Kuchind

1 Ni Yehova wambamba ni Moses mwi mpay ya Sinay, mu mwinkand wa kukumangen, pa dichuku da kusambish, ngond wa kaad, muvu wa kaad kupwa kwa kubudik mwi ngand ya Idjibit. Wamuleja anch: 2 “Chindany chisak chawonsu cha In Isarel* muntu ni muntu, kukwatijan ni majuku mau ni kukwatijan ni yisak ya majuku mau; ukuchindany majin ma amakuny awonsu. 3 Ey ni Aron ukuyifundany kukwatijan ni yisak yau* awonsu akweta mivu kusambishin pa makum maad (20) kuya piur, akutwisha kusal mu usalay mu Isarel.

4 “Sendany ikuny umwing ku muchid ni muchid; muntu ni muntu ukwikal ntakel wa chisak cha majuku mau. 5 Am mawiy majin ma amakuny akukukwashanya: Kwa Riben, Elizur mwan a Shedewur; 6 kwa Simeyon, Shelumiel mwan a Zurishaday; 7 kwa Yuda, Nashon mwan a Aminadab; 8 kwa Isakar, Netanel mwan a Zuwar; 9 kwa Zabulon, Eliyab mwan a Helon; 10 kwa an a Jozef: Kwa Efrayim, Elishama mwan a Amihud; kwa Manase, Gamaliyel mwan a Pedazur; 11 kwa Benjamin, Abidan mwan a Gideyoni; 12 kwa Dan, Akiyezer mwan a Amishaday; 13 kwa Azer, Pagiyel mwan a Okran; 14 kwa Gad, Eliyasaf mwan a Dewel; 15 kwa Nefitali, Ayira mwan a Enan. 16 Inay awiy antu a mu chisak atazukau. Awiy amakurump a michid ya atatukwau, antakel a tunan twa In Isarel.”

17 Chawiy Moses ni Aron ayisenda amakuny inay atondau pa majin. 18 Akumangeja chisak chawonsu pa dichuku da kusambish da ngond wa kaad, chakwel ayifunda ading akweta mivu kusambishin pa makum maad (20) kuya piur, muntu ni muntu pa dijin, kukwatijan ni dijuku dend, ni kukwatijan ni yisak ya majuku mau, 19 mud kamu mwamulejau Moses kud Yehova. Chawiy wayifunda mwi mpay ya Sinay.

20 An a Riben, avalau kud mwan wa kusambish wa Isarel, ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda muntu ni muntu panrend, 21 ni antu a ku muchid wa Riben afundau ading uvud wa tunan makum manying ni musamban ni yitot yitan (46 500).

22 An a Simeyon ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda muntu ni muntu panrend, 23 ni antu a ku muchid wa Simeyon afundau ading uvud wa tunan makum matan ni chidivu ni yitot yisatu (59 300).

24 An a Gad ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda, 25 ni antu a ku muchid wa Gad afundau ading uvud wa tunan makum manying ni tutan ni yitot musamban ni makum matan (45 650).

26 An a Yuda ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda, 27 ni antu a ku muchid wa Yuda afundau ading uvud wa tunan makum sambwad ni tunying ni yitot musamban (74 600).

28 An a Isakar ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda, 29 ni antu a ku muchid wa Isakar afundau ading uvud wa tunan makum matan ni tunying ni yitot yinying (54 400).

30 An a Zabulon ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda, 31 ni antu a ku muchid wa Zabulon afundau ading uvud wa tunan makum matan ni sambwad ni yitot yinying (57 400).

32 An a Jozef kusutin Efrayim ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda, 33 ni antu a ku muchid wa Efrayim afundau ading uvud wa tunan makum manying ni yitot yitan (40 500).

34 An a Manase ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda, 35 ni antu a ku muchid wa Manase afundau ading uvud wa tunan makum masatu ni twaad ni yitot yaad (32 200).

36 An a Benjamin ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda, 37 ni antu a ku muchid wa Benjamin afundau ading uvud wa tunan makum masatu ni tutan ni yitot yinying (35 400).

38 An a Dan ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda, 39 ni antu a ku muchid wa Dan afundau ading uvud wa tunan makum musamban ni twaad ni yitot sambwad (62 700).

40 An a Azer ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda, 41 ni antu a ku muchid wa Azer afundau ading uvud wa tunan makum manying ni kamwing ni yitot yitan (41 500).

42 An a Nefitali ayifunda pa majin, pa dijuku, ni kukwatijan ni yisak ya majuku mau. Amakuny awonsu kusambishin pa mivu makum maad (20) kuya piur ading awanyidina kuya mu usalay, ayichinda, 43 ni antu a ku muchid wa Nefitali afundau ading uvud wa tunan makum matan ni tusatu ni yitot yinying (53 400).

44 Inay awiy antu afundau kud Moses pamwing ni Aron ni amakurump dikum ni aad (12) a Isarel, muntu ni muntu wading umekeshin chisak cha majuku mau. 45 In Isarel awonsu kusambishin pa mivu makum maad (20) kuya piur ading awanyidina kuya mu usalay mu Isarel, ayifunda kukwatijan ni chisak cha majuku mau, 46 uvud wawonsu wa antu afundau wading wa tunan yitot musamban ni tusatu ni yitot yitan ni makum matan (603 550).

47 Pakwez In Levi kayifundap nau akwau kukwatijan ni muchid wa atatukwau. 48 Chawiy Yehova wamuleja Moses anch: 49 Muchid wa Levi ufanyidinap kuufund. Ni ufanyidinap kubomb uvud wau ku uvud wa In Isarel akwau. 50 Ukuyitek In Levi kusadin ku dizang da Uman ni pa yom yawonsu ya ku dizang. Akusambish kusend dizang ni yom yad yawonsu; kwawiy kukusambishau kusadin, ni akushakam kuns kuns kwa dizang. 51 Chisu chawonsu chikwita kushemunin dizang, In Levi awiy akudizakola; ni anch chit kudipachok, In Levi awiy akudimika; muntu mwawonsu wakad mbil* ukuseja piswimp chifanyidin kumujip.

52 “Mwin Isarel mwawonsu ukukun mwinkand wend pa ndond yikumwinkishau, muntu ni muntu kukwatijan ni michid yisatu muday, kukwatijan ni yisak yau.* 53 Ni In Levi akushakamin kuns kuns kwa dizang da Uman, chakwel kangal ujim wam walank pa chisak cha In Isarel; ni In Levi akwikal ni chisend cha kulam* dizang da Uman.”

54 In Isarel asala yom yawonsu yamulejau Moses kud Yehova. Mwawiy kamu mwasalau.