Kuvurik

22 “Anch waman ngomb ap mukoku wa mwanamakwey washadikang kal, kangal wasal mud umumenap. Ufanyidin kamu kumutwal kud mwanamakwey. 2 Pakwez anch mwanamakwey ushich kulemp niyeyey ap umwijap, ufanyidin kuya ni nnam winou kol kwey ni ukushakam kwinakwa kushik ni pakumukimbinau kud mwanamakwey. Chad ukumwinkishay. 3 Mwawiy kand ukusala anch waman chimbur wend, masun mend ap chom chin chawonsu chikushadishay mwanamakwey. Kangal wasal mud uchimenap.

4 “Anch waman chimbur ap ngomb wa mwanamakwey wawang kal mwi njil, kangal wasal mud umumenap. Ufanyidin kamu kumulangwishin mwanamakwey nnam winou.

5 “Mband kafanyidinap kudjal masun ma muntu ikuny, ikuny niyend kafanyidinap kudjal masun ma muntu mband. Mulong muntu mwawonsu ukusala mwamu, utakanen kud Yehova Nzamb wen.

6 “Anch watan mwi njil chinswal cha kajil chikweta an ap may, chikala ku mutond ap pansh, ni makwau wayilangelang kal an ap ufutamedin may, ufanyidinap kumusend makwau pamwing ni anend. 7 Mulika makwau achina, pakwez ukutwish kwey kusend an. Sal mwamu chakwel yom yenda nawamp kud ey ni ushakam machuku mavud.

8 “Anch watung chikumbu, ufanyidin kand kunyimburish karubumbu kiswimp piur pa chikumbu chey, chakwel anch muntu wapalik ku chikumbu chey, mash mend kangal mikala pa dijuku dey.

9 “Ufanyidinap kukun milad yaad ya mbut mu chir chey cha nviny. Chamwamu, mbut jawonsu ukwangula pamwing ni mabuj ma nviny, akuyitambul ni yikwikal ya ndond yitumbila.

10 “Ufanyidinap kumudimish ngomb pamwing ni chimbur.

11 “Ufanyidinap kudjal masun masadinau nich ndand wa kubombakesh nich leng.

12 “Ufanyidin kuzezetish moj ku jins jinying ja masun udjita.

13 “Anch ikuny wat mband ni walalijan nend, pakwez washiken kumukis, 14 ni wamufund anch ukwet yisal yiyimp ni kuyipish winsidiw wend kusutin kulond anch: ‘Namwatin mband ou, pakwez panalalijanang nend, namanangap chom chimekeshina anch wad kand kal ijik ikuny.’ 15 Tatukwend ni makwend a mband winou afanyidin kupan uman umekeshina anch wad kand kal ijik ikuny kud amakurump, ku chis cha musumb. 16 Tatukwend a mband winou ufanyidin kuyilej amakurump anch: ‘Namwatisha mwanam kud ikuny ou, pakwez umukisin 17 ni umufundin anch ukwet yisal yiyimp kusutin kulond anch: “Nimenap chom chimekeshina anch mwaney wad kand kal ijik ikuny.” Pakwez ou wawiy uman umekeshina anch mwanam wad kand kal ijik ikuny.’ Kupwa afanyidin kutanguril disun kurutu kwa amakurump a musumb. 18 Amakurump a mu musumb akumusend ikuny winou, amukand. 19 Akumwinkish chibau cha ashekel* chitot (100) a utad wa arjang, ni nfalang jinej akujipan kud tatukwend a mband winou, mulong ikuny winou wamudimbenang changadim wa mu Isarel wada kand kal ijik ikuny, ni ukudandamen kwikal mukajend. Ukudandamen kushakam nend djat kamu pakufilay, kakezap kamulik.

20 “Pakwez anch uyingin nich, ni kwikil chom chimekeshina anch mband winou wad kand kal ijik ikuny, 21 chifanyidin kumutwal mband winou ku chis cha chikumbu cha tatukwend, chad antu a mu musumb afanyidin kumwas mayal chakwel afa, mulong wasalang chom chikwatishena usany mu Isarel kusutin kusal windumb* mu chikumbu cha tatukwend. Mwamu ukudoshany uyimp pakach pen.

22 “Anch amushindakesh ikuny ukat kulal ni mband wayen, chifanyidin kuyijip awonsu aad, ikuny pamwing ni mband win. Mwamu ukudoshany uyimp mu Isarel.

23 “Anch mband wakad kwijik ikuny amutond, chad ikuny mukwau wa mu musumb wasankanijan nend ni walal nend, 24 ufanyidinany kuyitwal awonsu aad ku chis cha musumb ni kuyas mayal chakwel afa, mband mulong katoyangap mu musumb, ikuny mulong wamukwatish kal mband wa mukwau usany. Mwamu ukudoshany uyimp pakach pen.

25 “Pakwez anch wamutanang mband winou mu masuk ni wamulal ku usu, ikuny ndiy ufanyidina kufa, 26 pakwez mband ufanyidinanyap kumusal chom ap chimwing. Kasalangap chitil chitina kumujip. Chikwikal kand mwamu anch muntu wamurishikish mwanamakwend ni wamujip. 27 Mulong wamutanang mband winou mu masuku, watoyang pakwez kwadap muntu mwin kumukamunin.

28 “Anch ikuny wamutan mband mujich wakad kwijik ikuny, wamukwat ni walal nend ku usu, chad ayitanikesh, 29 ikuny winou ufanyidin kumwinkish tatukwend a mband ashekel makum matan (50) a utad wa arjang, ni ukwikal mukajend. Mulong wamukwatishang usany, ukudandamen kushakam nend djat kamu pakufilay, kakezap kamulik.

30 “Kwikil muntu ufanyidina kumwat mband a tatukwend, chamwamu ukumukwatish tatukwend usany.