mali. Hi ndlela leyi fanaka, hine hi swibya swa vumba leswi Yehovha a swi tizrisaka akuva hi teka madzrungula lamanene hi ma yisa ka vhanu vambeni. Hi mpfunu wa Yehovha, hi ni ntamu lowu hi wu vilelaka akuva hi zrezra hi ku dumbeka. Minkama yin’wana hi nga ha txhava vhanu kumbe hi txhava kuva hi nga yamukeliwi. Xana i yini lexi nga hi pfunaka ku lwisana ni xikazratu lexo? Vona xikhongoto lexi vapostola va xi hambiki loko va tsimbisiwa ku tama va zrezra, a matsrhan’wini ya kuva va hela ntamu, vone va kombele Yehovha leswaku a va pfuna va ya mahlweni va zrezra na va nga txhavi ntxhumu. Nakone Yehovha hi ku kahlula a hlamule xikhongoto xavu. (Mint. 4:18, 29, 31) Loko ku txhava vhanu ku ku yentxa u hlatiyela nsin’wini, kombela Yehovha a ku pfuna akuva lizrandzru ledzri u nga na dzrone hi vhanu dzri va dzrikulu ku tlula ku txhava loku u nga na kone. Xihondzro Xa Ku Zrindzra 04/2024 pp. 16-17 §§ 8-9

Lizrandzru dzrezru ha Yehovha dzri hi susumetela ku xwengisa vito dzrake. Leswo swi tlhamuxela leswaku hi djula ku byela van’wana leswaku mintxhumu ya ku biha leyi Sathana a yi hlayiki mayelanu na Yehovha a hi ntiyiso. (Gen. 3:1-5; Yb. 2:4; Yoh. 8:44) Loko hi li nsin’wini, nkongometo wezru i ku byela vhanu hinkwavu leswaku Yehovha i mani ni leswaku i mhunu wa matsrhamela muni. Hi djula va swi tiva leswaku a tsrhamela ledzrikulu dzra Yehovha i lizrandzru, ndlela leyi a fumaka ha yone i yinene ni leswaku ku nga li khale a Mfumu wake wu ta susa ku xaniseka misaveni wu yentxa leswaku vhanu va zrula ni ku nyonxa. (Amaps. 37:10, 11, 29; 1 Yoh. 4:8) Loko hi byela vhanu mintxhumu leyi mayelanu na Yehovha, hi xwengisa vito dzrake. Hi tlhela hi nyonxa hi ku tiva leswaku hi yentxa leswi hi swi kotaka akuva hi hanya hi ku pfumelelana ni vito ledzri hi nyikiwiki dzrone, Timboni ta Yehovha. Xihondzro Xa Ku Zrindzra 05/2024 p. 18 § 12