Kuchind

33 Ou wawiy mutapu wendau In Isarel mu weny wau padokalau mwi ngand ya Idjibit kukwatijan ni yisak yau* mwinshin mwa umutakel wa Moses ni Aron. 2 Kukwatijan ni mbil ya Yehova, Moses wafundang ndond jatumbukangau kukwatijan ni mutapu wendangau mu weny wau; ni ou wawiy mutapu wendau kudokal ndond yimwing kushik yikwau: 3 Pa dichuku da dikum ni katan (15) da ngond wa kusambish, In Isarel adokala ku Ramises. Dichuku dambakenap kamu kupwa kwa Pasak, abudika pakad wom* kurutu kwa In Idjibit awonsu. 4 Pa chisu chinicha, In Idjibit ading akat kuyijik an a kusambish awonsu ajipau kud Yehova pakach pau, mulong Yehova wayipupa anzamb au.

5 Chawiy In Isarel adokala ku Ramises ni atekina chibeng ku Sukot. 6 Kupwa adokala ku Sukot ni atekina chibeng ku Etam, uda kuns kwa mpay. 7 Padokalau ku Etam afumbamu aya ku mutambu wa Pihahirot, uda pantaliken ni Baal-zefon, ni atekina chibeng kurutu kwa Migidol. 8 Kupwa adokala ku Pihahirot ni asutina mu karung atadish mwi mpay; ni asala weny wa machuku masatu mwi mpay ya Etam, kupwa atekina chibeng ku Mara.

9 Kupwa adokala ku Mara ni ashika ku Elim. Chad mutapu ku Elim kwading misul ya mem dikum ni yaad (12) ni mabu makum sambwad (70), atekina chibeng kwinakwa. 10 Adokala ku Elim atekin chibeng ku Karung Musunz. 11 Padokalau ku Karung Musunz atekina chibeng mwi mpay ya Sin. 12 Kupwa adokala mwi mpay ya Sin ni atekina chibeng ku Dofka. 13 Mu kusut kwa chisu adokala ku Dofka ni atekina chibeng ku Alush. 14 Kupwa adokala ku Alush ni atekina chibeng ku Refidim, kwinikwa kwadingap mem ma kuna antu. 15 Padokalau ku Refidim atekina chibeng mwi mpay ya Sinay.

16 Adokala mwi mpay ya Sinay ni atekina chibeng ku Kibirot-hatahava. 17 Kupwa adokala ku Kibirot-hatahava ni atekina chibeng ku Hazerot. 18 Padokalau ku Hazerot atekina chibeng ku Ritima. 19 Kupwa adokala ku Ritima ni atekina chibeng ku Rimon-perez. 20 Kupwa adokal ku Rimon-perez atekin chibeng ku Libna. 21 Adokala ku Libna atekin chibeng ku Risa. 22 Padokalau ku Risa atekina chibeng ku Kehelata. 23 Kupwa adokala ku Kehelata ni atekina chibeng ku Mukandu wa Shefer.

24 Padokalau ku Mukandu wa Shefer atekina chibeng ku Harada. 25 Adokala ku Harada atekin chibeng ku Makelot. 26 Kupwa adokala ku Makelot ni atekina chibeng ku Tahat. 27 Padokalau ku Tahat atekina chibeng ku Tera. 28 Kupwa adokala ku Tera ni atekina chibeng ku Mikita. 29 Mu kusut kwa chisu adokala ku Mikita ni atekina chibeng ku Hashimona. 30 Padokalau ku Hashimona atekina chibeng ku Mosera. 31 Kupwa adokala ku Mosera ni atekina chibeng ku Bene-jakan. 32 Ni kupwa adokal ku Bene-jakan atekin chibeng ku Hor-hagidigad. 33 Padokalau ku Hor-hagidigad atekina chibeng ku Jotibata. 34 Mu kusut kwa chisu adokala ku Jotibata ni atekina chibeng ku Abarona. 35 Kupwa adokala ku Abarona ni atekina chibeng ku Eziyon-geber. 36 Padokalau ku Eziyon-geber atekina chibeng mwi mpay ya Zin, ku Kadesh.

37 Mu kusut kwa chisu adokala ku Kadesh ni atekina chibeng ku Mukandu wa Hor, ku mwimbu wa ngand ya Edom. 38 Chad kwi mbil ya Yehova, mwin kupesh Aron wakaninika ku Mukandu wa Hor ni wafila kwinikwa mu muvu wa makum manying (40) kupwa kwa In Isarel kubudik mwi ngand ya Idjibit, dichuku da kusambish da ngond wa katan. 39 Aron wading ni mivu chitot ni makum maad ni yisatu (123) pafay pa Mukandu wa Hor.

40 Chad mwant wa Arad, mwin Kanaan wading ushicha mu Negeb mwi ngand ya Kanaan, watesha rusang anch In Isarel ading akat kwez.

41 Mu kusut kwa chisu adokala ku Mukandu wa Hor ni atekina chibeng ku Salimona. 42 Padokalau ku Salimona atekina chibeng ku Punon. 43 Kupwa adokala ku Punon atekin chibeng ku Obot. 44 Kupwa adokala ku Obot ni atekina chibeng ku Iye-abarim, ku mwimbu wa Mowab. 45 Mu kusut kwa chisu adokala ku Iyim ni atekina chibeng ku Dibon-gad. 46 Padokalau ku Dibon-gad atekina chibeng ku Almon-diblatayim. 47 Kupwa adokala ku Almon-diblatayim ni atekina chibeng ku mikandu ya Abarim kurutu kwa Nebo. 48 Nsuden adokala ku mikandu ya Abarim atekin chibeng mu atubeng a mwi mpay ya Mowab, ku Yordan pantaliken ni Yeriko. 49 Ading atekidin chibeng mu atubeng a mwi mpay ya Mowab, kuns kuns kwa Yordan, kudokal ku Bet-jeshimot kushik ku Abel-shitim.

50 Yehova wambamba ni Moses mu atubeng a mwi mpay ya Mowab, ku Yordan pantaliken ni Yeriko, wamuleja anch: 51 “Ambamb nau In Isarel ni yileja anch, ‘Waukinany Yordan ni kwandam mwi ngand ya Kanaan. 52 Ufanyidinany kuyopat antu awonsu a mwi ngand kurutu kwen ni kushesh mayal mau mawonsu ma kusong ni yirumbidij yau yawonsu ya utad,* ni ufanyidinany kubumon ndond jau ja piur jitumbila jawonsu. 53 Ukuswanany ngand ni kushakamamu, mulong chakin kamu nikukwinkishany ngand yiney mud uswan. 54 Ufanyidinany kwangan ngand pakach pa majuku men kusutin kuta ubal. Chisak chijim ukuchinkishany uswan ujim, ni chisak chikemp ukuchinkishany uswan ukemp. Uswan wa muntu ni muntu ukwikal pakuwila ubal wend. Ukutambulany ndond yen mud uswan kukwatijan ni michid ya atatukwen.

55 “‘Pakwez, anch uyopatinanyap antu a mwi ngand kurutu kwen, aukushanya akwikal mud yom yisansena mu mes men ni miy mwi mbav jen, ni akukumeshany mar mwi ngand ukushakamanya. 56 Ni nikukusalany yom natenchika kuyisal awiy.’”