Kubudik

26 “Ukusal dizang nich masun ma pa mwinkand dikum ma leng muwamp wa kubul mibung, ndand wa ulombu wa ble, ndand usunzirikina,* ni ndand musunz. Pa masun minam ukupachimin yifatul ya asheribeng.* 2 Disun ni disun da pa mwinkand dikwikal ni akude* makum maad ni chinan (28) pa kulep ni akude 4 pa kujimb. Masun mawonsu ma pa mwinkand makwikal ni kujimb kumwing. 3 Masun matan ma pa mwinkand akumachim pamwing mulong wa kusal disun dimwing, ni masun makwau matan ma pa mwinkand akumachim masal disun dimwing. 4 Ukusal masu nich ndand wa ulombu wa ble ku ris ra disun da pa mwinkand dida kwinsuden kwa masun makubombau, ukusal kand mutapu wawiy umwing ku ris ra disun dida kwinsuden kwa masun makwau matan makubombau pa ndond pa kusankena masun matan ma mutambu umwing ni matan ma mutambu ukwau. 5 Ukusal masu makum matan (50) ku disun dimwing da pa mwinkand ni masu makum matan (50) ku ris ra disun dikwau da pa mwinkand, chakwel matalijan pa ndond pa kumasankeshin. 6 Ukusal malau makum matan (50) ma or ni ukusankesh masun ma mwinkand nich malau, ni dizang dikwikal chom chimwing.

7 “Ukusal kand masun ma mavuj ma mpemb ma kubwik pa dizang. Ukusal masun ma mwinkand dikum ni umwing (11). 8 Disun ni disun da pa mwinkand dikwikal ni akude makum masatu (30) pa kulep ni akude 4 pa kujimb. Masun mawonsu ma pa mwinkand dikum ni umwing (11) makwikal ni kujimb kumwing. 9 Ukuchim masun ma mwinkand matan pamwing ni ukuchim masun makwau ma mwinkand musamban pamwing, ni disun da mwinkand da musamban ukudibamin kurutu kwa mwinkand. 10 Ni ukusal masu makum matan (50) ku ris ra disun dimwing, da kwinsuden kwa masun makubombau, ni masu makum matan (50) ku ris ra disun da masun makwau makubombau, pa ndond pa kumasankeshin. 11 Ukusal malau makum matan (50) ma kwivre, ukumakwadik mu masu ni kusankesh mwinkand pamwing, ni mwinkand ukwikal chom chimwing. 12 Chikunku chikushalaku cha masun ma mwinkand chikuzezet. Mu chikunku chinech chikushalaku, chikunku chimwing chikuzezet panyim pa dizang. 13 Pa kulep pa dizang, chikunku chishadinaku cha masun ma mwinkand chikuzezet ku dizang mutambu ni mutambu, ni chikwikal ni kulep kwa kude umwing kusutamu disun da kusambish da mwinkand, mulong wa kubwik dizang.

14 “Ukusal kand chibwik cha mwinkand cha yikit ya amikoku amakwal chitekinau ulombu usunz, ni piur pakwikal chibwik cha yikit ya nnam utazukinau anch fok.

15 “Ukusal mabay ma kadre ma dizang ma mutond wa kaash ni ukumimik. 16 Dibay ni dibay da kadre dikwikal ni akude dikum pa kulep kuya mwiur ni kude umwing ni chikunku pa kujimb. 17 Dibay ni dibay da kadre dikwikal ni tumitu* twaad twilongina. Mwawiy ufanyidina kusal mabay ma kadre mawonsu ma dizang. 18 Ukusal mabay ma kadre makum maad (20) ma mutambu wa kwindum* wa dizang.

19 “Ukusal mashin* ma utad wa arjang makum manying (40) mwinshin mwa mabay ma kadre makum maad (20): Mashin maad mwinshin mwa dibay da kadre dimwing mwa kwandjik tumitu twau twaad ni mashin maad mwinshin mwa dibay ni dibay da kadre dilondwilaku mwakwandjik tumitu twau twaad. 20 Ukusal mabay ma kadre makum maad (20) ma mutambu ukwau wa dizang, mutambu wa kwinkaj* 21 ni mashin mau ma utad wa arjang makum manying (40), mashin maad mwinshin mwa dibay da kadre dimwing ni mashin maad mwinshin mwa dibay ni dibay da kadre dilondwilaku. 22 Ukusal mabay ma kadre musamban ma kwinyim kwa dizang, mutambu wa kurand. 23 Ukusal mabay ma kadre maad makwikala mud manguj ma pa makonk maad ma kwinyim kwa dizang. 24 Ukumabomb maad maad kudokal kwinshin kuya piur, djat ku chikom cha kusambish. Ukusal mwamu piur pa mabay ma kadre minam maad, ni makusal manguj maad ma pa makonk. 25 Ni kukwikal mabay ma kadre chinan ni mashin mau ma utad wa arjang dikum ni musamban (16), mashin maad mwinshin mwa dibay da kadre dimwing ni mashin maad mwinshin mwa dibay ni dibay da kadre dilondwilaku.

26 “Ukusal nkwatish ja mabay ma kaash, jitan mulong wa mabay ma kadre ma mutambu umwing wa dizang, 27 ni nkwatish jitan mulong wa mabay ma kadre ma mutambu ukwau wa dizang, ni nkwatish jitan mulong wa mabay ma kadre ma mutambu wa kurand wa dizang, kwinyim. 28 Rikwatish ra pakach rikwikala pakach pa mabay ma kadre rikudokal ku ris rumwing djat ku ris rikwau.

29 “Ukushiril mabay ma kadre nich or, ni ukumasadin yikom ya or mwa kwandjik nkwatish, ni nkwatish ukujishiril nich or. 30 Ufanyidin kwimik dizang mud kamu mutapu nakulejang ku mukandu winou.

31 “Ukusal rido wa ndand wa ulombu wa ble, ndand usunzirikina,* ndand musunz, ni leng muwamp wa kubul mibung. Pa rido winou ukupachimin yifatul ya asheribeng. 32 Ukumukudik ku manguj manying ma kaash makushiril nich or. Tuzal twau tukwikal twa or. Manguj akumimik pa mashin manying ma utad wa arjang. 33 Ukukudik rido ku malau ni ukwandjik mushet wa Uman kwinikwa, kwinyim kwa rido. Rido ukukwaurilany Ndond Yitumbila ni Ndond Yitumbila Nakash. 34 Mwi Ndond Yitumbila Nakash mwawiy ufanyidina kutekin chibwik pa mushet wa Uman.

35 “Ukutek tebur pol pa rido, ni mwend wa lamp ukutalijana ni tebur ku mutambu wa kwindum wa dizang; tebur ukumutek ku mutambu wa kwinkaj. 36 Ukusal disun* da ku chis cha mwinkand da ndand wa ulombu wa ble, da ndand usunzirikina,* da ndand musunz, ni da leng muwamp wa kubul mibung, yawonsu ya kuchim pamwing. 37 Ukusal manguj matan ma kaash mulong wa disun* ni ukumashiril nich or. Tuzal twau tukwikal twa or, ni ukumenguril mashin matan ma kwivre.