Kubudik

40 Chad Yehova wamuleja Moses anch: 2 “Dichuku da kusambish ngond wa kusambish, ukwimik dizang, mwinkand wa kukumangen. 3 Tekamu mushet wa Uman, ni ujindjika nich rido. 4 Ukwandjik tebur ni kutekap yom yifanyidina kwikalap, ni ukwandjik mwend wa lamp ni kwakish malamp mau. 5 Kupwa tek chintamb cha or cha diseng da malash kurutu kwa mushet wa Uman ni tek disun* da ku chis cha dizang.

6 “Ukutek chintamb cha yakupesh ya kwosh pantaliken ni chis cha dizang, mwinkand wa kukumangen, 7 ni ukutek dilong pakach pa mwinkand wa kukumangen ni chintamb, ni ukutekamu mem. 8 Kupwa kun chipang kuns kuns kwa dizang ni tek disun* da ku chis cha chipang. 9 Anch wapwish ukunon many ma kuzizen, ukumazizin ku dizang ni ku yom yawonsu yidamu, ni ukudikadish ditumbila ni yom yawonsu ya dizang, chakwel dikal ditumbila. 10 Ukuzizin many ku chintamb cha yakupesh ya kwosh ni ku yom yach yawonsu ni ukuchikadish chintamb chitumbila, chakwel chikal chintamb chitumbila nakash. 11 Ukuzizin kand many ku dilong ni pa ndond pa kudishichik ni ukuyikadish yitumbila.

12 “Kupwa musejisha Aron ni anend ku chis cha mwinkand wa kukumangen, ni yowisha mem. 13 Ukumudjik Aron masun matumbila ni ukumuzizin many ni kumwikadish utumbila, ni ukwinsadin mud mwin kupesh. 14 Kupwa yisejisha anend piswimp, ni yidjika ankandj. 15 Ukuyizizin many mud muwamuzizinang tatukwau, chakwel ansadin mud in kupesh, ni kuyizizin many kwinoku kukusal anch win kupesh wikal wa awiy chikupu mu yirung yau yawonsu.”

16 Moses wasala yom yawonsu mud kamu mwamulejau kud Yehova. Mwawiy kamu mwasalay.

17 Dichuku da kusambish da ngond wa kusambish, muvu wa kaad, dizang adimika. 18 Pimikay Moses dizang, wateka mashin mau pansh, wimika mabay ma kadre, wateka nkwatish jau, ni wakuna manguj mau. 19 Watangurila mwinkand pa dizang ni wazukap disun da mwinkand, mud kamu mwamulejau kud Yehova.

20 Kupwa wanona Uman wautek mu mushet, wateka misil ku mushet ni watekap chibwik. 21 Wandjika mushet mu dizang ni wateka rido wa kwauril nich, wajindjik mushet wa Uman, mud kamu mwamulejau kud Yehova.

22 Kupwa wateka tebur mu mwinkand wa kukumangen ku mutambu wa kwinkaj* kwa dizang, pol pa rido, 23 ni watekap mulong wa mikat kurutu kwa Yehova, mud kamu mwamulejau kud Yehova.

24 Wateka mwend wa lamp mu mwinkand wa kukumangen pantaliken ni tebur, ku mutambu wa kwindum* kwa dizang. 25 Wakisha malamp kurutu kwa Yehova, mud kamu mwamulejau kud Yehova.

26 Kupwa wateka chintamb cha or mu mwinkand wa kukumangen kurutu kwa rido, 27 mulong wa kufindishinap mish ya diseng da malash da res ruwamp, mud kamu mwamulejau kud Yehova.

28 Kupwa wateka disun* da ku chis cha dizang.

29 Wateka chintamb cha yakupesh ya kwosh ku chis cha dizang, mwinkand wa kukumangen, chakwel alambwilap yakupesh ya kwosh ni mulambu wa yakuda,* mud kamu mwamulejau kud Yehova.

30 Kupwa wateka dilong pakach pa mwinkand wa kukumangen ni chintamb ni watekamu mem mulong wa kowal. 31 Moses, Aron ni anend owala ku makas ni ku mend mu dilong dined. 32 Chisu chawonsu chandamangau mu mwinkand wa kukumangen ap chasejangau ku chintamb, owalang mem, mud kamu mwamulejau Moses kud Yehova.

33 Nsuden wakuna chipang kuns kuns kwa dizang ni chintamb ni wateka disun* da ku chis cha chipang.

Wawiy mutapu wapwishay Moses mudimu. 34 Didj dasambisha kubwik mwinkand wa kukumangen, ni uyaj wa Yehova wizula mu dizang. 35 Moses wakanganya kwandam mu mwinkand wa kukumangen mulong didj dading didandamedin kuubwik, ni uyaj wa Yehova wading wizwil mu dizang.

36 Mu weny wau wawonsu, anch didj datumbuk pa dizang, In Isarel ajipang chibeng. 37 Pakwez, anch didj ditumbukinap niyau kajipangap chibeng, kushik ni dichuku dikutumbuka didj. 38 Mulong didj da Yehova dading pa dizang muten, ni uchuku pading kasu, ni In Isarel awonsu amanang yom yiney mu weny wau wawonsu.